● Ang mga siyentista naghimog robot nga kamot nga mas liksi ug malubaylubay. Ang direktor sa mga tigdisenyo sa kompaniyang naghimo niini nag-ingon nga kini “mas labaw pa sa [mga robot nga kamot] nga gigamit karon.” Diin nila gibase kini nga imbensiyon? “Sa sungo sa elepante,” siya miingon.

Hunahunaa: Ang sungo sa elepante, nga motimbang ug mga 140 kilos, gitawag ingong “ang kinadaghanag gamit ug labing mapuslanong kasway sa tibuok kalibotan.” Kini nagsilbing ilong, pangsuyop, bukton, o kamot. Pinaagi niini, ang elepante moginhawa, mosimhot, moinom, mosakwat, o mobudyong ug kusog!

Apan dili lang kana. Ang sungo sa elepante dunay 40,000 ka kaunoran mao nga mapalihok niya kini sa bisan asang direksiyon. Ang simod sa sungo niini makapunit bisan sa gamayng sensilyo. Ang sungo makahimo usab sa pagsakwat ug gibug-atong 270 kilos!

Pinaagi sa pagsundog sa sungo sa elepante, ang mga siyentista naglaom nga makahimog mas episyenteng mga robot nga magamit diha sa balay ug pabrika. Ang usa ka representante sa mao gihapong kompaniya miingon, “Lahi gyod kini nga matang sa robot kay puwede nang mag-uban ang tawo ug robot sa pagtrabaho nga episyente ug walay peligro.”

Unsay imong hunahuna? Ang sungo ba sa elepante mitungha pinaagig ebolusyon? O kini ba gidisenyo?