NAHINUMDOM ka ba kang Ram, nga gihisgotan sa unang artikulo niini nga serye? Sama sa daghang tawo sa tibuok kalibotan, si Ram wala mahibalo nga ang hustong pagkaon ug uban pang adlaw-adlawng kalihokan hinungdanon sa maayong panglawas. Siya miasoy: “Ang artikulo sa Pagmata! nga ‘Makapahimsog nga mga Pagkaon nga Maabot Ninyo’ (Mayo 8, 2002) nakatabang nako nga masabtan kon nganong angay kitang mahibalo bahin sa nutrisyon.”

Si Ram misaysay: “Ingong pamilya, among gipaningkamotan nga ipadapat ang among nakat-onan sa maong artikulo. Wala madugay, among namatikdan nga milig-on ang among resistensiya. Sa wala pa mi magbantay sa among gikaon, kanunay ming sip-onon, apan karon talagsa na lang. Nakat-onan sab namo ang madaginoton ug daling paagi sa pagbaton ug hinlong tubig nga imnonon, tungod sa artikulo sa Pagmata! nga ‘Unom ka Paagi sa Pagpanalipod sa Imong Panglawas.’”​—Septiyembre 22, 2003.

“May lain pang artikulo sa Pagmata! nga nakatabang nako ug sa akong pamilya nga makabaton ug mas himsog nga panglawas. Kini nag-ulohang ‘Sabon​—Usa ka “Bakuna nga Ikaw-Ikaw ray Magdapat,”’ sa gula sa Nobyembre 22, 2003. Pagkabasa namo niini, gisunod dayon namo ang mga sugyot. Karon, panagsa na lang maimpeksiyon ang among mata.

“Sa among gipuy-an, ang mga tawo dili magpakabana sa bagang duot sa langaw ug lamok. Apan among nakat-onan gikan sa video nga The Bible​—Its Power in Your Life, * nga angay namong panalipdan ang among kaugalingon batok sa maong mga insekto. Kini nakatabang usab kanamo nga mahuptan ang maayong panglawas.”

Ayawg surender! Bisan unsa mang kausaban ang kinahanglan nimong himoon, magmalamposon ka kon sugdan nimo kini nga inanay ug kon magtakda kag mga tumong nga daling kab-oton. Pananglitan, menosi ang dili kaayo sustansiyadong pagkaon, imbes bug-os nga likayan kana. Sulayi ang pagkatulog nga mas sayo kay sa naandan ug dugangig diyutay ang imong ehersisyo. Mas maayong duna kay ginagmayng himoon kay sa wala ka gayoy himoon. Sagad nagkinahanglag panahon​—mga semana o mga bulan—​una maugmad ang bag-ong maayong batasan. Sa kasamtangan, kon dili pa nimo makita ang mga benepisyo sa imong dugang mga paningkamot, ayawg kaguol. Kon magpadayon ka bisan pa sa mga babag, hayan mabatonan nimo ang mas maayong panglawas.

Niining dili hingpit nga kalibotan, imposible ang pagbaton ug hingpit nga panglawas. Kon masakit ka, lagmit resulta kana sa napanunod nga kahuyangan, dili sa imong pagpasagad. Busa, ayawg tugoti nga ang mga butang maylabot sa panglawas, o ang bisan unsa pang butang, sobrang makapabalaka nimo. “Kinsa kaninyo nga makadugang ug usa ka maniko sa gitas-on sa iyang kinabuhi pinaagi sa pagkabalaka?” si Jesus nangutana. (Lucas 12:25) Hinunoa, likayi lamang ang mga butang nga makapamubo sa kinabuhi ug makadaot niana. Ang pagbuhat niana makatabang kanimo nga matagamtam ang mas maayong panglawas samtang magpaabot sa bag-ong kalibotan sa Diyos sa dihang “walay pumoluyo nga moingon: ‘Ako masakiton.’”​—Isaias 33:24.