Gidisenyo ba Kini?

Dila sa Hummingbird

● Ginaanalisar sa mga tigdukiduki ang gagmayng tulo sa dugo, DNA, ug ubang mga substansiya diha sa bildo nga samag gidak-on sa imong palad. Aron makuha ang gagmayng tulo sa likido, gikinahanglan ang pangsuyop, apan sagad dili kini magsilbi. Duna bay mas maayong paagi sa pagkuha sa likido nga ingon niini ka diyutay? Sumala kang Dr. John Bush sa Massachusetts Institute of Technology, “ang kinaiyahan dunay solusyon niini nga problema.”

Hunahunaa: Ang hummingbird dili mogamit ug puwersa sa pagsuyop sa dugos sa bulak. Hinunoa, gamiton niini ang puwersa nga magpahinabo sa tubig diha sa plat nga ibabaw sa pagtibug-ok ug pagkontra sa grabidad. Inigdapat sa dila sa hummingbird diha sa dugos, ang dila niini molikit ug mapormang gamayng istro, ug ang dugos mosaka diha niana. Sa ato pa, dili mag-usik ang hummingbird ug puwersa sa pagsuyop kay ang dugos mosaka rag iya diha sa dila. Sa dihang maniba, ang mga hummingbird makapuno sa ilang dila ug dugos kutob 20 ka beses matag segundo!

Kining paglikit sa dila sa langgam nga mapormang istro mahimo usab sa ubang mga langgam sa baybayon nga moinom ug tubig niining paagiha. Bahin niining abilidara, si Propesor Mark Denny sa Standford University, sa California, U.S.A., miingon: “Ang kombinasyon sa inhenyeriya, pisika, ug matematika katingalahan gayod . . . Kon mohangyo kag inhenyero o matematiko sa pagdisenyo ug paagi aron ang tubig mosaka gikan sa sungo sa langgam ngadto sa baba niini, dili gayod nila kini mahunahunaan.”

Unsay imong hunahuna? Ang giming bang dila sa hummingbird—nga may talagsaong abilidad sa pagsuyop ug dugos sa madali ug sa epektibong paagi—sulagmang mitungha o kini ba gidisenyo?

[Picture Credit Line sa panid 23]

© Richard Mittleman/Gon2Foto/Alamy