Positibong Kalainan nga Namatikdan sa mga Magtutudlo

● Si Irena, nga Grade 8 nga estudyante, nagpuyo sa Kurtovo Konare, usa ka baryo sa Bulgaria. Gihatagan sa iyang inahan ang iyang maestra ug librong Mga Pangutanang Gisukna sa mga Batan-on—Mga Tubag nga Mosaler panahon sa miting sa mga ginikanan ug mga magtutudlo.

Paglabayg pipila ka adlaw, ang maestra, nga nagkapot ug libro, nagsugo kang Irena sa pagtindog atubangan sa klase. “Ikay magtudlo karon sa klase,” iyang giingnan si Irena. “Duna koy napili nga kapitulo nga imong basahon, ug gusto ko nga isaysay nimo kon giunsa pagpadapat sa inyong pamilya ang mga sugyot diha niana.” Ang kapitulo nga iyang gipili mao ang “Nganong Angay Kong ‘Pasidunggan ang Akong Amahan ug Akong Inahan’?”

Sa pagpaingon ni Irena sa atubangan, ang uban niyang klasmet miingon nga lahi ang iyang ginikanan. Misalga ang maestra ug miingon: “Nahibalo ba kamo kon nganong lahi ang ilang pamilya? Tungod kay sila nagtuon sa Bibliya. Akong estudyante ang iyang mga magulang nga lalaki, ug sukad sa pagkamaestra nako wala pa ko makakitag sama nila ka matinahoron ug maayong pagkamatuto.”

Dayon gisugo sa maestra si Irena sa pagbasa. Human niyag basa sa parapo nga nagsaysay nga gihatagan sa Diyos ang mga ginikanan ug katungod sa paghatag ug mga balaod, ang maestra nangutana: “Irena, giunsa man ninyo kana pagpadapat sa inyong pamilya? Gilantaw ba nimong balaod ang tanang isulti sa imong ginikanan kanimo?”

“Kitang tanan dunay kaugalingong opinyon,” miingon si Irena, “apan ang Bibliya nag-ingon nga kinahanglang tahoron sa mga anak ang ilang ginikanan ug magpasakop kanila, ug ingon kami niana. Bisan pa niana, kon kami dunay estoryahan, ang matag usa kanamo hatagag higayon sa pagsulti sa among opinyon.” Dihang natapos ang klase, ang tanan natagbaw sa iyang eksplinasyon.

Makahangyo kag kopya niining libroha pinaagi sa pagpil-ap sa kupon ug pagpadala niana ngadto sa adres nga makita diha sa kupon o sa nahiangayng adres sa panid 5 niining magasina.

□ Interesado akong makadawat ug kopya sa librong gipakita dinhi.

□ Palihog kontaka ako bahin sa usa ka libreng pagtuon sa Bibliya sa balay.