Malamposong Pamilya nga May Humabdos

DILI LANG BASTA MAGKAUBAN SA BALAY

Ang 20 anyos nga anak ni Philip nga si Elise maoy nangabaga sa mga buluhaton sa balay. Human maminyo si Philip kang Louise, magkasuod kaha si Elise ug Louise?

Louise: Sa primero naglisod mi. Batasan man god nako nga magpondo ra sa balay ug magbuhatbuhat.

Elise: Giareglar pag-usab ni Louise ang balay ug daghan mig butang nga iyang gipanglabay. Kas-a nanglimpiyo ko ug wala nako mabalik sa hustong lugar ang ubang butang kay naglibog ko kon asa kini ipamutang. Nasuko si Louise, nagkatinubagay mi, ug usa ka semanang wala nako siya tinggi.

Louise: Usa ka higayon, akong gisultihan si Elise, “Wala na ko mahibalo kon unsay buhaton, pero dili pod ko makaagwanta nga ingon ani na lang ta pirme.” Iya kong giduol nianang gabhiona ug nangayog pasaylo. Gihalog nako siya, ug nanghilak mi.

Elise: Wala kuhaa ni Louise ang uban nakong mga letrato diha sa bungbong, ug wala kuhaa ni Papa ang mga suga nga akong gibutang sa sala. Kon hunahunaon morag gamay ra kadto, pero tungod sa ilang gihimo gibati nako nga bahin gihapon ko sa pamilya. Mapasalamaton sab ko sa pag-atiman ni Louise sa akong manghod nga lalaki sa dihang siya kauban namo. Duha na ka tuig ang milabay, ug anam-anam na nako siyang nadawat ingong bahin sa pamilya.

Louise: Dili lang mi basta magkauban sa balay kondili suod pod ming managhigala karon ni Elise.

 “MAS IMPORTANTE ANG PANAGHIUSA”

Si Anton ug Marelize parehong may tulo ka anak dihang nagminyo sila unom na ka tuig ang milabay.

Anton: Kanunay mi mag-uban nga tibuok pamilya sama sa pagkamping, ug gahinan pod namog panahon ang matag bata. Pipila pa ka tuig una namo gibati nga usa gyod mi ka pamilya, pero ang kadaghanan sa among problema nasulbad na karon.

Marelize: Giisip namo ang mga bata nga “among” mga anak, dili “iyaha” o “akoa.” Mireklamo ko kas-a kay wala sa lugar nga gibadlong ni Anton ang akong anak nga lalaki ug iyang gipalingkod ang iyang anak nga babaye sa front seat. Apan akong nakita nga mas importante ang panaghiusa kay sa kon kinsay molingkod sa front seat. Naningkamot mi nga walay palabihon bisag dili namo mahatagag parehas nga pagtagad ang tanan.

Dili sab nako hisgotan ang malipayong panahon uban sa akong unang pamilya, kay basin magtuo ang akong pamilya karon nga mas malipayon ko kaniadto. Hinunoa, gipakita nako nga akong naapresyar ang among pamilya karon.

“MOHATAG UNA MIG KOMENDASYON”

Si Francis ug Cecelia nagminyo upat na ka tuig ang milabay. Si Francis may tin-edyer nga anak nga lalaki ug si Cecelia may tulo ka hingkod nang anak.

Francis: Naningkamot ko nga daling ikaestorya ug dili dayon masuko. Kanunay ming magdungan ug pangaon ug gamiton kining panahona aron kami magkaestorya. Gidasig usab nako ang matag usa sa pag-atiman sa ubang buluhaton sa balay, kay makatabang kini sa pamilya.

Cecelia: Mogahin kog panahon sa matag usa kanila ug mamati sa ilang gikabalak-an. Sa miting sa pamilya, mohatag una mig komendasyon ug dayon pagdasig sa kon unsay angayng pauswagon. Ug kon masayop ko, angkonon nako kini ug mangayog pasaylo.

 GIPADAKO SA AMA-AMA UG INA-INA

Ang 20 anyos nga si Yuki wala makakita sa iyang amahan sukad nga nag-edad siyag singko anyos. Dayon ang iyang inahan naminyo kang Tomonori, ug namatay sa dihang 10 anyos si Yuki. Paglabayg lima ka tuig, naminyo ang iyang ama-ama nga si Tomonori kang Mihoko, mao nga si Yuki gipadako sa ama-ama ug ina-ina.

Yuki: Sa nagminyo pag-usab ang akong ama-ama, nakaingon ko sa akong kaugalingon, “wala ko magkinahanglag ina-ina. Daghan nag kausaban sa akong pamilya.” Busa, bugnaw kog tinagdan sa akong ina-ina.

Mihoko: Bisag wala ko pugsa sa akong bana nga mahalon ang iyang humabdos sama sa iyang pagmahal kaniya, naningkamot ko nga masuod kang Yuki. Gihimo namo ang tanan aron dili mausab ang iyang rutina, lakip ang iyang espirituwal nga kalihokan, paglingawlingaw, ug ang panag-estorya human sa matag panihapon. Mas nasabtan na nako siya human nga nagkaestorya mi bahin sa kamatayon sa iyang inahan.

Sa nagmabdos ko kang Itsuki, nabalaka mi kang Yuki. Buot man god namong mobati gihapon siyang bahin sa pamilya. Busa siyay among gihangyo nga mohungit ug moligo kang Itsuki, ug moilis sa iyang dayaper, ug among dayegon si Yuki atubangan sa uban sa iyang pagkamatinabangon. Si Itsuki suod kaayo kang Yuki. Una pa siya nakakat-on sa paglitok ug “Mama” o “Papa,” makamao na siyang molitok ug niinii (manoy).

Yuki: Kay dili man ko tinuod nga anak, normal lang nga mobati kong nag-inusara ug dili bahin sa pamilya. Masulti nimo sa uban ang imong situwasyon, pero morag dili nila kini masabtan. Apan nalipay ko kay dako kaayog tabang ang mga isigka-Kristohanon. Karon dili na ko bugnaw ug tinagdan sa akong ina-ina. Tambagan ko niya, ug dili na ko mataha nga mosulti kaniya.

[Blurb sa panid 9]

Pailob lang! Ang pamilyang may mga humabdos mahimong magmalipayon ug magmalamposon