Ang Hunahuna sa Bibliya

Kon Unsaon Pagpalampos sa Kaminyoon

“Siya nga naglalang kanila sukad sa sinugdan nagbuhat kanila nga lalaki ug babaye ug nag-ingon, ‘Tungod niini ang usa ka lalaki mobiya sa iyang amahan ug sa iyang inahan ug moipon sa iyang asawa, ug ang duha mahimong usa ka unod’ . . . Busa, kon unsay gihiusa pagyugo sa Diyos ayaw ipabulag ni bisan kinsang tawo.”—Jesu-Kristo, sumala sa Mateo 19:4-6.

NIINING atong kalibotan nga nagakausab ang mga sukdanan, ang mga tawo wala na maghatag ug importansiya sa kaminyoon. Daghang magtiayon magbulag o magdiborsiyo dihang mawala na ang ilang kaibog o usahay magbulag bisan sa gamay lang nga problema. Ang nakapait kay ang mga anak maoy makaluluoy.

Ang mga nagtuon ug Bibliya dili matingala niini. Bahin sa “kataposang mga adlaw,” nga atong gikinabuhian karon, ang Bibliya nagtagna nga ang mga tawo walay mga hiyas nga makapahiusa sa pamilya—sama sa pagkamaunongon, tiunayng gugma, ug kinaiyanhong pagbati. (2 Timoteo 3:1-5) Kining pagkadaot sa mga sukdanan ug sa epekto niini sa pamilya nakapabalaka ba kanimo? Gihatagan ba nimog importansiya ang kaminyoon?

Kon mao, makapalipay kanimo ang epektibong tambag sa Bibliya nga nakatabang sa daghang magtiayon. Pananglitan, tagda ang lima lang ka prinsipyo nga makatabang sa pagpalampos sa kaminyoon. *

Lima ka Yawi sa Pagpalampos sa Kaminyoon

(1) Isipa ang kaminyoon ingong sagradong panaghiusa. Sumala sa mga pulong ni Jesus nga mabasa diha sa wala, siya ug ang Maglalalang, si Jehova nga Diyos, naglantaw sa kaminyoon ingong sagradong panaghiusa. Kini nga panglantaw gipasiugda diha sa tambag sa Diyos ngadto sa pipila ka tawo sa karaang panahon kinsa nakigdiborsiyo sa ilang asawa aron lang makaminyo ug mas batan-ong mga babaye. “Wala ka motuman sa imong saad ngadto sa babayeng imong gipangasawa sa batan-on ka pa,” miingon ang Diyos. “Siya imong kapikas, ug wala ka motuman sa imong saad kaniya, bisag nanaad ka  sa Diyos nga dili nimo siya budhian.” Dayon gipahayag ni Jehova kining puwersadong mga pulong: “Dulumtanan kanako kon ang usa kaninyo mohimo niining masakit nga buhat ngadto sa iyang asawa.” (Malaquias 2:14-16, Today’s English Version) Busa dakog pagtamod ang Diyos sa kaminyoon; interesado siya kon giunsa pagtratar sa bana ug asawa ang usag usa.

(2) Magmaresponsable nga bana. Kon dunay importanteng butang nga angayng desisyonan, kinahanglang dunay usa nga mohimog desisyon. Kana nga papel gihatag sa Bibliya ngadto sa bana. “Ang bana maoy ulo sa iyang asawa,” nag-ingon ang Efeso 5:23. Apan dili kini lisensiya sa pagharihari. Kinahanglang hinumdoman sa bana nga siya ug ang iyang asawa “usa ka unod,” ug angay niyang pasidunggan ug konsultahon pod ang asawa kon maghimog mga desisyon. (1 Pedro 3:7) Ang Bibliya nagtambag nga “ang mga bana angay nga maghigugma sa ilang mga asawa sama sa ilang kaugalingong mga lawas.”—Efeso 5:28.

(3) Magmapaluyohon nga asawa. Gihubit sa Bibliya ang asawa ingong “katimbang” sa iyang bana. (Genesis 2:18) Busa ang iyang mga hiyas makaamot sa pagpalampos sa kaminyoon. Ug ingong katimbang, siya dili makigkompetensiya sa iyang bana apan mahigugmaong magpaluyo kaniya, busa ang pamilya magmalinawon. Ang Efeso 5:22 nag-ingon: “Ang mga asawa kinahanglang magpasakop sa ilang mga bana.” Apan komosta kon siya dili mouyon sa desisyon sa iyang bana? Siya mahimong mosulti sa iyang hunahuna sa matinahorong paagi, nga mao poy gusto niyang himoon sa iyang bana diha kaniya.

(4) Magmarealistiko, ug dahoma nga duna gyoy mga problema. Ang kaminyoon masulayan tungod sa sakit nga mga pulong, problema sa kuwarta, grabeng sakit, o problema sa pagpadakog anak. Busa ang Bibliya prangkang nag-ingon nga kadtong magminyo “makaagom ug kasakitan sa ilang unod.” (1 Corinto 7:28) Apan ang mga kasakitan o pagsulay dili angayng magpahuyang sa kaminyoon. Sa pagkatinuod, kon ang duha ka tawo nagkahigugmaay ug may diyosnong kaalam, sila makasulbad sa mga problema nga makabungkag sa kaminyoon. Ikaw ba may kaalam sa pagsagubang sa mga problema sa pamilya? Ang Bibliya nag-ingon: “Kon aduna man kaninyoy nakulangan ug kaalam, magpadayon siya sa pagpangayo sa Diyos, kay siya nagahatag nga madagayaon ngadto sa tanan ug dili mamuyboy.”—Santiago 1:5.

(5) Magmaunongon sa usag usa. Sa tanang rason nga makabungkag ug kaminyoon wala nay molabaw pa sa pakighilawas, o pakigrelasyon sa dili kapikas, nga maoy bugtong rason sa pakigdiborsiyo nga gitugotan sa Diyos. (Mateo 19:9) Ang Bibliya nag-ingon: “Himoa nga dungganon ang kaminyoon taliwala sa tanan, ug ang higdaanan sa kaminyoon nga dili mahugawan, kay hukman sa Diyos ang mga makihilawason ug ang mga mananapaw.” (Hebreohanon 13:4) Unsay makatabang sa mga magtiayon nga dili matental sa pagpakigrelasyon sa dili nila kapikas? Ang Bibliya nagtambag: “Ihatag sa bana ngadto sa iyang asawa ang nahiangay kaniya; apan buhaton usab sa asawa ang sama ngadto sa iyang bana.”—1 Corinto 7:3, 4.

Tingali maghunahuna ang uban nga kining lima ka punto kinaraan o dili realistiko. Apan ang pagpadapat niini maayog resulta. Sa pagkatinuod, kini susama sa mga resulta nga maangkon sa tawo nga nagpagiya sa Diyos sa tanang bahin sa iyang kinabuhi: “Siya mahisama gayod sa usa ka kahoy nga natanom sa daplin sa kasapaan sa tubig, nga mobunga sa iyang panahon ug ang iyang mga dahon dili malaya, ug ang tanan nga ginabuhat niya magmalamposon.” (Salmo 1:2, 3) Ang pulong “tanan” niining tekstoha naglakip sa pagpalampos sa kaminyoon.

[Footnote]

NAKAPAMALANDONG KA BA?

● Unsay panglantaw sa Diyos sa diborsiyo?—Malaquias 2:14-16.

● Sa unsang paagi angayng tratahon sa bana ang iyang asawa?—Efeso 5:23, 28.

● Kang kinsang kaalam ang makapalampos sa kaminyoon?—Salmo 1:2, 3.