Ilimnong Naghawas sa Mexico

● Sa dihang ang Katsilang mga manunulong nangabot sa Mexico sa unang bahin sa ika-16 nga siglo, nakatilaw silag ilimnon nga gitawag ug pulque, nga gipaaslom nga duga sa maguey. Ang pulque samag serbesa nga diyutay rag alkohol. Kay kini daghag protina, carbohydrates, bitamina, ug minerales, nahimo kining food supplement sa daghang lugar.

Kay ang mga Katsila naanad man nga dunay alkoholikong ilimnon matag kaon, sila nagsugod sa pagproseso sa duga sa maguey sa paghimog isog nga ilimnon nga gitawag ug mescal. Gikan niini namugna ang tequila. Karon daghan na kaayog distileriya sa tequila sa Mexico, ug sila makahimog kapin sa 189 ka milyong litro sa usa ka tuig, nga 40 porsiyento niini gieksportar.

Ang plantasyon sa blue agave o maguey nga dugaon ug unod nga pamilya sa tanom nga lily, gipananom diha sa uga nga kabukiran sa kasadpan sa Mexico, ilabina sa estado sa Jalisco duol sa lungsod sa Tequila, nga maoy gingalan sa ilimnon. * Abtan pag 12 ka tuig ayha mogulang ang maguey, nga magsuhop ug daghang minerales samtang magtubo. Sa dihang kini anihon, ang tunokong dahon abison, nga mabilin ang punoan nga morag pinya. Sa aberids, kini motimbang ug 50 kilos ug dugaon kaayo. Nagkinahanglag 7 ka kilong maguey sa paghimog usa ka litrong tequila.

Ganahang moinom ang mga Mexicano ug tequila nga walay sagol, inubanan ug asin ug hiniwang lemon. Ang mga tawo sa ubang nasod mas pamilyar sa margarita, nga ilimnong tequila nga sagolan ug duga sa lemon, orange-flavored liqueur, ug dinugmok nga yelo nga idalit diha sa kopa nga ang baba gitunlob sa pinong asin. * Ang tequila gieksportar ngadto sa mga 90 ka nasod, busa kini tukmang naghawas sa Mexico.

[Mga footnote]