Sinatia ang Alpine Marmot

Dihay kusog kaayong tihol. Morag pagtihol kini sa usa ka batang lalaki ngadto sa iyang higala—apan mas kusog. Ang tihol naglanoglanog sa kabukiran, apan dili kaayo matino kon diin kini gikan. Dayon nakakita ako ug gamayng ilaga nga bagag balhibo nga mikaratil ug dagan paingon sa lungag sa duol. Sa gitan-aw nako ang akong libro, akong nahibaloan nga ang akong nakita ug nadungog mao ang alpine marmot.

 SA SUNOD nga pipila ka adlaw, nasinati ako niining bagag balhibo nga mga ilaga. Akong nahibaloan kon diin nga mga bato sila gustong magpabulad sa adlaw, kon diin ang ilang mga lungag, ug kon sa unsang paagi sila nabuhi diha sa bugnaw kaayong lugar.

Pagtinabangay ug Pagkamabinantayon Ingong Pamilya

Alang sa marmot, lisod ang kinabuhi diha sa kabukiran. Bugnaw kaayo panahon sa tingtugnaw, ug ang ilang pinuy-anan lagmit matabonag yelo sulod sa daghang bulan. Dugang pa, dunay mga manunukob sa yuta ug sa kahanginan. Busa ang pagpabiling buhi sa marmot nagdepende sa ilang pagtinabangay, pagplano, ug pagkamabinantayon.

Ang mga pamilya sa marmot sagad maggrupo-grupo pagpuyo. Ang matag pamilya magkalot ug daghang lungag—ang usa ingong puy-anan ug ang uban ingong kadangpan panahon sa kapeligrohan. Usahay, ang marmot maglungag diha sa mga liki ilalom sa dagkong bato. Kining samag-kastilyong mga puy-anan bantang kaayo nga magsilbing torre nga lantawanan ug balkonahe para magpabulad sa adlaw.

Limpiyado kaayo ang marmot. Sila dunay lahi nga lungag para sa kasilyas aron magpabiling hinlo ang ilang puy-anan. Sa kinatumyan sa ilang puy-anan, ang marmot mag-andam ug dakong hawan, nga ilang hanigan ug sagbot. Kini nga hawan maoy luwas nga dapit dihang manganak ang baye. Kini usab magsilbing mainit-init nga puy-anan diin ang tibuok pamilya mangatulog panahon sa taas nga tingtugnaw.

Tingali ang labing importanteng responsibilidad sa pamilya mao ang pagguwardiya. Ang hingkod nga marmot magguwardiya samtang ang ubang membro sa pamilya manibsib diha sa duol. Sa pagsusi kon dunay kaaway, ang marmot motindog usahay pinaagi sa pangulahiang tiil aron makita ang palibot. Ang mga agila, ihalas nga iro, ug tawo mao ang pangunang kaaway sa alpine marmot. Kon sila makakitag dagkong langgam mananagit, sila moalarma dayon. Makaiikag nga ang alarma nga dunay agila, ang pangunang pak-ang kaaway sa marmot, lahi kaayo. Sa dihang madungog ang alarma, ang mga marmot magkabuang ug panago. Sa usa lang ka pamilok wala nay makitang marmot!

 Ang pagkamasinugtanon mahimong moresultag kaluwasan o kamatayon, ilabina na sa mga anak sa marmot, nga kinaham sa mga golden eagle. Kon haduol na ang kaaway, ang guwardiya managan sa lungag sa duol duyog sa uban. Dayon, sa paglabayg pipila ka minutos, mabinantayon niyang ipagimaw ang iyang ulo sa pagsusi kon wala na ba ang kaaway.

Pagpabiling Bugnaw ug Pagkatulog ug Maayo

Ibabaw sa bukid nga gipuy-an sa mga marmot, abunda kaayo ang sagbot nga ilang makaon, ug kasarangan ang klima panahon sa ting-init. Kon bugnaw ang panahon, sila magpabulad diha sa bato. Ang mga marmot dili makaagwanta sa init nga temperatura, kay baga ang ilang balhibo. Tungod niini, sila mas aktibo sayo sa buntag ug sa ulahing bahin sa kahaponon.

Ang alpine marmot walay problema sa pagkatulog; panahon sa tingtugnaw, sila matulog sulod sa mga unom ka bulan. Ang ilang kamatang, ang hoary marmot, matulog kutob sa siyam ka bulan. Sa dihang matulog, ang kasingkasing sa alpine marmot mohinay pagpitik ngadto sa usa o duha ka pagpitik matag minuto, ug ang temperatura sa lawas niini mous-os ngadto sa mga lima ka grado Celsius. Kay dili man sila makakaon nianang gidugayona, sila kinahanglang mangandam. Sa ting-init ug sa sayong bahin sa tinghunlak, ang mga marmot magpabusdik hangtod manambok aron makalahutay sa dugay kaayong pagkatulog sa tingtugnaw.

Ang mga anak sa marmot hinula ug maglibot-libot ug dagan nga magginukdanay. Akong nakita ang tulo ka gagmayng marmot nga nagligidligid sa kabalilihan nga daw nagdumogay. Ang mga marmot magtimbayaay pinaagi sa pagdapat sa ilang mga ilong; ang mga membro sa pamilya maghindikay sa usag usa ug magdip-igay panahon sa tingtugnaw aron mainitan.

Ang mga marmot mangandam sa umaabot ug alisto sa kapeligrohan. (Job 12:7) Tingali may makat-onan ang tawhanong mga pamilya gikan niining mga ilagaa.

[Blurb sa panid 11]

Ang marmot nakadugang sa kanindot sa bugnawng kabalilihan, ug ang pagtinabangay sa ilang pamilya nagpamatuod sa kaalam sa ilang Maglalalang.—Salmo 50:10

[Blurb sa panid 12]

Ang hingkod nga marmot magguwardiya samtang ang ubang membro sa pamilya manibsib diha sa duol