Mga Batan-on Nangutana

Sayop Bang Mapopular?

I-PLAY

Isulat diha sa blangko ang kulang nga pulong:

․․․․․ maayo nga mapopular.

A. Kanunayng
B. Usahay
C. Dili

ANG hustong tubag mao ang “B.” Ngano? Tungod kay ang pagkapopular nagpasabot nga daghang tawo nakaangay nimo—ug usahay dili kini daotan! Ang Bibliya nagtagna nga ang mga Kristohanon mahimong “kahayag sa kanasoran” ug ang mga tawo madani kanila. (Isaias 42:6; Buhat 13:47) Busa niini nga diwa, ang mga Kristohanon popular.

Nahibalo ka ba?

Si Jesus popular. Bisan sa bata pa, iyang naangkon ang “pabor sa Diyos ug sa mga tawo.” (Lucas 2:52) Ug ang Bibliya nag-ingon nga sa nahingkod na si Jesus, “misunod kaniya ang dakong mga panon sa katawhan gikan sa Galilea ug Decapolis ug Jerusalem ug Judea ug gikan sa tabok sa Jordan.”—Mateo 4:25.

Nganong dili kana sayop?

Tungod kay si Jesus wala mangagpas nga mapopular o dayegon sa uban. Gihimo lang niya kon unsa ang husto ug tungod niana daghan ang nakaangay kaniya. (Juan 8:29, 30) Pero nahibalo sab si Jesus nga temporaryo lang ang pag-uyon sa mga tawo kay dali rang mausab ang ilang hunahuna. Siya nahibalo nga moabot ang panahon nga patyon ra siya niining mga tawhana!—Lucas 9:22.

Hinumdomi:

Ang pagkapopular samag bahandi. Dili kanunayng sayop ang pagbaton niini. Ang problema maoy kon unsa ang gihimo sa mga tawo aron mabatonan kini ug dili mawala.

Pasidaan!

Himoon sa daghang batan-on ang tanan aron lang mapopular. Ang pipila maoy tigpahimuot ug tawo, nga magsunodsunod sa gusto sa kadaghanan. Ang uban usab mga bagis nga mamugos aron dayegon sila. *

Sa mosunod nga mga panid, atong hisgotan kining duha ka peligrosong dalan ngadto sa pagkapopular, dayon ang mas maayong dalan.

^ par. 12 Ang Bibliya naghisgot ug mga bagis nga ginganlag “mga Nepilim,” kinsa gitawag usab ug “mga tawong bantogan.” Kabantog ray ilang giapas.—Genesis 6:4.

DALAN NGADTO SA PAGKAPOPULAR

TIGPAHIMUOT UG TAWO

Gusto kong mauyonan sa uban.
Aron uyonan, sundogon gyod nako ang ilang panggawi.

“Giusab nako ang akong panggawi aron mahisama sa uban. Sa primero morag OK ra. Pero akong nakita nga dili diay nimo angayng usbon ang imong pagkatawo aron lang maangayan ka.”—Nicole.

Prinsipyo sa Bibliya: “Ayawg buhata ang usa ka butang tungod lang kay ginabuhat kini sa uban. . . . Ayaw padaldal kanila sa pagbuhat ug daotan.”—Exodo 23:2, Holy Bible—Easy to Read Version.

BAGIS

Daghan na ang nakaangay nako, ug dili ko gustong mausab kini.
Himoon ko ang tanan aron magpabilin kong popular—bisag akong matamakan ang uban.

“Sagad ang mga batan-on salbahis, ug kay popular man ang mga bagis, hunahunaon sa mahadlokong batan-on nga husto ang tanan nilang isulti.”—Raquel.

Prinsipyo sa Bibliya: “Buhata ngadto sa mga tawo ang gusto ninyo nga buhaton nila nganha kaninyo.”—Lucas 6:31, Maayong Balita Biblia.

MAS MAAYONG DALAN
Kon ipadapat nimo kining tulo ka punto, lagmit dili na ka popular sa uban—apan seguradong maangayan ka sa maayong mga tawo!

Sayra ang imong mga sukdanan. Ang Bibliya nag-ingon nga ang mga tawong hamtong ‘nabansay sa pag-ila sa maayo ug sa daotan.’—Hebreohanon 5:14.
Barogi ang imong pagtuo. Sunda si Josue, kinsa miingon: ‘Pagpili karong adlawa kon kinsay inyong alagaran . . . Apan bahin nako ug sa akong panimalay, kami mag-alagad kang Jehova.’—Josue 24:15.
Ayaw pagduhaduha sa dalan nga imong gipili. Gisultihan ni apostol Pablo si Timoteo: “Kita wala hatagi sa Diyos ug espiritu sa katalaw, kondili sa gahom.”—2 Timoteo 1:7.