1. Pag-amping Dihang Mamalit
1. Pag-amping Dihang Mamalit
GAWAS kon imong tinanom, ang imong pagkaon lagmit pinalit diha sa tiyanggihan o supermarket. Unsaon nimo pagpili ug pagpalit ug hinlong pagkaon?
● Planoha kon unsay unahon o ulahion pagpalit.
“Unahag palit ang pagkaong dili kinahanglang irepridyeretor,” nag-ingon ang Food Safety Information Council sa Australia. “Ulahia pagpalit ang pagkaong kinahanglang irepridyeretor o i-freezer.” Kon mopalit kag init nga pagkaon, palita kini sa dayon na nimong uli.
● Pilia ang preskong pagkaon.
Kon mahimo, preskong pagkaon ang palita. * Si Ruth, taga-Nigeria nga duhay anak, miingon, “Sayo sa buntag kong maniyanggi kay presko pa ang palitonon.” Si Elizabeth, nga taga-Mexico, mamalit usab sa tiyanggihan. “Makapalit ko didtog preskong prutas ug utanon, ug ako pa gyoy mopili,” siya miingon. “Bag-ong inihaw nga karne ang akong paliton ug irepridyeretor dayon nako ang dili nako lutoon.”
● Susihag maayo ang paliton.
Pangutan-a ang imong kaugalingon: ‘Daot ba ang panit niini? Ransiyo na ba ang karne?’ Kon ang pagkaon pinutos, tan-awa kon daot ba ang putos, kay ang bakterya makasulod sa pagkaon.
Si Chung Fai, kinsa tigpamalit sa supermarket sa Hong Kong, miingon, “Angayng susihon usab ang expiration date.” Ngano? Ang mga eksperto nagpasidaan nga bisan pag ang expired nga pagkaon dili daot tan-awon, dili pa lain ug baho, ug lami pa, makahatag gihapon kinig sakit.
● Ayoha pagputos.
Kon mogamit kag reusable nga bag o plastik nga basket, hugasi kini kanunayg init tubig nga dunay sabon. Ang isda ug karne ilain ug sudlanan aron ang ubang pinalit dili mataptag bakterya.
Si Enrico ug Loredana, magtiayon sa Italy, mamalit ra sa duol. “Kay kon layo ang palitanan, basig madaot ang pagkaon,” sila miingon. Kon molapas ug 30 minutos ang pagpauli, ibutang ang gipabugnaw o gipayelo nga pagkaon diha sa insulated bag, o isulod sa ubang sudlanan, aron magpabilin kining bugnaw.
Sa sunod nga artikulo, sayra kon unsay himoon aron magpabiling luwas ang pinalit.
[Footnote]
^ par. 6 Tan-awa ang artikulong “Sugyot 1—Pilia ang Sustansiyadong Pagkaon,” sa Marso 2011 nga Pagmata!
[Kahon sa panid 4]
TUDLOI ANG IMONG ANAK: “Ipatan-aw gyod nako sa akong mga anak ang expiration date sa pagkaon sa dili pa kini paliton.”—Ruth, Nigeria
