Ang Labing Importanteng Pangutana

ANG siyentistang si Francis S. Collins nga nanukiduki bahin sa genes nangutana, “Duna pa bay molabaw ka importante sa pangutanang ‘Aduna bay Diyos?’” Duna siyay punto. Kon walay Diyos, nan walay maila nga hataas nga awtoridad bahin sa moralidad.

Ang rason kon nganong ang ubang tawo nagduhaduha nga dunay Diyos tungod kay daghang siyentista wala magtuo kaniya. Apan dili buot ipasabot nga husto kini nga panglantaw tungod lang kay daghan ang nagtuo niini. Hisgotan kini sa sunod nga artikulo.

Makasubo, ang kadaghanan sa mga relihiyon sa kalibotan nakadugang hinuon sa kalibog tungod kay nagtudlo silag mga doktrina nga sukwahi sa nadiskobrehan sa siyensiya. Ang usa ka pananglitan niini mao ang dili binase sa Bibliya nga pagtulon-an nga gilalang sa Diyos ang kalibotan sulod sa unom ka tag-24-oras nga adlaw, pipila ka libo ka tuig kanhi.

Tungod sa nagkasumpaking mga teoriya ug pilosopiya, daghan ang nawad-ag interes sa pagsusi sa kamatuoran kon duna bay Diyos. Apan may molabaw pa ba ka importante kay sa pagpangitag tubag niining hinungdanong pangutana? Siyempre, wala pay tawo nga nakakita sa Diyos, ni presente kita sa pagsugod sa paglungtad sa uniberso ug sa kinabuhi. Busa motuo man kitag Diyos o dili, ang atong mga panglantaw nagpakita gihapon nga kita dunay pagtuo. Unsang matanga sa pagtuo?

Tinuod nga Pagtuo Gipasukad sa Lig-ong Ebidensiya

Ang pagtuo—bisag gamay lang—maoy hinungdanong bahin sa atong kinabuhi. Kita nanarbaho kay kita naglaom nga suweldohan. Kita manabod kay kita nagtuo nga moturok ang binhi. Kita mosalig sa atong mga higala. Ug kita may pagsalig sa mga balaod nga nagpadagan sa uniberso. Kini maoy pagtuo nga gipasukad sa kahibalo kay kini dunay ebidensiya. Sa susama, ang pagtuo nga dunay Diyos angayng ipasukad sa ebidensiya.

Ang Bibliya sa Hebreohanon 11:1 nag-ingon: “Ang pagtuo mao . . . ang dayag nga pagpasundayag sa mga katinuoran bisan tuod wala makita.” Laing bersiyon nag-ingon: “Ang pagtuo . . . makapakombinsir kanato nga naglungtad ang mga butang nga dili nato makita.” (The New English Bible) Sa pag-ilustrar: Samtang naglakaw ka sa baybayon, ang yuta kalit nga miuyog. Dayon nakita nimo nga kusog nga miatras ang tubig. Nahibalo ka nga ilhanan kini nga dunay moabot nga tsunami. Niining situwasyona, ang linog ug ang miatras nga tubig maoy “dayag nga pagpasundayag” sa usa ka dili pa makita nga hitabo—ang nagsingabot nga dagkong balod. Tungod sa imong pagtuo nga gipasukad sa kahibalo, modagan ka sa habog nga lugar aron maluwas.

Busa ang pagtuo ug Diyos angay usab nga inubanan ug kahibalo, nga pinasukad sa makapakombinsir nga ebidensiya. Pinaagi lang niini nga ang Diyos mahimong usa ka ‘dili makita nga katinuoran’ alang kanimo. Kinahanglan pa bang mahimo kang siyentista aron imong susihon ug timbangtimbangon ang ebidensiya? Ang nakadaog ug Nobel Prize nga si Vladimir Prelog miadmitir nga bisan “ang mga nakadaog ug Nobel Prize sama ra sa ubang mga tawo nga wala poy alamag bahin sa Diyos, relihiyon, ug kahimtang sa mga patay.”

Kon ikaw sinsero ug giuhaw sa kamatuoran, imong susihon ang ebidensiya nga walay pagpihig ug dawaton kon unsay gipadayag niini. Unsang ebidensiya ang angayng susihon?

[Hulagway sa panid 3]

Ang mag-uuma may pagtuo nga ang mga binhi moturok ug motubo