Pagpaniid sa Kalibotan

Giaprobahan sa Serbian Ministry of Religious Affairs ang aplikasyon sa mga Saksi ni Jehova nga mahimong legal nga relihiyosong grupo. Sumala sa rekord sa gobyerno, may mga Saksi na sa maong lugar sukad pa niadtong 1930.

Gibanabana nga 95 porsiyento sa gi-download nga mga musika sa tibuok kalibotan niadtong 2009 maoy ilegal.—TIME, U.S.A.

Linog—“Ang Labing Makamatay nga Katalagman”

“Ang linog mao ang labing makamatay nga katalagman sa miaging dekada,” nag-ingon ang United Nations International Strategy for Disaster Reduction, sa Geneva, Switzerland. Sa tanang nangamatay sa katalagman niana nga yugto, halos 60 porsiyento niana maoy tungod sa linog. Kining “kinaiyanhong kalamidad” padayong nagpameligro sa kinabuhi sa mga tawo tungod kay 8 sa 10 ka siyudad nga kinadaghanag populasyon sa tibuok kalibotan nahimutang sa fault line, diin dakog purohan nga maglinog. Sa miaging napulo ka tuig, kapin sa 780,000 ka tawo ang nangamatay tungod sa 3,852 ka katalagman.

Risgo nga Trabaho

“Tanantanan, 110 ka tigbalita (journalist) ang gipamatay niadtong 2009 tungod sa ilang trabaho—ang kinadaghanan sa miaging napulo ka tuig,” matod pa sa International Press Institute, sa Vienna, Austria. Niining milabayng mga tuig, diha sa gubot nga mga dapit sama sa Afghanistan, Iraq, Pakistan, ug Somalia, “ang mga tigbalita tinuyong ginapuntirya,” nag-ingon ang report. Kini miresulta sa mas menos nga pagkobre sa balita ug sa “kakulang sa kahibalo bahin sa . . . komplikadong mga isyu” nianang mga lugara. Sa miaging dekada, ang Iraq mao ang labing delikadong dapit alang sa mga tigbalita, nga gisundan sa Pilipinas, Colombia, Mexico, ug Rusya.

Mius-os ang Pagpangawat Tungod sa Baratong Importasyon

Tungod sa “pagdagsang sa baratong elektronikong mga gamit gikan sa ubang nasod,” ang mga kawatan sa Britain hayan mawad-an nag pangita, matod pa sa report sa Reuters sa London, nga nagkutlo kang James Treadwell, nga maestro sa criminology sa University of Leicester, England. Pananglitan, ang bag-ong mga DVD player barato kaayo mao nga halos ang mga second hand dili na mahalin. Busa, “walay pulos ang pagpangawat niana,” miingon si Treadwell. Apan ang ubos nga presyo wala makawagtang sa krimen. Sa kasukwahi, ang puntirya karon sa mga kawatan mao na ang mga gamit nga mas mahalon ug mas daling ibaligya, ‘sama sa cell phone ug iPod, nga kanunayng gidala-dala sa mga tawo.’ Busa ang mga kawatan naghimo na karon sa laing matang sa krimen, sama sa pagpanghold-ap.