Bulawanong Prutas sa Armenia

● Ang apricot gikultibar sa libolibo na ka tuig sa Asia ug Europe. Gituohan sa mga taga-Europe nga naggikan kini sa Armenia, busa ila kining gitawag ug Armenian apple.

Karon, mga 50 ka matang sa apricot ang gipananom sa Armenia. Mamunga kini sa tungatunga sa Hunyo hangtod sa Agosto. Tungod sa init nga klima ug tabunok nga yuta nga gikan sa bolkan, talagsaon ang katam-is sa mga apricot sa Armenia. Para sa daghan, kini ang usa sa kinalamiang mga apricot sa kalibotan.

Ang komon nga matang sa apricot susamag gidak-on sa tsikos ug lainlaig kolor gikan sa dalag ngadto sa orens. Kini balhiboog panit ug medyo gahig unod, dili kaayo dugaon, ug lainlaig lami, naay tam-is ug naa poy aslom. Ang uban nag-ingon nga ang mas popular nga matang sa apricot morag peach ug plum ang lami.

Ang mga nananom niini nakapaliwat ug “itom” nga apricot. Pero dili kini puro nga apricot kondili kombinasyon sa apricot ug plum. Kini morado ug kolor o itom-itom, balhiboog panit, ug dalag ug unod. Kining matanga sa apricot gitawag usab ug pluot, plumcot, o aprium.

Sa dili pa manahon ang apricot, kini mamulak ug humot nga puting bulak nga mo-pollinate rag iya. Ang bulak niini kaamgid sa bulak sa peach, plum, ug cherry. Ang apricot moangay sa lugar nga may bugnaw ug init nga klima kay kinahanglan man kining mabugnawan aron mamulak ug mamungag maayo. Busa moangay gyod kini sa klima sa Armenia!

Sustansiyado ang bag-ong pinupo nga apricot. Pananglitan, tugob kini sa beta-carotene ug bitamina C. Kay ang bag-ong pinupo dali mang mabun-og ug malata, ang ubang lugar sa kalibotan nagbulad niini. Busa mas popular ang binulad nga apricot kay sa bag-ong pinupo. Ang binulad nga apricot sustansiyado gihapon ug tugob sa fiber ug iron. Ginahimo usab kining brandy, jam, ug juice.

Dugang pa, dunay nindot nga mga kinulit nga gama gikan niining kahoya, sama sa duduk, usa ka popular nga instrumento sa musika sa Armenia, nga gitawag usahay ug apricot pipe. Sa mga tindahan ug mga merkado sa Yerevan, ang kaulohan sa Armenia, ang mga turista makapalit usab ug nindot nga kinulit nga mga sobenir nga gama gikan sa kahoyng apricot.

Kon may mapalit kang bag-ong pinupo nga apricot sa inyong lugar, tilawi kini. Seguradong lamian gyod ka niini!