Pagpaniid sa Kalibotan

Sa Germany, 7 sa 10 ka masuso duna nay impormasyon bahin kanila diha sa Internet. Ang mga ginikanan naghimog profile ug e-mail address sa mga masuso o nagbutang ug mga letrato o hulagway nga kuha sa ultrasound. Apan ang mga eksperto nagpasidaan nga ang mga letrato diha sa Internet mahimong makadaot sa pribasiya sa masuso sa iyang tibuok kinabuhi.—BABY UND FAMILIE, GERMANY.

Sumala sa rekord sa gobyerno, 14,000 ka babaye sa Russia ang nangamatay tuigtuig tungod sa kapintasan diha sa pamilya.—RIA NOVOSTI, RUSSIA.

Ang niyebe nga mangahulog sa Mount Everest sa gihabogong 6,858 metros ngadto sa 7,752 metros dunay arsenic ug cadmium nga giisip nga makadaot sa tubig ilimnon. Ang polusyon nga gipahinabo sa tawo gituohang maoy hinungdan.—SOIL SURVEY HORIZONS, U.S.A.

Ang bugtong kompaniya nga awtorisado sa pag-imprentag Bibliya sa China dili pa dugay nakaimprenta sa ika-80 ka milyong kopya niini. Ang kompaniya nag-imprentag 1 ka milyong Bibliya matag bulan—25 porsiyento sa tanang ginaimprenta sa tibuok kalibotan.—XINHUA, CHINA.

“Kapig 10 porsiyento sa mga hamtong nga Amerikano (10.1 porsiyento) miundang sa pagka-Katoliko bisag gipadako nga Katoliko.”—NATIONAL CATHOLIC REPORTER, U.S.A.

Mga Kalamidad sa 2010

Ang usa ka dakong kompaniya sa insyurans nakarekord ug 950 ka kalamidad sa kalibotan sa 2010, nga milabaw sa tinuig nga aberids nga 785 ka kalamidad sa miaging dekada. Ang lima sa kinagrabehang kalamidad mao ang mga linog sa Chile, China, ug Haiti; mga baha sa Pakistan; ug grabeng kainit sa Russia, diin libolibo ang nangamatay sa mga epekto sa kainit ug polusyon. Sa amihanang Europe, ang abo sa bolkan sa Iceland wala kaayo makahatag ug kadaot pero halos naparalisar ang biyahe sa mga ayroplano. Sa Australia, ang nahatag nga kadaot sa duha ka grabeng pag-ulan ug dagkong yelo mikabat ug kapin sa $2 bilyones (U.S.). “Ang total nga kadaot sa ekonomiya, apil niadtong walay insyurans, mikabat ug $130 bilyones kon itandi sa $50 bilyones sa miaging tuig,” matod sa The Telegraph sa London.

Sama ba Nato ang mga Neanderthal?

“Ang dugay na kaayong gituohan nga ang mga Neanderthal mas ubos sa Homo sapiens, anam-anam nga nagkausab kay ang mahimo sa tawo, mahimo usab nila,” miingon ang New Scientist. Nadiskobrehan dili pa dugay nga ang mga Neanderthal makatukod ug mga puy-anan ug abohan, makahaling ug kalayo, magsul-ob ug sinina, magluto, maghimog mga hiramenta, ug nakaimbentog papilit alang sa uhas sa ilang mga bangkaw. Dunay ebidensiya usab nga sila nag-atiman ug mga masakiton, nagsul-ob ug simbolikong mga dayandayan, ug naglubong sa ilang mga patay. Sumala pa kang Erik Trinkaus, propesor sa physical anthropology sa Washington University, sa St. Louis, Missouri, U.S.A., “ang mga Neanderthal mga tawo pod, ug tingali sama usab sila kanato ug panghunahuna.”