Ang Hunahuna sa Bibliya

Tinuod ba nga Persona ang Diyos?

KAY nahingangha sa kinaiyahan, daghang tawo naaghat pagtuo sa usa ka espirituhanong puwersa—usa ka diyos. Nakadayeg ka ba sa pagkakahibulongan sa uniberso? Nahingangha ka ba sa katahom sa kalalangan sa atong planeta ug sa makuting disenyo sa lawas sa tawo?

Kon mao, hayan nga nakombinsir ka sa pagtuo sa labaw-tawhanong gahom. Ang pipila ka relihiyon nagtudlo nga kini nga mga persona nagpuyo diha sa mga bukid, kahoy, ug ubang bahin sa uniberso. Ang uban nagtuo nga ang espiritu sa mga katigulangan, ang uban buotan ug ang uban daotan, naghiusa ug nahimong usa ka Supremong Persona—ang Diyos!

Bisan hain pa niana, ang kadaghanan nagtuo nga kining espirituhanong puwersa walay personalidad. Ang uban dili motuo nga ang Diyos dunay hunahuna, pagbati, katuyoan, ug mga tinguha. Ang Diyos ba tinuod nga persona? Ang Bibliya, nga usa sa labing karaan nga balaang basahon nga kaylap nga naapod-apod karon, dunay tin-aw kaayong tubag.

Ang Kinaiyahan sa Tawo Nagpadayag Kon Unsa ang Kinaiyahan sa Diyos

Ang Bibliya nagtudlo nga ang tawo gilalang nga dunay mga hiyas nga sama nianang sa Diyos. Ang Genesis 1:27 nag-ingon nga “gilalang sa Diyos ang mga tawo, nga naghimo kanila nga sama kaniya.”—Today’s English Version.

Klaro nga kanang mga pulonga wala magpasabot nga ang unang mga tawo sama gayod ug dagway sa Diyos. Ang Bibliya nag-ingon nga ang Diyos maoy usa ka dili-makitang espiritu, samtang ang mga tawo gihimo gikan sa mga elemento sa yuta. (Genesis 2:7; Juan 4:24) Gawas niana nga kalainan tali sa Diyos ug sa tawo, ang pagsusi sa mga hiyas sa tawo makahatag ug katin-awan kon unsa ang kinaiyahan sa Diyos.

 Ang tawo dunay katakos sa pagpasundayag ug gahom ug sa pagplano sa iyang mga lihok. Kini nga mga lihok mahimong gitukmod sa mga hiyas sama sa kaluoy, katakos sa paghunahuna, kaalam, ug hustisya. Ang tawo dunay nagkalainlaing pagbati, sama sa malulutong gugma, pagdumot ug kasuko. Kining nagkalainlaing hiyas nagpalahi kanato gikan sa usag usa. Oo, ang matag usa kanato dunay kaugalingong personalidad. Ang mga tawo persona.

Makataronganon ba nga ang Diyos maglalang kanato ingong komplikado kaayong mga persona kon siya mismo maoy usa ka dili-persona nga puwersa nga naglutawlutaw lang diha sa kalibotan sa mga espiritu? Kon ang tawo gihimo sa dagway sa Diyos, nan ang kinaiyahan sa Diyos sa daghang paagi sama sa kinaiyahan sa tawo. Tagda ang mosunod.

Ang Diyos dunay personal nga ngalan. Ang Bibliya nag-ingon sa Isaias 42:8: “Ako mao si Jehova. Kana ang akong ngalan.” Buot sa Diyos nga ang iyang ngalan mailhan. Ang Bibliya nag-ingon usab: “Dayegon unta ang ngalan ni Jehova sukad karon ug hangtod sa panahong walay tino. Gikan sa sidlakan hangtod sa kasadpan ang ngalan ni Jehova pagadayegon.” (Salmo 113:2, 3) Busa pinaagi sa paggamit kanunay sa ngalan sa Diyos, siya giisip sa iyang mga magsisimba ingong persona.

Ang Diyos walay sama. Ang Bibliya nagtudlo nga ang Diyos walay sama. (1 Corinto 8:5, 6) “Ikaw sa pagkatinuod dako, Oh Soberanong Ginoong Jehova; kay walay lain nga sama kanimo, ug walay Diyos gawas kanimo,” nag-ingon ang Bibliya. (2 Samuel 7:22) Gihubit usab sa Kasulatan si Jehova ingong “ang matuod nga Diyos sa kalangitan sa itaas ug dinhi sa yuta sa ubos. Wala nay lain.”—Deuteronomio 4:39.

Si Jehova nga Diyos nagdumot sa pagkadaotan. Persona lang ang mobatig pagdumot. Ang Bibliya nag-ingon nga ang Maglalalang nagdumot sa mga butang sama sa ‘mapahitas-ong mga mata, bakakon nga dila, mga kamot nga nagaula ug inosenteng dugo, kasingkasing nga nagamugnag madaotong mga laraw, mga tiil nga nagadali sa pagdalagan ngadto sa pagkadaotan, bakakong saksi nga nagasabwag ug kabakakan, ug sa nagapahinabog panaglalis sa taliwala sa mga kaigsoonan.’ (Proverbio 6:16-19) Matikdi nga ang Diyos nagdumot sa mga panggawi nga makapasakit sa uban. Busa, atong nahibaloan nga ang Diyos nahingawa kanato ug nagdumot sa mga butang nga makadaot kanato.

Si Jehova maoy usa ka mahigugmaong Diyos. Ang Bibliya nag-ingon nga ang Diyos nahigugma pag-ayo sa “mga tawo niini nga kalibotan.” (Juan 3:16, Contemporary English Version) Kini nagpakita nga siya sama sa usa ka mahigugmaong amahan nga nagtinguha sa kaayohan sa iyang mga anak dinhi sa yuta. (Isaias 64:8) Ang mga tawo makabaton ug daghang panalangin pinaagi sa pag-ila sa posisyon sa Diyos ingong ilang mahigugmaong Amahan.

Ikaw Mahimong Higala sa Diyos

Klaro nga nagtudlo ang Bibliya nga ang Maglalalang maoy usa ka persona nga dunay ngalan ug personalidad. Siya may katakos sa pagpasundayag ug gahom ug sa paghimog tinong mga buhat nga gitukmod sa mga hiyas sama sa kalulot, kaalam, ug hustisya. Siya haduol o daling duolon. Siya miingon: “Ako, si Jehova nga imong Diyos, nagahawid sa imong tuong kamot, ang Usa nga nag-ingon kanimo, ‘Ayaw kahadlok. Ako magatabang kanimo.’”—Isaias 41:13.

Ang Diyos dunay katuyoan alang sa katawhan. Ang Bibliya nag-ingon: “Ang mga matarong magapanag-iya sa yuta, ug sila magapuyo sa ibabaw niini hangtod sa kahangtoran.” (Salmo 37:29) Ang pagkahibalo nga si Jehova talagsaon ug dunay linaing ilhanan nagpasayon kanato sa pagpakigsuod kaniya ug sa pagtagamtam sa mga panalangin nga iyang gitanyag alang niadtong buot mahimong iyang mga higala.—Deuteronomio 6:4, 5; 1 Pedro 5:6, 7.

NAHIBULONG KA BA?

● Ang Diyos ba dunay personal nga ngalan?—Isaias 42:8.

● Daghan ba ang diyos?—1 Corinto 8:5, 6.

● Ang mga tawo ba makapakigsuod sa matuod nga Diyos?—1 Pedro 5:6, 7.

[Hulagway sa panid 29]

Ang Diyos ba maglalang kanato ingong komplikado kaayong mga persona kon siya mismo maoy usa ka dili-persona nga puwersa?