Pagpakigkomunikar!

● Palandonga kining hinanduraw nga situwasyon. Si Sam gianggaan ug tawong karaan. Siya dili gustong mogamit ug bag-ong teknolohiya sa pagpakigkontak sa pamilya ug mga higala. Ang tanan, hasta ang iyang tin-edyer nga mga anak, gustong mogamit ug bag-ong teknolohiya. Gikomedyahan ni Sam ang iyang 16 anyos nga anak nga babaye, “Maayo pa kaniadto kay personal gyod nimong maestorya ang tawo!”

Dayon gipamalandong ni Sam ang iyang tinamdan. Naghunahuna siya sa mga tawo nga dugay na niyang wala makita ug maestorya. Naghunahuna siya sa mga membro sa pamilya nga daw puliki kaayo nga wala na kaayo silay komunikasyon sa usag usa. ‘Kon gusto kong makigkontak kanila,’ miingon si Sam, ‘maayo segurong mosunod na lang ko sa uso.’ Kini maoy iyang kahimtang sa tungatunga sa ika-20ng siglo diha sa usa ka baryo sa Amerika. Siya nga dili gustong mosunod sa uso, sa kataposan nagplano nga magpataod ug telepono.

Handurawa kining situwasyona sa tuig 2012. Ang apo ni Sam nga si Nathan bag-o pang nakahuman ug estorya diha sa telepono kang Roberto ug Angela, nga iyang suod nga mga higala nga namalhin sa laing nasod. ‘Napulo na diay to ka tuig!’ miingon si Nathan, nga nahibulong nga dali kaayong milabay ang panahon.

Kaniadto, si Nathan kontento na sa panalagsang tawag sa telepono gikan sa mga membro sa pamilya ug mga higala nga namalhin sa layo. Apan karon, ang tanan—hasta ang iyang mga anak nga tin-edyer—naggamit ug social network sa pagkontak sa uban.

Si Nathan naanggaan pod ug tawong karaan kay dili siya gustong mogamit ug bag-ong teknolohiya. “Maayo pa kaniadto kay maestorya nimo ang tawo ug madungog ang iyang tingog,” siya miingon. Apan karon namalandong siya. ‘Aron makontak nako silang tanan,’ siya miingon, ‘maayo tingali nga mosunod na lang ko sa uso.’

Ingon ba usab niana ang imong gibati? Ang tawo gusto gyong makigkomunikar sa uban. (Genesis 2:18; Proverbio 17:17) Kay daghan na man kaayo ang naggamit ug social network, unsay angay nimong mahibaloan bahin niini?