DAGHAN ang nagtuo nga gibalewala ang ilang paningkamot. Pananglitan, ang ubang trabahante mobati nga wala pabilhi sa ilang amo. Daghang minyo nagtuo nga sila gibalewala sa ilang kapikas. Ug ang ubang bata nagtuo nga dili gyod nila maabot ang gidahom sa ilang ginikanan. Kini nga pagbati mawala kon kitang tanan kanunayng mohatag ug komendasyon.

Dili na batasan karon ang paghatag ug sinserong komendasyon. Dili kini ikatingala kay ang Bibliya nagtagna: “Sa kataposang mga adlaw moabot ang makuyaw nga mga panahong lisod sagubangon. Kay ang mga tawo unya magmahigugmaon sa ilang kaugalingon, . . . dili-mapasalamaton, dili-maunongon.”—2 Timoteo 3:1, 2.

Nakadawat ka na ba ug sinserong komendasyon? Nan, nahibalo ka nga kini makapalipay ug makapadasig. Ang Bibliya nag-ingon: “Ang usa ka pulong sa hustong panahon Oh pagkamaayo!” (Proverbio 15:23) Ang Bibliya makatabang kanato nga magmaluloton.

Pangitaa ang Maayong Hiyas sa Uban

Kay ang Diyos interesado man kaayo kanato, iyang mamatikdan ug pabilhan ang atong maayong hiyas ug binuhatan. Ang Bibliya nagpasalig kanato nga ‘ang mga mata sa Diyos [nagtan-aw] sa tibuok nga yuta aron ipakita ang iyang kusog alang niadtong kansang kasingkasing maoy bug-os alang kaniya.’ (2 Cronicas 16:9) Kon atong ipakita ang atong gugma sa Diyos pinaagi sa pagtuman sa iyang mga balaod, iya gayod kining makita.

Si Jehova dili tigpangitag sayop. Kay kon nangita pa siyag sayop, wala untay usa kanato ang makabarog. (Salmo 130:3) Hinunoa, siya samag minero nga mapailobong mag-ayag sa daghang bato aron makakitag mahalong bato. Malipay ang minero kon duna siyay makit-an bisag wala pa kini mapahamis, kay nahibalo siya nga kini bililhon. Sa susama, dihang susihon sa Diyos ang atong kasingkasing, pangitaon niya ang atong maayong hiyas, dili ang atong sayop. Kon makita niya kini, siya malipay. Siya nahibalo nga kon mapalambo ang maong hiyas, makapahimo kini sa usa nga bililhon—usa ka matinumanon ug debotadong magsisimba Kaniya.

Kita makakat-on sa panig-ingnan sa Diyos. Sa dihang motan-aw kita sa uban, tingali mas dali natong makita ang ilang sayop. Apan kon atong sundogon si Jehova, ang ilang maayong hiyas ang atong pangitaon. (Salmo 103:8-11, 17, 18) Kon makita na nato kini, ato silang komendahan. Ang resulta? Ang atong mga pulong makapadasig kanila, ug tungod niini tingali mas maningkamot sila sa pagbuhat ug maayo! Dayon, kita malipay tungod sa atong paghatag ug komendasyon sa uban.—Buhat 20:35.

Pabilhi ang Maayong Binuhatan sa Uban

Sagad namatikdan ug gipabilhan ni Jesus ang maayong binuhatan sa uban. Kas-a, sa dihang ang gikulbaan ug masakiton nga babaye mihinok sa paghikap sa iyang besti aron mamaayo, gikomendahan siya ni Jesus, nga nag-ingon: “Anak, ang imong pagtuo nakapaayo kanimo.”—Marcos 5:34.

Sa laing higayon, samtang si Jesus nagtudlo didto sa templo sa Jerusalem, iyang nakita ang daghang dato nga nanghulog ug kuwarta sa mga panudlanag bahandi. Dayon iyang nakita ang kabos nga babayeng balo nga naghulog ug “duha ka gagmayng sensilyo nga kubos kaayog bili.” Tinuod mas daghan ang gihulog sa uban. Apan gikomendahan ni Jesus ang pagkasinsero sa babayeng balo, nga nag-ingon: “Sa pagkatinuod sultihan ko kamo, Kining babayeng balo, bisan kabos, naghulog ug labaw pa kay kanilang tanan.  Kay silang tanan naghulog ug mga gasa gikan sa ilang mga sobra, apan kining bayhana gikan sa iyang kawalad-on naghulog sa tanan niyang panginabuhian.”—Lucas 21:1-4.

Unsaon nato pagsundog si Jesus? Ang Bibliya nag-ingon: “Ayaw ihikaw ang maayo gikan kanila nga takos niini, sa dihang anaa sa gahom sa imong kamot ang pagbuhat niini.”—Proverbio 3:27.

Komendasyon—Dakog Epekto!

Niining kalibotan nga kaylap ang pagkadili-mapasalamaton, kitang tanan nagkinahanglag gugma ug apresasyon. Kon kita sinserong mohatag ug komendasyon sa uban, ato silang mapalig-on ug madasig. Ang atong kinasingkasing nga pagdayeg mag-aghat kanila sa paghimo sa ilang kinamaayohan.—Proverbio 31:28, 29.

Ang Bibliya nag-awhag sa tanang Kristohanon: “Magmahunahunaon kita sa usag usa aron sa pagdasig ngadto sa paghigugma ug sa maayong mga buhat.” (Hebreohanon 10:24) Pagkanindot unta sa kalibotan kon ang matag usa magpakitag sinserong interes sa uban, mangita sa ilang maayong hiyas, ug modayeg sa ilang maayong binuhatan. Sa pagkatinuod, ang komendasyon dakog epekto!

NAKAPAMALANDONG KA BA?

● Nganong angay natong komendahan ang maayong binuhatan sa uban?—Proverbio 15:23.

● Sa dihang si Jehova mosusi kanato, unsay iyang tan-awon?—2 Cronicas 16:9.

● Kanus-a kita angayng mohatag ug komendasyon sa uban?—Proverbio 3:27.

[Hulagway sa panid 29]

Imo bang namatikdan ug gipabilhan ang maayong binuhatan sa uban?