Dili pa Ulahi nga Mahimong Higala sa Diyos

Sumala sa giasoy ni Olavi J. Mattila

“Nahibalo ka ba nga mahimo kang makabaton ug tukmang kahibalo bahin sa Maglalalang?” Gipangutana ko niana sa usa ka Saksi ni Jehova ug nakapamalandong ko niana. Niadtong higayona, kapin na kog 80 anyos ug daghag kailang prominenteng mga tawo ug mga lider sa politika. Apan nianang edara, makabaton ba gyod kog tukmang kahibalo bahin sa Diyos ug mahimong iyang higala?

NATAWO ako sa Oktubre 1918 sa Hyvinkää, Finland. Sa bata pa ko, motabang ko sa mga buluhaton sa uma. Ang among pamilya namuhig baka, kabayo, manok, ug gangsa. Nakakat-on ko sa pagkugig trabaho ug magarbohon sa akong ginahimo.

Sa nagdako ako, gidasig ko sa akong ginikanan sa pagkuhag karera. Busa mibiya ako sa balay aron sa pagtungha sa kolehiyo. Nahimo akong atleta sa eskuylahan ug nakaila nako ang tsirman sa Finnish Athletic Association, nga si Urho Kekkonen. Wala ko magdahom nga si Mr. Kekkonen mahimong prime minister sa Finland ug sa ulahi mahimong presidente sa nasod, mga posisyon nga iyang gihuptan sa mga 30 ka tuig. Dugang pa, wala usab ako magdahom nga mahimo siyang dakong impluwensiya sa akong kinabuhi.

Pagkaprominente ug Taas nga Posisyon

Niadtong 1939, ang Finland ug Soviet Union naggubatay. Sa Nobyembre nianang tuiga, gitawag ko sa pagsundalo. Sa primero akoy tigbansay sa reserbang mga sundalo ug dayon nahimong komandante sa grupo sa mga tigmasinggan. Ang gubat gisangka didto sa Karelia, usa ka rehiyon duol sa utlanan sa Finland ug Soviet Union. Sa ting-init sa 1941, samtang nakigsangka duol sa lungsod sa Vyborg, naigo ko sa piraso sa mga metal gikan sa mibuto nga bomba ug gidala ako sa ospital sa militar. Kay samdan man, wala na ko gipadala sa panggubatan.

Sa Septiyembre 1944, dili na ko sundalo, ug mibalik kog eskuyla sa kolehiyo. Gipadayon usab nako ang akong pagkaatleta. Tulo ka beses kong nahimong kampeyon sa nasod, duha ka beses ingong relay runner ug kas-a ingong hurdle runner. Nakagraduwar ako sa kursong technology ug economics.

Sa ulahi, si Urho Kekkonen nahimong prominente nga politiko. Sa 1952, sa siya pa ang prime minister, iya akong gihangyo sa pagtrabaho ingong diplomat sa China. Daghang opisyal sa gobyerno ang akong nakaila didto, lakip si Mao Tse-tung, nga maoy lider kaniadto sa China. Pero ang labing importanteng indibiduwal nga akong nakaila sa China mao ang guwapang dalaga nga si Annikki, kinsa nagtrabaho sa Finnish Ministry of Foreign Affairs. Nagpakasal kami sa Nobyembre 1956.

Pagkasunod tuig, gibalhin ako didto sa Finnish embassy sa Argentina. Samtang nagpuyo didto, nakabaton kamig duha ka anak nga lalaki. Sa Enero 1960, namalik kami sa Finland. Dayon,  gipanganak ang among ikatulong anak, nga usa ka babaye.

Taas nga mga Posisyon sa Gobyerno

Bisag dili ko membro sa usa ka partido sa politika, sa Nobyembre 1963, gitudlo ako ni Presidente Kekkonen ingong Minister of Foreign Trade. Paglabayg 12 ka tuig, nagsilbi ko sa unom ka gabinete, kaduha nagsilbi ingong Minister of Foreign Affairs. Niadtong panahona nagtuo gyod ko nga ang mga problema sa kalibotan masulbad pinaagi sa katakos sa tawo. Apan sa ngadtongadto, akong namatikdan nga ang tawo hakog ug gahom. Akong nakita ang makadaot nga mga epekto sa pagkawalay pagsalig ug kasina.—Ecclesiastes 8:9.

Siyempre, nakita pod nako nga daghang tawo sinserong naningkamot sa pagpauswag sa mga kahimtang. Apan bisan ang mga lider nga maayog tuyo, pakyas gihapon.

Sa ting-init sa 1975, ang mga lider sa 35 ka estado nag-abot sa Helsinki sa pagtambong sa Conference on Security and Cooperation in Europe. Nianang panahona, ako ang Minister of Foreign Affairs ug suod nga adviser ni Presidente Kekkonen. Akoy nag-organisar sa maong komperensiya, ug nahimamat nako ang tanang lider sa mga nasod nga nanambong.

Niadtong panahona, ang akong katakos ingong diplomat nasulayan. Ang pagtudlo lang kanila kon asa molingkod problema na! Bisan pa niana, sa akong hunahuna ang komperensiya, lakip sa misunod nga mga miting bahin niini, nakahatag ug kauswagan sa tawhanong mga katungod ug sa relasyon tali sa dagkong mga nasod.

Mahunahunaon sa Akong Espirituwal nga Panginahanglan

Sa 1983, miretiro ko ug mibalhin sa France, diin didto nagpuyo ang akong anak nga babaye. Dayon dihay makasubong hitabo. Sa Nobyembre 1994, si Annikki gikanser sa suso. Nianang tuiga, nalangkit kog negosyo nga panglimbong diay. Sa tibuok kong kinabuhi nag-amping gyod ko nga dili madaot ang akong dungog. Apan niining usa lang ka sayop nga desisyon, nadaot ang akong reputasyon.

Sa akong kinabuhi nakahimamat na kog mga Saksi ni Jehova. Bisag interesado ko sa ilang pagduaw ug midawat ug mga magasin, puliki ako ug walay panahon sa espirituwal nga mga butang. Apan sa tuig 2000, nag-atiman ko kang Annikki nga nag-antos sa kanser. Usa ka adlaw sa Septiyembre 2002, dihay miduaw nako nga Saksi ni Jehova. Nagbangon siyag pangutana nga gihisgotan sa sinugdanan niini nga artikulo. Ako namalandong: ‘Posible ba gayong makabaton ug kahibalo bahin sa Diyos? Posible bang mahimong iyang higala?’ Akong gikuha ang akong Bibliya nga giabogan na, ug nagsugod sa pagpakighisgot sa Bibliya uban sa mga Saksi.

 Sa Hunyo 2004, namatay ang akong pinalanggang asawa, ug nag-inusara na lang ko sa kinabuhi. Siyempre, ang akong mga anak nakahatag kanakog kalig-on. Apan may mga pangutana gihapon ko bahin sa kon unsay mahitabo kanato sa dihang kita mamatay. Gipangutana nako kini sa duha ka pari sa Lutheran. Miingon lang sila, “Lisodlisod ning imong mga pangutana da.” Wala ko matagbaw sa ilang tubag. Akong naamgohan nga gigutom ko sa espirituwal nga mga butang.

Samtang nagpadayon ko sa pagtuon sa Bibliya uban sa mga Saksi, miuswag ko sa akong gipangandoy nga tukmang kahibalo. Pananglitan, ang Bibliya nag-ingon nga ang namatay walay panimuot, nga mora lag natulog, ug nga ang patay dunay paglaom nga mabuhi pag-usab ingong tawo dinhi sa yuta. (Juan 11:25) Kini nakahatag nakog paglaom ug dakong kahupayan.

Dayon akong gibasa ang tibuok Bibliya. Usa ka teksto nga nakapainteres nako mao ang Miqueas 6:8, nga nag-ingon: “Unsa ba ang gipangayo ni Jehova kanimo kondili ang pagbuhat sa hustisya ug ang paghigugma sa kalulot ug ang paglakaw nga makasaranganon uban sa imong Diyos?” Ginindotan kaayo ko sa kaalam ug ka simple nianang mga pulonga. Gipakita usab niini kon unsa ka mahigugmaon ug makataronganon si Jehova nga Diyos.

Paglaom sa Umaabot

Sa nakakat-on ako bahin sa Diyos, ang akong pagtuo ug pagsalig kaniya milambo. Nakaugmad ako ug tinuod nga panaghigalaay uban sa akong Maglalalang! Ginindotan kaayo ko sa iyang pulong diha sa Isaias 55:11: “Maingon niana ang akong pulong nga mogula gikan sa akong baba. Kini dili mobalik kanako nga walay sangpotanan, apan kini tinong magbuhat nianang akong gikahimut-an, ug kini tinong magpalampos sa butang nga tungod niana kini akong gipadala.” Sa pagkatinuod, gituman gayod ni Jehova ang iyang mga saad, ug tumanon usab niya kini sa umaabot. Iyang himoon ang wala mahimo sa tawhanong mga gobyerno ug sa ilang daghang politikanhong mga komperensiya. Pananglitan, ang Salmo 46:9 nag-ingon: “Gipahunong niya ang mga gubat hangtod sa kinatumyan sa yuta.”

Nakabenepisyo kaayo ko sa pagtambong sa mga tigom sa mga Saksi ni Jehova. Didto nakita nako ang tinuod nga Kristohanong gugma nga maoy ilhanan sa matuod nga mga sumusunod ni Jesus. (Juan 13:35) Kini nga gugma makawalag nasyonalismo ug dili makita diha sa kalibotan sa politika ug komersiyo.

Labing Hamiling Pribilehiyo

Karon kapig 90 anyos na ko, ug mapasalamaton kaayo nga nahimong Saksi ni Jehova. Ang akong espirituwal nga panginahanglan natagan-an. Mapasalamaton ako nga nakakat-on sa katuyoan sa kinabuhi ug sa kamatuoran bahin sa Diyos.

Malipayon ko nga bisan niining akong edad, aktibo ako sa pagpakigbahin sa Kristohanong mga kalihokan. Bisag nakaila akog daghang tag-as ug ranggong mga tawo ug nakabaton ug dagkong mga posisyon, walay ikatandi sa pribilehiyo sa pagkahibalo bahin sa Maglalalang, si Jehova nga Diyos, ug sa pagkahimong iyang higala. Mapasalamaton kaayo ko kaniya, ug buot kong dayegon siya niini nga kahigayonan sa pagkahimong usa sa iyang “mga isigkamagbubuhat.” (1 Corinto 3:9) Dili pa gyod ulahi nga mahimong higala sa Maglalalang, si Jehova nga Diyos!

[Hulagway sa panid 25]

Uban ni Presidente Kekkonen ug Presidente Ford sa Amerika sa 1975 nga komperensiya sa Helsinki

[Hulagway sa panid 25]

Uban ni Presidente Kekkonen ug sa lider sa Soviet nga si Brezhnev

[Hulagway sa panid 26]

Nakigbahin sa Kristohanong mga kalihokan

[Picture Credit Lines sa panid 25]

Lower left: Ensio Ilmonen/Lehtikuva; lower right: Esa Pyysalo/Lehtikuva