Mga Paagi Aron Mas Makapakitag Hustisya

BUOT sa atong Maglalalang nga kita mahimong malipayon, malinawon ug hunahuna, ug makahatag usab ug kalipay sa uban. Busa kita iyang gihangyo sa ‘pagpakitag hustisya ug kalulot.’ (Miqueas 6:8) Sa unsang paagi nato kini ipakita? Kinahanglang atong ugmaron ang mga kinaiya nga magpugong kanato sa paghimog mga buhat nga dili subay sa hustisya. Atong tagdon kon sa unsang paagi makatabang ang Bibliya kanato.

PAGBUNTOG SA KADALO. Ang kinamaayohang pangontra sa kadalo mao ang gugma​—dili kini ang romantikong gugma​—kondili ang gugma nga andam mosakripisyo alang sa uban. Kini nga “gugma . . . maluloton,” ug “dili mangita sa kaugalingong kaayohan,” matod pa sa 1 Corinto 13:​4, 5. Dugang pa, kini nga gugma dili lang ipakita ngadto sa pamilya ug mga higala. “Kon inyong higugmaon sila nga nahigugma kaninyo, unsa may inyong ganti?” nangutana si Jesus, kay matod pa niya bisan kadtong wala makaila sa Diyos nahigugma niadtong nahigugma kanila.​—Mateo 5:46.

PAGBUNTOG SA PAGPIHIG. Ang Buhat 10:​34, 35 nag-ingon: “Ang Diyos dili mapihigon, apan sa matag nasod ang tawo nga mahadlok kaniya ug magabuhat sa pagkamatarong dalawaton kaniya.” Ang Diyos dili motan-awg tawo base sa iyang rasa, sekso, o kahimtang sa kinabuhi. Alang kaniya “walay Hudiyo ni Grego, walay ulipon ni tawong gawasnon, walay lalaki ni babaye.” (Galacia 3:28) Kon mosundog kita sa Diyos, mabuntog nato ang pagpihig. Tagda pananglitan si Dorothy nga taga-United States.

Si Dorothy, nga natugaw kaayo sa diskriminasyon, nakahunahuna sa pag-apil sa rebolusyon aron matapos ang pagdaogdaog batok sa mga negro. Apan sulod nianang panahona, nakatambong siyag tigom sa mga Saksi ni Jehova ug nakadayeg kaayo sa mainitong pag-abiabi kaniya sa mga puti ug negro. Wala magdugay, siya nakaamgo nga Diyos lang ang makabag-o sa tinamdan sa tawo. Sa dihang gipakitaan siyag tiunay nga gugma sa puti nga mga Saksi​—mga tawo nga matod pa niya iya “gayong patyon alang sa kawsa sa rebolusyon”​—ang iyang kasingkasing “natandog” ug siya nakahilak.

 PAGBUNTOG SA REBELYOSONG TINAMDAN. Sa wala pa mahimong Kristohanon, ang ubang mga sumusunod ni Jesus maoy mga palahubog, mangingilkil, tighudyaka, ug tigpasipala. Apan sa tabang sa Diyos, kining dili maayong mga kinaiya ilang gipulihag gugma, kalulot, ug pagkamaayo. (1 Corinto 5:11; 6:​9-11; Galacia 5:22) Sa susama, minilyon usab karon nagbag-o sa ilang kinabuhi pinaagi sa pagsimba sa Diyos. Usa kanila mao si Firuddin, nga taga-Azerbaijan.

Si Firuddin nagdako sa balay sa mga ilo ug siya kanunayng makakitag away. Pagdako niya, nahimo siyang instruktor sa mano-manong pagpakigkombate. “Ako walay batasan, mapintas, ug managmal,” siya miingon. “Kon dunay malimtan ang akong asawa nga si Zahra panahon sa pagpangaon​—bisag totpik lang​—ako siyang kulatahon. Ug kon dunay motutok niya samtang maglakaw mi, kulatahon pod nako kadtong tawhana!”

Sa dihang nahibaloan ni Firuddin nga nangaliyupo si Jesus sa Diyos sa pagpasaylo sa mga sundalo nga naglansang kaniya, siya natandog. (Lucas 23:34) Siya nakaingon, ‘Anak sa Diyos lang ang makahimo niana.’ Busa siya gustong makakat-on pag dugang bahin sa Diyos. Sa dihang gitanyagan siya sa mga Saksi ni Jehova ug pagtuon sa Bibliya, iya dayon kining gidawat. Unya, siya nagbag-o. Gani buotan na siya sa iyang asawa nga si Zahra nga tungod niana ang iyang asawa nagtuon usab. Sila karon malinawon ug nagkahiusa sa matuod nga pagsimba.

Tinuod, ang kausaban nga atong himoon sa atong kaugalingon dili makapausab sa kalibotan! Apan unsa kaha kon ang Diyos magpatunghag usa ka bag-ong kalibotan nga walay inhustisya? Dili kana problema kay siya gamhanan! Ug tagda kini: Sa 2 Timoteo 3:​1-4, nga gikutlo sa panid 4, atong nasayran nga klarong gitagna sa Bibliya kon unsay kinaiya sa mga tawo sa atong panahon. Ang tanang detalye niining tagnaa natuman​—sama sa uban pang mga tagna sa Bibliya. Busa angay lang nga mosalig kita sa saad sa Diyos sa pagtapos sa tanang inhustisya. Sa pagkatinuod, makab-ot gayod sa Diyos kana nga katuyoan. Sa unsang paagi?

[Kahon sa panid 7]

ANG PAGPANGITA NI HEIDE UG HUSTISYA

“Natugaw kaayo ko sa pagpihig sa rasa, gubat, kakabos, ug ubang inhustisya, ug nangita kog solusyon,” miingon si Heide nga taga-United States. “Miapil ko sa kawsa alang sa tawhanong katungod ug dayon mianib ug usa ka politikal nga partido, apan kini wala makasulbad sa inhustisya.

“Nakita nako nga gikinahanglan gayod ang dakong kausaban, ug ang kawsa sa mga hippie morag maoy solusyon. Apan wala gihapon kana magsilbi. Akong naobserbahan nga daghang hippie mas interesado sa sekso, droga, ug rock and roll kay sa pagbag-o sa sistema, busa mibati kog grabeng depresyon. Dayon nasangyawan kog Saksi ni Jehova. Iyang gipakita kanako diha sa Bibliya ang mga kausaban nga himoon sa Diyos. Pananglitan, iyang gipakita ang Pinadayag 21:​3, 4, nga nag-ingon nga pahiran sa Diyos ang tanang luha ug wad-on na ang pagbangotan, paghilak, ug kasakit nga maoy kasagarang epekto sa inhustisya. Nakapangutana ko, ‘Tinuod kaha nang saara?’

“Nakombinsir ko nga tinuod kana sa dihang nabasa nako ang giingon sa Bibliya bahin sa gahom ug gugma sa Diyos ug sa gugma nga gipakita sa mga Saksi ni Jehova kanako. Ako karon malipayong nagpaabot sa katumanan sa mga saad sa Diyos.”

[Hulagway sa panid 6]

Ang pagpihig mabuntog kon mosundog kita sa gugma sa Diyos

[Hulagway sa panid 6]

Si Firuddin ug iyang asawa, si Zahra