MINILYON ang nagtuo nga sila dunay kagawasan, apan ang tinuod, sila naulipon. Pananglitan, daghan ang naulipon sa mga patuotuo. Ang uban mahadlok sa mga patay, mao nga magtanyag silag mahalong mga halad aron dili sila unsaon. Ang uban mahadlok kaayo sa kamatayon kay wala sila mahibalo kon unsay mahitabo dihang sila mamatay. Mahigawas kaha sila sa kahasol sa hunahuna, emosyon, ug bisan sa problema sa panalapi? Oo! Sama sa giingon sa ulohan nga kinutlo gikan sa mga pulong ni Jesu-Kristo, ang makahatag lang ug kagawasan mao ang kamatuoran. Apan unsa nga kamatuoran? Kamatuoran ba nga gituohan sa kadaghanan o kamatuoran bahin sa Diyos?

Klarong gipadayag ni Jesus ang tubag. “Kon magpabilin kamo sa akong pulong,” siya miingon, ‘kamo mahibalo sa kamatuoran, ug ang kamatuoran magpahigawas kaninyo.’ (Juan 8:​31, 32) Ang “pulong” o pagtulon-an ni Jesus mabasa diha sa Bibliya.

Sa dihang miingon si Jesus nga ‘ang kamatuoran magpahigawas kaninyo,’ ang panguna niyang gitumong mao ang kagawasan gikan sa sala ug kamatayon. Dugang pa, ang pagkahibalo sa kamatuoran diha sa Pulong sa Diyos magpahigawas kanato gikan sa patuotuo, kahadlok sa mga patay, ug sa sobrang pagkahadlok nga mamatay. Sa unsang paagi?

1. Kagawasan gikan sa patuotuo. Daghan ang nagtuo nga may mga butang o numero nga makadimalas. Ang uban mangita unag maayong tilimad-on o mokonsultag horoscope o espiritista sa dili pa mohimog importanteng desisyon.

Kon sa unsang paagi ang kamatuoran sa Bibliya makahatag ug kagawasan: Sa panahon sa Bibliya, ang ubang alagad sa Diyos nahimong matuotuohon, ug gani misimba pa “sa diyos sa Suwerte” ug “sa diyos sa Kapalaran”! Unsay panglantaw ni Jehova niini? “Kamo nagpadayon sa pagbuhat kon unsay daotan sa akong mga mata,” siya miingon. (Isaias 65:​11, 12) Kana usab ang panglantaw sa Diyos niadtong mangitag giya sa kinabuhi pinaagig espiritista: “Bisan kinsa nga nagakonsultag espiritista . . . dulumtanan kang Jehova.”​—Deuteronomio 18:​11, 12.

Ang patuotuo ug pagkonsultag espiritista makadaot kay kini maoy mga “malipatlipatong kaugdahan sa Yawa,” kinsa gitawag ni Jesus nga “amahan sa bakak. (Efeso 6:11; Juan 8:44) Kon gusto kag giya bahin sa usa ka importanteng butang, mokonsulta ka bag bakakon? Siyempre, dili! Busa maayo nga imong likayan ang bisan unsa nga konektado sa “amahan sa bakak.”

Ang bugtong makatabang sa paghimog maayong desisyon sa kinabuhi mao ang kaalam base sa tukmang kahibalo sa mga prinsipyo sa Bibliya ug sa katuyoan sa Diyos alang sa tawo. Ang Proverbio 2:6 nag-ingon: “Si Jehova magahatag ug kaalam; sa iyang baba nagagikan ang kahibalo ug ang katakos sa pag-ila.”

2. Kagawasan gikan sa kahadlok sa mga patay. Daghan ang nagtuo nga ang “mga espiritu” sa patayng katigulangan makaapektar sa buhi. Sila nagtuo nga kini nga “mga espiritu” kinahanglang tanyagan ug mga halad aron dili masuko. Busa ang uban maputos sa utang tungod sa gastosong mga halad ug seremonyas.

Kon sa unsang paagi ang kamatuoran sa Bibliya makahatag ug kagawasan: Gipadayag sa Bibliya ang kahimtang sa mga patay. Pananglitan, si Jesus nag-ingon nga ang mga patay ‘nangatulog.’ (Juan 11:​11, 14) Unsay iyang gipasabot? Ang Ecclesiastes 9:5 miingon: “Ang mga buhi nasayod nga sila mamatay; apan bahin sa mga patay, sila walay nahibaloan nga bisan unsa.” Ang tinuod, ang mga patay morag hinanok nga nangatulog, nga wala gayoy kalibotan. Kay wala nay kinabuhi,  dili na sila makahimo kanato ug maayo o daotan.

Apan ang uban moingon nga naestorya nila ang patay. Tinuod kaha? Ang Bibliya nag-ingon nga sa unang panahon, daghang manulonda mirebelde sa Diyos. (2 Pedro 2:4) Kining daotang mga espiritu o demonyo, naningkamot sa paglimbong sa tawo. (1 Timoteo 4:1) Ang usa ka paagi mao ang pagpakaaron-ingnon nga sila kadtong namatay aron motuo ang tawo sa kabakakan nga ang mga patay buhi sa laing matang o sa laing kalibotan.

3. Kagawasan gikan sa sobrang pagkahadlok nga mamatay. Ang Bibliya nag-ingon nga ang kamatayon maoy usa ka kaaway. (1 Corinto 15:26) Busa normal lang nga mahadlok kita nga mamatay ug dili gustong mamatay. Apan dili kita angayng mobatig sobrang kahadlok nga mamatay.

Kon sa unsang paagi ang kamatuoran sa Bibliya makahatag ug kagawasan: Gawas nga gipadayag sa Bibliya ang kahimtang sa mga patay, gibutyag usab niini nga sila banhawon sa Diyos. Si Jesus miingon: “Ang takna nagsingabot, nga ang tanan nga anaa sa handomanang mga lubnganan makadungog sa iyang [Kristo] tingog ug manggula.”​—Juan 5:​28, 29; Buhat 24:15.

Unsay ilang porma dihang sila “manggula”? Gibutyag ni Jesus ang tubag sa dihang iyang gibanhaw ang pipila ka tawong patay. Sa matag pagpamanhaw ni Jesus, ang tawo nabanhaw nga mao ra gihapon​—sama sa kon unsa siya kaniadto. (Marcos 5:​35-42; Lucas 7:​11-17; Juan 11:​43, 44) Kini nahiuyon sa kahulogan sa Gregong pulong sa “pagkabanhaw,” nga nagpasabot ug “pagbarog.” Sa dihang nakigsulti sa iyang tigulang nga alagad nga si Daniel, ang Diyos miingon: “Ikaw mopahulay [o matulog sa kamatayon], apan ikaw mobarog alang sa imong bahin sa kataposan sa mga adlaw.” (Daniel 12:13) Nahupay si Daniel niining mga pulonga mao nga siya walay kahadlok ug may dignidad nga miatubang sa kamatayon!

Ang usa sa mga rason sa pag-anhi ni Jesus sa yuta mao ang “pagwali sa kagawasan ngadto sa mga binihag”​—kadtong naulipon sa bakak nga pagtulon-an. (Lucas 4:18) Sanglit mabasa diha sa Bibliya ang iyang mga pagtulon-an, kini padayong naghatag ug kagawasan sa mga tawo matag adlaw. Hinaot nga ang kamatuoran sa Bibliya mohatag kanimog walay kataposang kagawasan.

NAKAPAMALANDONG KA BA?

Sa unsang paagi ang kamatuoran sa Bibliya makahatag kagawasan gikan sa

● patuotuo?​—Isaias 8:​19, 20; 65:​11, 12.

● kahadlok sa mga patay?​—Ecclesiastes 9:5; Juan 11:​11, 14.

● sobrang pagkahadlok nga mamatay?​—Juan 5:​28, 29; Buhat 24:15.

[Blurb sa panid 11]

Ang kamatuoran sa Bibliya makahatag ug kagawasan gikan sa patuotuo, kahadlok sa mga patay, ug sa sobrang kahadlok nga mamatay