Kon Naghunahuna Ka sa Pagtapos sa Imong Kinabuhi
Kon Naghunahuna Ka sa Pagtapos sa Imong Kinabuhi
SA Amerika lang daan, tinagpulo ka libo tuigtuig ang misulay sa pagtapos sa ilang kinabuhi. Ang Bibliya naghatag ug rason kon nganong daghan ang nakahunahuna niini. Kini nag-ingon nga kita nagkinabuhi sa “makuyaw nga mga panahong lisod sagubangon.” Ang mga tawo nagbaguod sa mga problema. (2 Timoteo 3:1; Ecclesiastes 7:7) Kon ang tawo dili na makaagwanta sa mga problema, tingali maghunahuna siya sa paghikog aron matapos na ang tanan. Unsay imong himoon kon ikaw naghunahuna niini?
Dili Lang Ikaw ang Nakahunahuna Niini!
Kon sa imong tan-aw wala ka nay paglaom, hinumdomi nga wala ka mag-inusara ug halos tanan karon dunay problema. Ang Bibliya nag-ingon: “Ang tibuok kalalangan duyog nga nagpadayon sa pag-agulo ug anaa sa kasakitan hangtod karon.” (Roma 8:22) Bisan pag sa imong hunahuna morag dili gyod masulbad ang imong problema, sagad moarang-arang ra ang kahimtang paglabay sa panahon. Sa pagkakaron, unsay makatabang?
Isulti ang imong gibati ngadto sa hamtong ug kasaligang higala. Ang Bibliya nag-ingon: “Ang tinuod nga higala mahigugma sa tanang panahon, ug maoy usa ka igsoon nga natawo alang sa panahon sa kasakit.” (Proverbio 17:17) Ang Bibliya nag-asoy nga sa panahong dunay problema ang matarong nga si Job, iyang gisulti sa uban ang iyang gibati. Sa dihang siya mibatig ‘kasilag sa iyang kinabuhi,’ siya miingon: “Ipahungaw ko ang akong kabalaka bahin sa akong kaugalingon. Ako mosulti sa kapait sa akong kalag!” (Job 10:1) Ang pagsulti sa imong gibati ngadto sa uban makahupay sa imong grabeng kaguol, ug tingali makausab pa sa imong panglantaw bahin sa imong mga problema. *
Ibubo ang imong kasingkasing ngadto sa Diyos diha sa pag-ampo. Ang uban nagtuo nga ang pag-ampo maoy pangpalinaw lang sa hunahuna, apan lahi ang giingon sa Bibliya. Ang Salmo 65:2 nagtawag kang Jehova nga Diyos nga “Tigpatalinghog sa pag-ampo,” ug ang 1 Pedro 5:7 nag-ingon: ‘Siya may kahingawa kanimo.’ Kanunayng gipasiugda sa Bibliya nga hinungdanon kaayo ang pagsalig sa Diyos. Pananglitan:
“Salig kang Jehova sa bug-os mong kasingkasing ug ayaw pagsalig sa kaugalingon mong pagsabot. Sa tanan mong mga dalan tagda siya, ug siya magatul-id sa imong mga alagianan.”—PROVERBIO 3:5, 6.
“Pagatumanon niya ang tinguha niadtong nahadlok kaniya [Jehova], ug ang ilang pagtuaw alang sa tabang iyang pagadunggon, ug siya magaluwas kanila.”—SALMO 145:19.
“Kini ang pagsalig nga atong nabatonan diha kaniya, nga, bisan unsay atong pangayoon sumala sa iyang kabubut-on, siya magpatalinghog kanato.”—1 JUAN 5:14.
“Si Jehova halayo sa mga daotan, apan siya nagapamati sa pag-ampo sa mga matarong.”—PROVERBIO 15:29.
Kon imong isulti sa Diyos ang imong mga problema, siya motabang. May maayong katarongan nga ang Bibliya nagdasig kanimo sa ‘pagsalig kaniya sa tanang panahon . . . Sa atubangan niya ibubo ang imong kasingkasing.’—Salmo 62:8.
Kon Labaw pa ang Gikinahanglan
Ang mga panukiduki nagpakita nga ang kadaghanang tawo nga naghikog nakaagi nag depresyon. * Nagpakita lang kini nga tingali kinahanglang magpakonsultag doktor. Ang doktor tingali moresetag tambal o kaha morekomendar ug mga pagkaon nga angayng likayan. Sa ubang mga kahimtang, ang usa ka matang sa ehersisyo maoy epektibong tabang sa pagpaayo. Ang pag-atiman sa espesyalistang mga doktor nakatabang sa daghan. *
Ang Bibliya dunay daghang impormasyon nga makatabang ug makahatag kanimog paglaom. Pananglitan, diha sa Pinadayag 21:4, ang Bibliya nag-ingon bahin kang Jehova nga Diyos: “Iyang pagapahiran ang tanang luha gikan sa ilang mga mata, ug ang kamatayon mawala na, ni may pagbangotan ni pagtiyabaw ni may kasakit pa. Ang unang mga butang nangagi na.” Kini maoy saad sa Diyos, ug ang pagpamalandong niini makahupay.
Gisangyaw sa mga Saksi ni Jehova kining pinasukad sa Bibliya nga paglaom ngadto sa milyonmilyong mga tawo sa tibuok kalibotan. Busa, daghan ang nakabaton ug matuod nga paglaom niining malisod nga panahon. Alang sa dugang impormasyon, kontaka ang mga Saksi ni Jehova sa imong dapit, pinaagi sa pag-adto sa ilang Kingdom Hall, o sa pagsulat ngadto sa adres diha sa panid 5 niining magasina. Mahimo usab nimong tan-awon ang among Web site nga www.watchtower.org.
[Mga footnote]
^ par. 5 Ang uban natabangan pinaagi sa pagtawag sa mental-health center.
^ par. 13 Alang sa dugang impormasyon bahin sa depresyon, tan-awa ang Hulyo 2009 nga gula sa Pagmata! sa panid 3-9.
^ par. 13 Ang Pagmata! wala magsugyot ug bisan unsang partikular nga paagi sa pagtambal. Angayng timbangtimbangon ug maayo sa matag indibiduwal ang iyang kapilian sa dili pa mohimog desisyon.
[Kahon sa panid 16]
TABANG GIKAN SA BIBLIYA
● “Ayaw kabalaka sa bisan unsang butang, apan sa tanang butang pinaagi sa pag-ampo ug pangamuyo uban ang pagpasalamat ipahibalo ang inyong mga pangaliya sa Diyos; ug ang kalinaw sa Diyos nga labaw sa tanang panghunahuna magbantay sa inyong mga kasingkasing ug sa inyong mga gahom sa pangisip pinaagi kang Kristo Jesus.”—Filipos 4:6, 7.
● “Nagpakisayod ako kang Jehova, ug gitubag niya ako, ug giluwas niya ako gikan sa tanan kong gikalisangan.”—Salmo 34:4.
● “Si Jehova haduol niadtong mga dugmok ug kasingkasing; ug siya magaluwas niadtong mga nahugno sa espiritu.”—Salmo 34:18.
● “Siya nagaayo sa mga may gun-ob nga kasingkasing, ug nagabugkos sa ilang masakit nga mga bahin.”—Salmo 147:3.
[Kahon sa sa panid 17, 18]
KON IKAW NAGHUNAHUNA SA PAGHIKOG . . .
Isulti ang imong gibati ngadto sa kasaligang higala
Ibubo ang imong kasingkasing ngadto sa Diyos diha sa pag-ampo
Pakonsultag doktor
[Kahon/Hulagway sa panid 18]
ALANG SA MGA HIGALA UG PAMILYA
Ang mga membro sa pamilya ug suod nga mga higala sagad maoy unang makamatikod nga ang naguol pag-ayong indibiduwal naghunahuna sa paghikog. Ang paglihok dayon makaluwas ug kinabuhi! Ipakita nga ikaw nakasabot sa iyang gibati. Tuohi nga duna siyay problema. Ang Bibliya nag-ingon: “Hupaya ang magul-anong mga kalag.” (1 Tesalonica 5:14) Awhaga ang nagmagul-anon sa pagpangayog tabang, ug paneguroa nga siya matabangan.
