“Ang Kamatuoran Magpagawas Kaninyo”!

ANG maong mga pulong ni Jesu-Kristo, nga mabasa sa Juan 8:32, maoy dili mausab nga kamatuoran. Ang kamatuoran sa Bibliya magpahigawas kanato gikan sa mga patuotuo ug mga kostumbre nga dili makapahimuot sa Diyos ug makadaot kanato. Gipakita sa mosunod kon sa unsang paagi ang mga tawo sa lainlaing dapit gipahigawas sa kamatuoran sa Bibliya gikan sa pipila ka makapabug-at nga kostumbre nga nalangkit sa Pasko.

Ang Kamatuoran sa Bibliya Nagpahigawas Kanila!

Argentina “Ang among pamilya nakalingkawas gikan sa mga problema nga nalangkit sa sobrang pagkaon ug pag-inom ug sa mahal nga mga regalo nga dili namo maarangan,” nag-ingon si Oscar.

Si Mario mibatig dakong kagawasan sa dihang gibutyag kaniya ang iyang gitawag nga “kabakakan  sa Pasko.” “Karon malipay ko sa pagpakita sa akong apresasyon sa uban pinaagi sa pagpanghatag ug regalo sa bisan unsang panahon ug kon ako kanang maarangan.”

Canada “Gusto kaayo kong manghatag ug makadawat ug mga regalo,” misulat si Elfie. “Apan dili ko ganahan nianang pagpanghatag nga pinugos. Sa dihang ang among pamilya wala na magsaulog ug Pasko, nakaginhawa mig luag!”

Si Ulli, nga usa sa mga anak nga babaye ni Elfie, nahinumdom: “Sa dihang mihunong na ang among ginikanan sa pagsaulog ug Pasko, ila ming sorpresahon pinaagig makalingaw nga mga kalihokan o mga gasa sa tibuok tuig, ug ganahan kaayo mi ana! Kon mangutana ang among mga klasmet kon unsay okasyon, kami malipayng moingon, ‘Gayod lang!’ Bisan pa niana, ang pagkinabuhi sumala sa mga sukdanan sa Bibliya dili sayon para sa among ginikanan, kay sila gisupak ug gipit-os sa among mga paryente. Apan sila mibarog nga malig-on. Ang ilang determinasyon nga simbahon si Jehova nga Diyos sa paagi nga dalawaton kaniya dakog epekto kanako.”

Alang kang Silvia, ang paghunong sa pagsaulog ug Pasko nakahatag kaniyag “kahayahay.” “Nalipay kaayo ko! Nahibalo ko nga akong gipahimut-an si Jehova nga Diyos, ug dili kana matupngan bisan sa libolibo ka Pasko.”

Kenya Si Peter misulat: “Niadtong magsaulog pa kog Pasko, makautang kog dagkong kantidad aron ipalit ug mga regalo ug ibayad sa mahalong mga pagkaon. Siyempre, aron makabayad sa utang kinahanglan kong mag-obertaym, maong pirme kong wala sa balay. Nalipay kaayo ko nga nakalingkawas niana!”

“Ako mohatag—ug makadawat—ug mga regalo gikan sa akong pamilya ug mga higala sa bisan unsang panahon,” miingon si Carolyne. “Para nako, ang maong wala damhang mga regalo, nga gihatag nga kinasingkasing, mao ang labing maayo.”

Japan “Ang among mga anak,” matod ni Hiroshi ug Rie, “wala mahulog sa lit-ag nga magdahom ug mga regalo ug unya dili kana pabilhan. Nalipay mi nga ilang nasabtan nga ang paghatag kinahanglang maggikan sa kasingkasing.”

Si Keiko nahinumdom: “Ang among pamilya magsaulog kaniadto ug Pasko. Sa dihang makatulog na ang among anak, kami sa akong bana magbutang ug regalo duol sa iyang higdaanan. Pagkabuntag, amo siyang sultihan: ‘Kay buotan man ka, gihatagan ka ni Santa ug pinaskohan.’ Sa dihang nasayran nako ang kamatuoran bahin sa Pasko ug giestorya kana sa akong anak, siya dili makatuo ug mihilak. Nianang tungora, akong naamgohan nga dili diay maayo ang Pasko. Hinunoa, kini maoy usa ka kabakakan, ug kay ako kanang gitudlo sa akong anak, sama rag ako siyang gilimbongan.”

Pilipinas Si Dave miingon: “Dili nako mahubit ang kalipay nga gihatag ni Jehova kanamo pinaagi sa lunsayng kamatuoran nga makita diha sa Bibliya. Sa dihang ang among pamilya manghatag ug regalo, dili mi magdahom ug balos. Ug ang among paghatag gikan sa kasingkasing.”

Ang mga indibiduwal nga gikutlo maoy pipila lamang sa milyonmilyon nga nakaeksperyensiya nga ang kamatuoran sa Bibliya magpagawas sa mga tawo. Labawng hinungdanon, kon kita magkinabuhi uyon sa maong kamatuoran, mapalipay nato ang kasingkasing sa Diyos. (Proverbio 27:11) Si Jesu-Kristo miingon: “Ang matuod nga mga magsisimba magasimba sa Amahan uban sa espiritu ug sa kamatuoran, kay, sa pagkatinuod, ang Amahan nagapangita sa mga ingon kanila aron magasimba kaniya.” (Juan 4:23) Sa dihang susihon sa Diyos ang imong kasingkasing, makita ba niya ang imong tinguha nga mahibalo sa kamatuoran? Hinaot nga ang tubag mao gayoy oo!

[Hulagway sa panid 9]

Ang mga Kristohanon mohatag tungod sa gugma ug sa bisan unsang panahon