Dakong Kalamposan sa Malawi—1,000 ka Kingdom Hall!

“WALA gyod ko magdahom nga mahitabo kini sa Malawi,” miingon si Augustine. Ang iyang gitumong mao ang pagpanukod ug mga Kingdom Hall, nga maoy pagtawag sa mga Saksi ni Jehova sa ilang dapit sa pagsimba. Niadtong 1993, ang 30,000 ka Saksi kaniadto sa Malawi, usa ka gamayng nasod sa habagatan-sidlakan sa Africa, walay tarong nga mga dapit sa pagsimba.

Apan lahi na karon. Niadtong Septiyembre 2010 didto sa Blantyre, nahuman sa mga Saksi sa Malawi ang ilang ika-1,000 nga Kingdom Hall! * Nganong miabot ug 30,000 ang mga Saksi bisan sa wala pa magsugod ang proyekto sa pagpanukod? Ug dihang nakasugod na, giunsa nila pagtukod ang 1,000 ka Kingdom Hall sa mubo lang nga panahon bisag gamay lag pondo? Ug unsay epekto niining talagsaong proyekto sa mga Saksi ug sa ilang mga silingan?

Malisod nga mga Panahon

Sa unang bahin sa katuigan sa 1900, ang mga Saksi ni Jehova, nga kaniadto gitawag ug mga Estudyante sa Bibliya, nagsugod sa pagpanudlo sa kamatuoran sa Bibliya didto sa Malawi. Pagka-1967, ang gidaghanon sa mga Saksi didto miuswag ug mga 17,000. Sama sa mga Kristohanon sa unang siglo, sila ilado nga masinundanon sa balaod ug matinahoron sa mga opisyales sa gobyerno. Ug sama sa unang mga Kristohanon, sila neyutral sa politika.​—Juan 18:36; Buhat 5:29.

Apan sa tungatunga sa katuigan sa 1960, ang ilang binase sa Bibliya nga baroganan nahimong isyu sa gobyerno, ug pagka-1967 ang ilang buluhaton gidili. Wala magdugay, daghan ang gitangtang sa ilang trabaho ug ang ilang mga kabtangan gikompiskar o gidaot sa mga tawong walay puangod. Tungod sa grabeng paglutos ug kahadlok nga patyon, libolibong Saksi mikalagiw sa kanait nga nasod sa Mozambique ug Zambia.

Apan sa ulahi, miarang-arang ang kahimtang sa mga Saksi ni Jehova sa Malawi, ug ang kadaghanan kanila gipabalik ngadto sa ilang nasod sa unang bahin sa tuig 1990. Nalipay kaayo sila nga niadtong Agosto 12, 1993, ang 26 ka tuig nga pagdili sa ilang buluhaton natapos! Pero nakaatubang silag laing problema. Kapin sa 30,000 diha sa 583 ka kongregasyon walay tarong nga mga tigomanan! Unsay ilang himoon?

Gipakita Nila ang Ilang Gugma!

Sa unang unom ka tuig human matapos ang pagdili, dalayegon ang gihimo sa mga Saksi didto sa pagtukod ug mga Kingdom Hall bisag kulag pondo. Apan ang gidaghanon sa natukod nga Kingdom Hall dili makaapas sa tinuig nga pag-uswag sa gidaghanon sa mga Saksi. Ang solusyon? Pagpadapat sa prinsipyo sa Bibliya sa 2 Corinto 8:14. “Pinaagi sa pag-angay-angay,” ang sobrang pondo sa ubang nasod gihatag ngadto sa mga nasod nga gamayg  pondo sama sa Malawi. Busa sa 1999 gipasugdan sa Nagamandong Lawas sa mga Saksi ni Jehova ang usa ka linaing proyekto sa pagtabang sa mga nasod nga gamayg pondo sa pagtukod ug Kingdom Hall. Tungod niining mahigugmaong tabang, ang mga Saksi sa Malawi nakatukod ug daghang Kingdom Hall. *

Kaniadto ang mga kongregasyon sa Malawi magtigom diha sa klasrom, sa lagkaw, o ilalom sa kahoy. Karon, ang 1,230 ka kongregasyon nagtigom na diha sa nindot nga mga tinukod nga gipahinungod sa pagpauswag sa matuod nga pagsimba. Busa ang kapin sa 75,000 ka Saksi sa Malawi mapasalamaton sa tabang sa ilang Kristohanong mga igsoon sa tibuok kalibotan.

Laing butang nga nakadasig sa mga Saksi ni Jehova sa pagtukod ug daghang Kingdom Hall sa mubo lang nga panahon mao ang ilang dakong tinguha nga matukoran ug nindot, desenteng mga tigomanan. Wala sila mangandoy ug maluho nga mga tinukod. Hinunoa, gusto lang nila nga matukoran ug simple, desenteng tigomanan nga makahatag ug kadungganan sa Diyos ug komportableng dapit sa paghisgot ug pagtuon sa Bibliya.

Mga Komunidad Nakabenepisyo

Kaniadto, ang mga Saksi ni Jehova sa Malawi gibiaybiay kay sila walay tarong nga dapit sa pagsimba. Busa ang ubang Saksi maulaw usahay sa pagdapit sa mga interesado. Karon nga sila duna nay nindot nga Kingdom Hall, malipay na sila sa pagdapit sa mga silingan ug sa mga interesado. Gani, sa usa ka lugar, ang usa ka kongregasyon nalipay nga 698 ang mitambong diha sa ilang bag-ong Kingdom Hall!

Ang mga Saksi ug ang uban miingon nga wala gyod sila magdahom nga matukod ang usa ka nindot ug lig-ong tigomanan diha sa ilang lugar. Si Augustine, nga gihisgotan sa sinugdanan, nakahinumdom ug usa ka kongregasyon nga nagtigom ilalom sa kahoy. “Komportable kini kon dili mag-ulan,” miingon si Augustine. “Apan kon magbunok ang ulan, dako kaayo kini nga problema!” Kon nakasulay ka nag pagbunok sa ulan, nan makasabot ka sa giingon ni Augustine.

Si Augustine nahinumdom sa iyang pagtambong sa Chimwanje Congregation. “Nagtigom mi sa lagkaw,” siya miingon. “Wala mi kalibotan nga ang atop gipuy-an diay ug dako, lala nga lawalawa. Dayon sa nanungatunga ko sa akong pakigpulong, kini nahulog duol sa akong tiil! Nakasinggit ang nakuratan nga tumatambong, ‘Tamaki na Augustine!’ Ug ako  dayon kining gitamakan, mao nga buhi gihapon ko ron.” Karon nga ang kongregasyon duna nay bag-ong Kingdom Hall, wala nay ingon niini nga disturbo.

“Mutya sa Komunidad”

Daghang komunidad ug lokal nga mga pangulo nakadayeg sa proyekto sa mga Saksi ni Jehova. Kini ang ilang mga komento:

✔ “Ang pagtukod ug bag-ong dapit sa pagsimba, ug ang gugma ug panaghiusa sa mga Saksi ni Jehova, maoy usa ka mutya sa komunidad, nga angayng sundogon sa ubang relihiyon.”​—Lokal nga pangulo sa Chabwenzi.

✔ “Nakadayeg ko sa panaghiusa sa mga Saksi. Nagsugod mig tukod sa among simbahan napulo na ka tuig ang milabay ug hangtod karon wala gihapon kini mahuman. Buot kong pasalamatan kamo sa inyong pagtukod ug nindot nga pasilidad sa among lugar.”​—Pangulo sa baryo sa Chigwenembe.

✔ “Nakadayeg ko sa inyong kakugi. Paspas kaayo mong motrabaho ug hinlo gihapong tan-awon! Klaro gyod nga kamo organisado.”​—Lokal nga pangulo sa Chiuzira.

Ang proyekto sa pagpanukod nabalitaan sa mga editor sa Chichewa/Chinyanja​—English Dictionary, nga nag-ingon bahin sa mga Saksi: “Ang mga Saksi ni Jehova nakatukod ug daghang [Kingdom Hall].”

‘Usa Kini ka Milagro’

Niadtong Enero 30, 2011, gidedikar sa Manyowe Congregation sa Blantyre ang ilang bag-ong Kingdom Hall​—ang ika-1,000 nga natukod sa Malawi. “Usa ka milagro nga natukoran kamig Kingdom Hall,” miingon ang usa ka membro sa kongregasyon. “Morag damgo kini nga natuman.”

“Wala gyod ko makapalta bisag usa ka adlaw panahon sa pagtukod niini,” miingon ang batan-ong babaye sa Manyowe Congregation. “Nalipay ko nga nakatabang sa pagtukod ug tarong nga tigomanan sa among lugar.”

“Gilisodlisod mi sa mga opisyales sa pagtukod sa among Kingdom Hall,” miingon ang ansiyano sa usa ka kongregasyon. “Daghang higayon nga mibalibad ang mga opisyales sa pagpirma sa mga permit. Apan gikombinsir pag-ayo ni Mrs. Liness Chikaoneka, nga pangulo sa baryo, ang mga opisyales sa pagpirma niini.”

Usa ka adlaw niana, giubanan ni Mrs. Chikaoneka ang usa ka ansiyano sa pagpapirma sa mga permit. Iyang gisultihan ang usa ka opisyal: “Gusto nako nga matukod sa mga Saksi ang ilang Kingdom Hall diha sa akong baryo. Maayo silang tawo. Wala pa gyod ko makahusay ug problema nila diha sa akong baryo.” Busa gipirmahan sa opisyal ang mga permit.

Si Mrs. Chikaoneka nalipay sa panahon sa dedikasyon sa Kingdom Hall. Siya miingon, “Nalipay ko ug mapasigarbohon nga sa akong baryo natukod kining nindot nga tinukod!”

Sa Malawi, ang mga Saksi ni Jehova ug ang ilang mga silingan mapasalamaton sa proyekto sa pagpanukod ug Kingdom Hall. Tungod sa ilang dalayegong pagsakripisyo ug pagkakugihan, ang mga Saksi ni Jehova niining nasora natukoran nag igong gidaghanon sa Kingdom Hall, dili sama niadtong 1993. Tinuod, sila nagkinahanglag dugang pang Kingdom Hall samtang duna pay mga tawong mosanong sa “maayong balita sa gingharian [sa Diyos]” ug samtang dunay matukod nga bag-ong kongregasyon. (Mateo 24:14) Busa ang mga Saksi mapasalamaton sa suportar ug mga donasyon sa ilang isigka-Saksi sa tibuok kalibotan. *

Apan labaw sa tanan, sila mapasalamaton sa ilang Diyos nga si Jehova. Sama silag gibati sa salmista kinsa miingon: “Ang tanang nasod nga imong gibuhat moanhi, ug moyukbo sila sa imong atubangan, Oh Jehova, ug magahimaya sa imong ngalan. Kay ikaw dako ug nagabuhat sa katingalahang mga butang.”​—Salmo 86:​9, 10.

[Mga footnote]

[Hulagway sa panid 24]

Sa wala pa magsugod ang proyekto sa pagpanukod ug Kingdom Hall, ang mga tigomanan sagad mga lagkaw lang

[Hulagway sa panid 24]

Karon ang mga kongregasyon magtigom sa mga Kingdom Hall nga sama niini