Nagkadaghan ang Nagsaulog sa Pasko—Ngano?

NAGHINAMHINAM ka ba sa Pasko? O nabalaka ka sa pag-abot niana? Milyonmilyong tawo ang maghunahuna: ‘Kinsay akong hatagag pinaskohan? Unsay akong paliton? Makaarang kaha ko ana? Kanus-a kaha nako maimpas ang akong utang?’

Bisan pa sa maong mga kabalaka, ang Pasko popular gihapon kaayo. Gani, kana ginasaulog bisan sa dili-Kristohanong mga nasod. Sa Japan, kadaghanang pamilya karon magsaulog sa Pasko, nga wala mag-isip niana ingong usa ka relihiyosong selebrasyon kondili ingong usa ka masadyaong kapistahan. Sa China, “ang mga hulagway sa pulahong nawong ni Santa Claus gidispley diha sa mga tindahan sa dagkong siyudad,” nag-ingon ang The Wall Street Journal, ug kini midugang: “Ang bag-ong henerasyon sa mga arangan sa China nagsaulog sa Pasko ingong pasangil sa pagpamalit, pagpangaon, ug pagparti.”

Sa daghang dapit sa kalibotan, ang pagsaulog sa Pasko nakapalambo sa ekonomiya. Tinuod kana ilabina sa China, nga sa pagkakaron “tig-eksportar ug daghang plastik nga Christmas tree, naggilakgilak nga mga dekorasyon, Christmas light, ug uban pang dekorasyon sa Pasko,” nag-ingon ang maong Journal.

Ang Muslim nga mga nasod may mga selebrasyon nga susama sa Pasko, hinuon wala nila kana himoa sa Disyembre 25. Sa Ankara, Turkey, ug sa Beirut, Lebanon, ang mga tindahan magdispleyg mga regalo ug mga kahoyng evergreen nga gidekorasyonan samag Christmas tree. Sa Indonesia, ang mga hotel ug mall magpahigayon ug mga selebrasyon, diin ang mga bata mahimong mokaon o magpaletrato uban ni Santa.

Sa Kristiyanong mga nasod, ang Pasko halos dili na relihiyosong selebrasyon ug kini usa na ka dakong negosyo, diin daghang panganunsiyo ang “dayag nga gitumong sa mga bata,” nag-ingon ang Royal Bank Letter sa Canada. Tinuod, ang pipila motambong gihapog misa. Apan, ang kadaghanan mangadto sa mga mall aron mamalit ug regalo, nga mao nay ilang pangunang paagi sa pagsaulog sa Pasko. Unsay hinungdan niini nga kausaban? May kalabotan kaha kini sa sinugdanan sa Pasko? Unsa may sinugdanan niini?

Sa dili pa tubagon ang maong mga pangutana, maayong basahon una nato ang mga asoy sa Bibliya nga mao konoy gibasehan sa pagsaulog sa pagkatawo ni Jesus.

 [Kahon/Hulagway sa panid 4]

ANG GIINGON SA MGA MAGSUSULAT SA EBANGHELYO

Apostol Mateo: “Human matawo si Jesus sa Betlehem sa Judea sa mga adlaw ni Herodes nga hari, tan-awa! ang mga astrologo gikan sa sidlakang mga bahin miabot sa Jerusalem, nga nag-ingon: ‘Hain man ang usa nga natawong hari sa mga Hudiyo? Kay nakita namo ang iyang bituon sa didto pa kami sa sidlakan, ug nanganhi kami aron sa pagyukbo kaniya.’ Sa pagkadungog niini, nasamok si Haring Herodes.” Busa gipangutana ni Herodes ang “pangulong mga saserdote . . . kon asa matawo ang Kristo.” Sa pagkahibalo ni Herodes nga kini maoy “sa Betlehem,” iyang gisugo ang mga astrologo: “Lakaw ug pangitaa ninyo pag-ayo ang bata, ug sa makaplagan na ninyo siya balitai ninyo ako.”

“Sila nanglakaw; ug, tan-awa! ang bituon nga ilang nakita sa didto pa sila sa sidlakan nag-una kanila, hangtod nga mihunong kini sa ibabaw sa dapit nga nahimutangan sa bata. . . . Sa misulod sila sa balay nakita nila ang bata uban kang Maria nga inahan niini.” Human mohatag ug mga gasa para kang Jesus, “sila gihatagan sa Diyos ug pasidaan diha sa usa ka damgo nga dili mobalik kang Herodes, [busa] namauli sila sa ilang dapit pinaagi sa laing agianan.”

“Sa namauli na sila, tan-awa! ang manulonda ni Jehova nagpakita diha sa usa ka damgo kang Jose, nga nag-ingon: ‘Bangon, dad-a ang bata ug ang inahan niini ug kalagiw ngadto sa Ehipto . . . ’ Busa mibangon siya ug sa pagkagabii gidala ang bata ug ang inahan niini . . . Unya si Herodes, sa pagkakita nga gilansisan siya sa mga astrologo, mibatig dakong kaaligutgot, ug siya nagsugo ug nagpapatay sa tanang batang lalaki sa Betlehem ug sa tanang distrito niini, gikan sa duha ka tuig ang panuigon paubos.”—Mateo 2:1-16.

Disipulo Lucas: “Mitungas . . . si Jose gikan sa Galilea, sa siyudad sa Nasaret, ngadto sa Judea, sa siyudad ni David, nga ginganlag Betlehem, . . . aron magparehistro uban ni Maria . . . Samtang didto sila, . . . nanganak siya sa iyang anak nga lalaki, ang panganay, ug iyang giputos siya ug mga bakbak ug gipahigda siya sa pasungan, tungod kay wala nay dapit alang kanila sa lawak nga abotanan.”

“May mga magbalantay usab niadtong dapita nga nagpuyo sa gawas ug nagpadayon sa pagbantay sa ilang mga panon sa kahayopan sa kagabhion. Ug sa kalit ang manulonda ni Jehova mitindog sa duol nila, . . . ug sila nahadlok kaayo. Apan ang manulonda miingon kanila: ‘Ayaw kahadlok, kay, tan-awa! ako nagapahayag kaninyo ug maayong balita sa dakong kalipay nga mabatonan sa tanang tawo, tungod kay natawo kaninyo karong adlawa ang usa ka Manluluwas, nga mao ang Kristo nga Ginoo, sa siyudad ni David.’” Busa ang mga magbalantay “nagdali sa pag-adto ug [ilang] nakaplagan si Maria maingon man si Jose, ug ang masuso nga naghigda sa pasungan.”—Lucas 2:4-16.