Pagpaniid sa Kalibotan

Gidili sa bag-ong balaod sa New York City ang pagpanigarilyo diha sa baybayon, parke, ug mga plasa. Ang masakpan pamultahon ug $50. Nanghinaot ang mga opisyales nga sundon sa mga tawo kining balaora ug nga isumbong ang molapas niini.​—THE WALL STREET JOURNAL, U.S.A.

“Sa India, midaghan ang pagpahulog sa gisabak nga batang babaye, ilabina kon duna nay anak nga babaye.” Sa mga pamilya nga duna nay anak nga babaye, ang gidaghanon sa batang babaye nga nangatawo kon itandi sa matag 1,000 ka batang lalaki nga nahimugso mius-os gikan sa 906 niadtong 1990 ngadto sa 836 niadtong 2005.​—THE LANCET, BRITAIN.

Ang World Health Organization nag-ingon nga ang elektromagnetikong radyasyon, sama nianang ibuga sa wireless nga mga gadyet, “posibleng makakanser.”​—INTERNATIONAL AGENCY FOR RESEARCH ON CANCER, FRANCE.

Ang United Nations nalipay nga nawagtang na ang rinderpest (usa ka matang sa sakit sa baka). Kini “ang unang sakit sa mananap nga nawagtang tungod sa paningkamot sa tawo . . . ug sa tanang matang sa sakit nga nawagtang, kini ang ikaduha, sunod sa buti.”​—FOOD AND AGRICULTURE ORGANIZATION OF THE UNITED NATIONS, ITALY.

Andam Na sa Kalaglagan?

“A Legal Manual for an Apocalyptic New York” maoy ulohan sa usa ka artikulo sa New York Times. Kini nagreport bahin sa usa ka manuwal nga magamit dayon sa mga huwes ug abogado ingong reperensiya sa pagsulbad sa lisod nga mga problemang motungha kon dunay “pag-atake sa terorista, radyasyon o kemikal nga kontaminasyon, o epidemya.” Ang manuwal, nga gihimo sa asosasyon sa mga abogado ug sa pamatakang balaod sa New York State, giandam ingong reperensiya kon unsaon pagpadapat ang mga balaod sa kuwarentinas, pagpabakwet, pagrekisa nga walay warrant, pagpatay sa mananap nga may makatakod nga sakit, ug sa pagsuspende una sa balaod.

Sulod sa Daang Unlan

Naputos sulod sa hinlong ponda ang “makaluod nga butang,” miingon si Art Tucker, pangulong doktor nga siyentista sa St. Barts Hospital, London. Ang The Times sa London, nga maoy nagreport sa iyang panukiduki, miingon nga human sa duha ka tuig nga paggamit, kapin sa 30 porsiyento sa gibug-aton sa unlan maoy “buhi ug patayng mga dust mite, mga kinalibang niini, patayng panit sa tawo, ug mga bakterya.” Ang unlan maoy maayong sanayanan sa makaalerdyik nga mga substansiya, kagaw, ug mga mite. Ang solusyon? “Ang mite . . . mokaging ug mamatay kon mabulad sa adlaw,” nag-ingon ang The Times, “sa ato pa, ang naandang batasan sa pagbulad sa unlan ug mga hapin sa kama makatabang sa pagpatay sa mite.” Ang mite dili mamatay sa sabon, apan ang paglaba sa unlan pinaagig init nga tubig makapatay niini, ug mahuswa ang kadaghanan niini.