Pagpaniid sa Kalibotan

Sumala sa kapin sa 76 porsiyento sa mga hingkod nga gisurbi sa Germany, ang pagbirigbirig “dili daotan” ug “wala kini magpasabot nga ang nagbirigbirig seryosong makigrelasyon.” Halos katunga sa gisurbi miingon nga okey lang mamirigbirig ang mga minyo sa dili nila kaila.—APOTHEKEN UMSCHAU, GERMANY.

Usa ka surbi sa Russia nagpakita nga 48 porsiyento sa mga tawo didto nagtuo nga ang mga pag-atake sa terorista “madahom” ug “bahin na sa kinabuhi.”—KOMMERSANT, RUSSIA.

Aron dili masakpan sa mga polis sa utlanan, ang mga tigpayuhot ug droga sa Mexico nakaimbentog paagi sa pagpayuhot ug droga, sama nianang gigamit sa mga sundalo sa karaang panahon—usa ka “dakong iglambuyog” nga gitaod diha sa usa ka treyler ug dunay pangpalantig nga goma, “sa paglambuyog sa mga droga” saylo sa koral sa utlanan sa Amerika.—REUTERS NEWS SERVICE, U.S.A.

“Duha sa matag lima ka pagsabak” sa New York City gipakuha. Ang gidaghanon “halos walay kausaban sa milabayng kapin sa napulo ka tuig.”—THE NEW YORK TIMES, U.S.A.

Ang mga pest controller nahibulong dihang gitawag sila sa pagdakop sa irong ihalas diha sa ika-72 nga andana sa usa ka bilding nga gikamulog tukod sa siyudad sa London. Ang iro, nga “nabuhi sa mga salin nga pagkaon sa mga trabahante,” gibuhian. —THE TELEGRAPH, LONDON.

Mga Pari sa Simbahang Ortodokso sa Russia Makakandidato

“Giaprobahan sa Konsilyo sa mga Obispo sa Simbahang Ortodokso sa Russia ang mga pari niini sa pagkandidato sa politika alang sa linaing mga kahimtang aron ang simbahan mapanalipdan batok niadtong nangaghat ug panagbahinbahin ug batok sa ubang mga problema,” nagtaho ang RIA Novosti. Sumala sa giingon sa mga obispo, ang pari makakandidato lang “aron sa pagsanta niadtong nangaghat ug panagbahinbahin ug batok sa ubang mga pundok sa relihiyon nga mogamit ug posisyon sa politika sa pagkontra sa Simbahang Ortodokso.”

Bag-ong mga Problema Labot sa Balaod

Ang pamaagi sa medisina karon para sa mga magtiayong dili makapanganak, nga giisip kaniadto nga imposibleng mahitabo, nakahatag ug bag-ong mga problema labot sa balaod. “Tuigtuig nagkadaghang bata ang mahimugso gikan sa binhi sa lalaki o napertilisar nga binhi, nga gitipigan sa daghang bulan o mga tuig,” nag-ingon ang The Wall Street Journal. “Sa ubang mga kaso, ang usa sa ginikanan namatay na, sagad ang amahan.” Sa Amerika, ang ubang ilo makadawat ug binulang sustento gikan sa Social Security. Apan ang mga estado magkalahi ug mga balaod bahin sa paghatag ug sustento sa bata kon ang bata gisabak human nga namatay ang usa sa ginikanan. “Ang teknolohiya wala damha nga nakahatag ug problema labot sa balaod,” matod pa sa abogado sa Minnesota nga si Sonny Miller.