NAGKADAGHAN ang dili na supak sa homoseksuwalidad diha sa daghang kayutaan. Usa ka grupo sa usa ka relihiyon sa United States nangawhag sa pag-interpretar pag-usab sa giingon sa Bibliya bahin sa homoseksuwalidad sumala sa “panghunahuna sa mga tawo karon.” Usa ka pastor sa Brazil nga bag-o pang nagpakasal sa usa ka lalaki interesado sab sa “pagsusi pag-usab sa Bibliya,” aron madawat ang panglantaw karon sa iyang relihiyon bahin sa homoseksuwalidad.

Sa laing bahin, kadtong supak sa homoseksuwal nga mga buhat sagad isipong mapihigon sa mga homoseksuwal. Unsa gayoy giingon sa Bibliya bahin sa homoseksuwalidad?

Unsay Giingon sa Bibliya?

Ang Bibliya wala magtudlog pagpihigpihig ngadto sa mga tawo. Apan ang hunahuna niini bahin sa homoseksuwal nga mga buhat klaro kaayo.

“Dili ka modulog sa lalaki sama sa imong pagdulog sa babaye. Usa kini ka dulumtanang butang.”—Levitico 18:22.

Ingong bahin sa Balaod ni Moises, kini nga pagdili maoy usa sa daghang balaod nga gihatag ngadto lang sa nasod sa Israel. Bisan pa niana, gipadayag sa balaod ang hunahuna sa Diyos bahin sa homoseksuwal nga mga buhat, sa mga Hudiyo man o dili Hudiyo, sa dihang kini miingon: “Usa kini ka dulumtanang butang.” Ang mga nasod nga kanait sa Israel naghimog homoseksuwal nga mga buhat, pag-unayay sa mga paryente, pagpanapaw, ug ubang mga buhat nga gidili sa Balaod. Busa kadtong mga nasora giisip sa Diyos nga mahugaw. (Levitico 18:24, 25) Ang hunahuna ba sa Bibliya nausab sa Kristohanong panahon? Tagda kini nga teksto:

“Ang Diyos nagtugyan kanila sa makauulawng seksuwal nga mga gana, kay ang ilang mga babaye nag-usab sa ilang kinaiyanhong gamit ngadto nianang sukwahi sa kinaiyahan; ug sa ingon usab bisan ang mga lalaki mibiya sa kinaiyanhong paggamit sa babaye ug nanag-uros-uros sa ilang kaulag sa usag usa, mga lalaki sa mga lalaki, nga nagabuhat sa kon unsay malaw-ay.”—Roma 1:26, 27.

Nganong nag-ingon ang Bibliya nga ang homoseksuwal nga mga buhat malaw-ay ug dili normal? Kay nalangkit niini ang seksuwal nga mga buhat nga sukwahi sa katuyoan sa atong Maglalalang. Ang pagpakigsekso sa parehas ug sekso dili makapatunghag anak. Kini nga mga buhat gitandi sa Bibliya sa pagpakigsekso sa rebelyosong mga manulonda, nga gitawag sa ulahi nga mga demonyo, uban sa mga babaye sa wala pa ang Lunop sa adlaw ni Noe. (Genesis 6:4; 19:4, 5; Judas 6, 7) Gilantaw sa Diyos kining mga buhata ingong dili normal.

Mahimo Bang Ipakamatarong ang Homoseksuwalidad?

Ang uban tingali mangutana, ‘Ang genes ba, palibot, o mapait nga kasinatian, sama sa seksuwal nga pag-abuso, mahimong gamitong rason aron magpadaog ang usa sa homoseksuwal nga tendensiya?’ Dili gayod. Tagda kini nga pananglitan: Ang usa ka tawo tingali dunay tendensiya sa pagkapalainom, nga sumala pa sa ubang mga siyentista iyang napanunod, o siya nagdako sa pamilya nga palainom. Sa pagkatinuod, daghan ang makasabot sa tawong ingon niini. Bisan pa niana, dili gayod siya angayng dasigon sa pagpadayon sa pag-inom-inom o sa paghunong sa iyang pagpakigbisog tungod lang kay natawo siya nga dunay tendensiya niana o nagdako niana nga palibot.

Sa susama, bisag wala hukmi sa Bibliya kadtong may homoseksuwal nga tendensiya, wala gayod kini magkonsentir niadtong nagpadaog  niini, napanunod man kini o tungod sa ubang hinungdan. (Roma 7:21-25; 1 Corinto 9:27) Hinunoa, ang Bibliya dunay praktikal nga giya ug pagdasig aron ang indibiduwal matabangan sa pagdaog batok sa homoseksuwal nga mga buhat.

Unsay Kabubut-on sa Diyos Niadtong May Homoseksuwal nga Tendensiya?

Ang Bibliya nagpasalig kanato nga kabubut-on sa Diyos nga ang “tanang matang sa mga tawo mangaluwas unta ug makadangat sa tukmang kahibalo sa kamatuoran.” (1 Timoteo 2:4) Bisan tuod dulumtanan sa Bibliya ang homoseksuwal nga mga buhat, kini wala magdasig nga dumtan ang mga homoseksuwal.

Ang hunahuna sa Diyos bahin sa homoseksuwalidad wala mausab. Sa 1 Corinto 6:9, 10, tin-aw kaayo ang giingon sa Bibliya nga ang “mga lalaking makigdulog sa mga lalaki” maoy lakip niadtong “dili makapanunod sa gingharian sa Diyos.” Apan ang bersikulo 11 midugang niining makapahupayng mensahe: “Ug gani ingon niana ang pipila kaninyo kaniadto. Apan kamo nahugasan na, apan kamo nabalaan na, apan kamo napahayag na nga matarong sa ngalan sa atong Ginoong Jesu-Kristo ug sa espiritu sa atong Diyos.”

Tin-aw nga kadtong tim-os nga nagtinguha sa pagsimba sa Diyos sumala sa iyang paagi kinasingkasing nga gidawat diha sa Kristohanong kongregasyon sa unang siglo. Sa susama, dawaton usab karon ang tanang matinud-anog kasingkasing nga nagtinguhang makabaton sa pag-uyon sa Diyos—dili pinaagi sa pag-interpretar pag-usab sa Bibliya—kondili pinaagi sa pagkinabuhi nga uyon sa mga prinsipyo niini.

NAKAPAMALANDONG KA BA?

● Unsay hunahuna sa Bibliya bahin sa homoseksuwal nga mga buhat?—Roma 1:26, 27.

● Mapihigon ba ang Bibliya sa mga tawong dunay homoseksuwal nga tendensiya?—1 Timoteo 2:4.

● Posible bang malikayan ang homoseksuwal nga mga buhat?—1 Corinto 6:9-11.

[Hulagway sa panid 29]

Angay bang interpretahon pag-usab ang hunahuna sa Diyos bahin sa homoseksuwalidad?