Pagpaniid sa Kalibotan

“Ang gidaghanon sa kaminyoon sa England ug Wales mius-os pag-ayo sukad gisugdan ang pagrekord niini,” sa 1862.—OFFICE FOR NATIONAL STATISTICS, BRITAIN.

Kapin sa katunga sa mga ehekutibo sa gagmay, pribadong mga kompaniya sa Amerika “nagdahom nga ang mga empleyado mangawat ug importanteng butang [sa kompaniya] sa sunod tuig.”—REUTERS NEWS SERVICE, U.S.A.

Wala pay tuig human sugdi sa mga awtoridad sa China ang operasyon bahin sa mga Web site sa Internet, sila “nakapasira nag kapin sa 60,000 ka pornograpikong website,” nag-ingon ang National Office Against Pornographic and Illegal Publications.—CHINA DAILY, CHINA.

“Kapin sa 215 ka milyong tawo—o 3% sa populasyon sa kalibotan—ang wala na magpuyo sa kaugalingon nilang nasod.”—UNITED NATIONS INTERNATIONAL FUND FOR AGRICULTURAL DEVELOPMENT, ITALY.

“Sa 19 ka estudyante sa India nga maghikog kada adlaw, 6 niana maghikog tungod sa kahadlok nga mahagbong sa eksaminasyon.”—INDIA TODAY INTERNATIONAL, INDIA.

Estratehiya sa Dagkong Sugalan

Sa Germany, ang aberids nga kantidad nga mapildi sa usa nga adik sa sugal maoy kapig napulo ka pilo kay sa mapildi sa dili kaayo adik. Busa ang mga adik sa sugal mao “ang importante kaayong mga kustomer niining negosyoha,” nag-ingon ang mantalaang Süddeutsche Zeitung. Aron mas dako ang kita, gidisenyo sa dagkong sugalan ang ilang mga dula ug mga makina nga maadik ang manugal ug pahimuslan ang ilang pagkaadik. Kon mas paspas ang makina, mas daling mawad-ag pagpugong sa kaugalingon ang manugal ug maadik siya. Epektibo kini nga estratehiya kay 56% sa kita sa mga slot machine maoy gikan sa mga adik sa sugal. Sa mga kasino, 38% ang kita; ug sa mga dula sa Internet, 60%.

Kanus-a Maayong Moatubang ug Huwes?

Makaimpluwensiya ba sa desisyon sa huwes ang mga butang nga walay koneksiyon sa kaso? Oo, sumala sa usa ka pagtuon. Gianalisar sa duha ka tigdukiduki ang kapin sa 1,000 ka desisyon sa eksperyensiyadong mga huwes sa Israel labot sa paghatag ug parole, o kondisyonal nga kagawasan sa binilanggo. Ilang nakita nga sa mga husay nga gihimo human makapaniudto ug makameryenda ang huwes, ang paborableng mga desisyon nga mga 65% anam-anam nga mius-os sa halos sero ug dayon mikalit ug balik sa 65% human sa sunod nga break. Ang mga tigdukiduki mihinapos nga ang mga desisyon sa korte wala kanunay ibase sa ebidensiya ug balaod apan kini “mahimong maimpluwensiyahan sa ubang butang nga wala gyoy labot sa legal nga mga desisyon.”