Problema Labot sa Kasuko

Nasuko ang usa ka tawo nga nag-order ug sandwich sa drive-through sa usa ka restawran kay gidugayan sa iyang order. Misulod siya sa restawran, gikasab-an ang usa ka empleyado, gitulod kini ug gisagpa. Dayon gikuha sa tawong nasuko ang sandwich ug migawas.

KITANG tanan masuko usahay. Natural lang kini sama nga kita mahigugma, molaom, mabalaka, maguol, ug mahadlok. Kon kontrolado ang kasuko, mahimo kining mapadayag sa hustong paagi ug makatabang pa gani. Pananglitan, makatabang kini sa usa nga mahimong mas determinado sa pagbuntog sa mga babag o mga problema nga motungha.

Ingon sa gipakita sa sinugdan, ang kasuko makadaot usab. May mga tawo nga dali kaayong masuko, kanunayng masuko, ug grabe kon masuko. Dihang mahagit, sila maningka o mangdapat. Busa sila maoy gikontrol sa ilang kasuko, imbes nga silay mokontrol niini. Ang maong kasuko peligroso ug makahatag kanilag dakong problema lakip sa ilang panghunahuna, pagbati, panggawi ug relasyon sa uban.

Kadtong dili makakontrol sa ilang kasuko maghatag usab ug problema sa uban. Bisag gamay rang butang, mosilaob dayon ang ilang kasuko nga moresultag grabeng mga problema. Tagda kining mosunod:

Usa ka tawo nga naglakaw uban sa iyang mga higala diha sa dalan nga daghan kaayog tawo ang gipusil sa liog kay nasaghiran sa bag sa iyang higala ang laing tawo.

Gibunalan sa 19 anyos nga lalaki ang 11 ka bulan nga anak sa iyang trato hangtod namatay ang bata. Ang lalaki nagdula ug mapintas nga video game ug wala makapugong sa iyang kasuko sa dihang natandog sa bata ang control panel sa iyang gidula mao nga napildi siya sa dula.

Ang susamang mga panghitabo sa tibuok kalibotan nagpakita nga nagkadaghan ang mga tawong dili makakontrol sa ilang kasuko. Unsay mga hinungdan niini?

[Kahon sa panid 3]

Normal lang nga kita masuko. Busa may mga panahon nga maayo ang pagpahungaw sa kasuko basta kontrolado lang. Apan kini nga mga artikulo naghisgot bahin sa kasuko nga makadaot kanato ug sa uban sa emosyonal, pisikal, ug sa espirituwal.