Mga Tawong Imong Kasaligan

Si Santiago, nga taksi drayber sa Argentina, wala magduhaduha kon unsay himoon. Giuli dayon niya ang bag nga nahibilin sa iyang taksi. Morag ordinaryo lang ang iyang gihimo, apan sa pagkatinuod dili, kay ang bag dunay sulod nga kapin sa $32,000!

MAHANDURAW ba nimo ang usa ka kalibotan nga puno sa mga tawong kasaligan? Pagkalahi unya sa kinabuhi diha niana! Dili ka mahadlok mobilin sa imong anak sa iyang yaya. Dili na kinahanglang kandadoan ang imong balay. Damgo ba lamang kini?

Ang Epekto sa Moral nga mga Sukdanan

Si apostol Pablo miingon bahin sa iyang kaugalingon ug sa iyang mga isigka-Kristohanon: “Buot namong magmaminatud-on sa tanang butang.” (Hebreohanon 13:18) Ang mga Saksi ni Jehova naningkamot sa pagpadapat niana. Nagtinguha sila sa pagkinabuhi sumala sa mga hiyas nga gihubit sa Bibliya sa Isaias 33:15: “Adunay usa nga naglakaw sa mapinadayonong pagkamatarong ug nagsulti kon unsa ang matul-id, nga nagsalikway sa dili-minatarong nga kinitaan gikan sa mga pagpanikas, nga nagwilik sa iyang mga kamot sa dili pagdawat ug hiphip.” Sa unsang paagi ang pipila nagpadapat niini?

● ‘Isulti kon unsay matul-id.’ Si Domingo nga usa ka Saksi ni Jehova sa Pilipinas maoy saop sa usa ka kalubihan. “Daghang tawo dili motug-an sa tinuod sa ilang mga amo,” siya miingon. “Pananglitan, kon magkopras, dili sila motug-an sa tag-iya kon pila ka sako ang nakopras. Busa sila sekretong makapamaligya ug pipila ka sako.”

Si Domingo ug ang iyang pamilya nagmatinud-anon usab sa laing paagi. Hapit silang mapapahawa tungod kay dili nila gustong mamakak bahin sa kita sa kalubihan aron unta makabentaha ang ilang amo. Bisan pa niana, si Domingo miingon: “Among giingnan ang tag-iya nga bisan pag papahawaon mi, dili kami mamakak. Sa ulahi, ang tag-iya miingon nga ang mga Saksi ni Jehova maoy maayong mga tawo ug kasaligan, ug kami iyang gihatagag dugang yuta nga among umahon.”

● ‘Isalikway ang dili-minatarong nga kinitaan.’ Si Pierre, nga hepe sa tigkolektag buhis sa usa ka dapit sa Cameroon, daghan untag kahigayonan nga makapanapi. Sa dihang giasayn siya sa pagsuweldo sa temporaryong mga empleyado, may nadiskobrehan siya. Si Pierre miingon: “Apil gihapon sa suweldohanan ang mga empleyado nga lapas nag kontrata hasta ang mga patay. Imbes maghunahuna nga magamit nako kining kuwartaha, naghimo kog rekord ug gitipigan ang kuwarta sa kaha de yero.”

 Unsay resulta niini? “Paglabayg duha ka tuig,” si Pierre miingon, “giawdit ang mga rekord. Magarbohon kaayo ko sa pagpresentar ug tukmang rekord ug sa pagtunol sa eksaktong kantidad, nga niadtong tungora dako-dako na. Kinasingkasing kong gipasalamatan sa mga awditor tungod sa akong pagkamatinud-anon.”

● ‘Ayaw pagdawat ug hiphip.’ Sa iyang pagkaabogado sa Rio de Janeiro, Brazil, si Ricardo kadaghan na tanyagig hiphip. “Sa usa ka higayon,” siya miingon, “usa ka abogado ang misulay paghiphip nako. Luyo sa akong kasayoran, nagpadala siyag CD player sa akong balay. Niadtong panahona, mahal pa kaayo ang CD player.”

Unsay gihimo ni Ricardo? “Kami sa akong asawa nakadesisyon nga dili gyod namo ablihan ang karton,” siya miingon. “Miadto ko sa opisina sa abogado ug nakuratan kaayo siya sa dihang akong gibutang ang karton sa iyang lamesa. Maayong higayon kadto sa pagsaysay kon nganong giuli nako kini. Nakadayeg kaayo ang iyang sekretarya sa akong gihimo.”

Tinuod, dili lang ang mga Saksi ni Jehova ang naningkamot nga magminatarong, apan ingong usa ka grupo sila nailhan nga kasaligan. Mao kanay hinungdan kon nganong mga Saksi ni Jehova lang ang gipatrabaho sa usa ka dakong tindahag sinina sa Poland. Ang sales manager  miingon: “Bisan asa dunay mga tawong matinud-anon, apan ang mga Saksi ni Jehova dunay mga prinsipyo, ug dili gayod nila kana lapason.”

Kasaligan Bisag Kabos

Para sa kadaghanang tawo, okey rang manglimbong kon ang usa kabos. Pananglitan, ang CNN nagreport bahin sa 14-anyos nga batang lalaki sa Nigeria nga walay laing gihimo kondili ang pagpangilad diha sa Internet. “Unsa man diay ang akong himoon?” siya miingon sa pagpakamatarong sa iyang gihimo. “Akoy nagbuhi sa akong pamilya—sa akong igsoong babaye, inahan, ug akong amahan. Kinahanglan tang mabuhi.”

Siyempre, ang Bibliya wala magsaad nga madato ang tawong matinud-anon, apan kini nagpasalig nga sila makabaton sa ilang mga panginahanglan. Ang Isaias 33:16 nag-ingon: “Ang iyang kaugalingong tinapay tinong ihatag kaniya.”

Apan tingali ang uban mangutana: ‘Sa unsang paagi ang pagkakasaligan makatabang niadtong nag-ilaid sa kakabos? Komosta kadtong nangamas matag adlaw aron makakaon?’

Tagda si Berthe, usa ka biyuda sa Cameroon nga namaligyag lamiang miando nga gama sa kamoteng kahoy. “Sa naandan, dunay 20 ka miando sa matag bugkot,” siya miingon. “Ang mga namaligya sagad magbutang lang ug 17 o 18 ka buok, apan wala nako na buhata kay dili ko gustong manikas aron lang makakuwarta.”

Kusog bag halin si Berthe? Dili sa tanang panahon. “Sagad dili ko mahalinan sa tibuok adlaw,” siya miingon. “Apan sa dihang mangutang kog pagkaon sa mga nanindag pagkaon ug sultihan sila nga wala pa koy halin, ila kong pautangon  kay nahibalo sila nga mobayad dayon ko kon makakuwarta na ko. Nakita nila nga kasaligan ko.”

Diyos nga Takos sa Atong Pagsalig

Mas mosalig kita sa usa ka tawo kon tumanon niya ang iyang gipamulong. Si Josue, nga usa ka lider sa karaang Israel, miingon bahin sa Diyos: “Walay saad nga napakyas sa tanang maayong saad nga gisaad ni Jehova . . . Kining tanan natuman.” (Josue 21:45) May katarongan ba usab kita nga mosalig sa Diyos?

Ang mga saad sa Diyos kasaligan kaayo nga iyang gitandi ang iyang pulong sa ulan. (Isaias 55:10, 11) Sa pagkatinuod, duna bay makapugong sa pagbundak sa ulan nga makapabasa sa yuta ug makapatubo sa tanom? Wala! Sa samang paagi, walay makapugong sa pagkatuman sa mga saad sa Diyos.

Ang usa sa maong mga saad narekord sa 2 Pedro 3:13, nga nag-ingon: “Adunay bag-ong mga langit ug usa ka bag-ong yuta nga atong ginapaabot sumala sa iyang saad, ug niini magpuyo ang pagkamatarong.” Katuyoan sa Diyos nga wagtangon sa yuta ang tanang mapahimudsanon sa ilang isigkatawo. Buot ka bang masayod ug dugang kon sa unsang paagi tumanon sa Diyos ang iyang katuyoan? Kontaka ang mga Saksi ni Jehova sa inyong lugar, o pagsulat sa nahiangayng adres nga nalista sa panid 5 niining magasina.

[Kahon/Hulagway sa panid 8]

PAGKAMATINUD-ANON GIGANTIHAN

Si Lucio, nga usa ka Saksi ni Jehova sa Pilipinas, makahimo unta sa pagpanglimbong. Nakakita siyag $27,500 sa daang kabinet sa opisina nga gipahinloan kaniya. Ang opisina—ug ang kuwarta—iya sa iyang amo, nga mibiyahe sa laing lugar tungod sa negosyo. “Mao kadto ang unang higayon nga nakakita kog dolyar!” miingon si Lucio.

Sa nakapauli na ang iyang amo, gitunol ni Lucio kaniya ang kuwarta. Unsay resulta? “Gihatagan ko ug dugang responsibilidad,” miingon si Lucio. “Gani, gihatagan ko sa akong amo ug kuwarto nga kapuy-an sa akong pamilya. Bisag lisod ang kinabuhi sa Pilipinas, nagtuo gyod ko nga kami giatiman ni Jehova nga Diyos kay among gituman ang iyang mga balaod.”

[Kahon/Hulagway sa panid 9]

HUSTONG TIMBANGAN

Nailado ang puwesto ni Moïse diha sa merkado sa Douala, Cameroon, diin namaligya siyag isda. “Ginganlan nako ang akong gamayng tindahan ug Ang Timbangan,” siya miingon, “kay ang akong timbangan maoy usa sa pipila ka timbangan sa tibuok merkado nga wala lisoa. Nahibalo ko nga ginasulayan ko sa mga tawo matag karon ug unya. Kon usa ka kilo ang ilang paliton, eksaktong usa ka kilo ang akong ihatag. Ila kining ipatimbang sa laing timbangan. Inigtimbang nila, ilang makita nga sobra kini sa usa ka kilo! Busa nahibalo sila nga wala ko manglimbong! Daghan ang moingon nako, ‘Sa imo mi mamalit kay matinud-anon ka.’”

[Hulagway sa panid 7]

“Among giingnan ang tag-iya nga bisan pag papahawaon mi, dili kami mamakak.”—Domingo, Pilipinas.

[Hulagway sa panid 7]

“Kinasingkasing kong gipasalamatan sa mga awditor tungod sa akong pagkamatinud-anon.”—Pierre, Cameroon.

[Hulagway sa panid 7]

“Usa ka abogado ang misulay paghiphip nako. . . . Kami sa akong asawa nakadesisyon nga dili gyod namo ablihan ang karton.”—Ricardo, Brazil.

[Hulagway sa panid 7]

Si Berthe sagad dili mahalinan sa tibuok adlaw. Apan pautangon siya sa ubang nanindag pagkaon kay nahibalo sila nga mobayad dayon siya kon makakuwarta na.