2. Batasana ang Kahinlo

ARON dili maimpeksiyon ang pasyente, ang doktor manghunaw, mag-esterilisar sa mga instrumento, ug magmentinar ug limpiyong operating room. Sa susama, aron dili mataptag sakit ang imong pamilya, angay nga ikaw, imong kosina, ug pagkaon hinlo kanunay.

● Panghunaw.

Ang Public Health Agency sa Canada miingon nga ang “kamot makapasag mga 80 porsiyento sa sagad makatakod nga mga sakit sama sa ubo ug sip-on.” Busa panghunawg maayo gamit ang sabon ug tubig sa dili pa mokaon, human mangasilyas, ug dihang magpreparar ug pagkaon.

● Mentinaha nga limpiyo ang kosina.

Gipakita sa panukiduki diha sa usa ka nasod nga ang kasilyas sagad mao ang kinalimpiyohang lugar sa balay, ug ang “kinadaghanag bakterya gikan sa hugaw sa tawo mao ang mga espongha nga panghugas sa plato.”

Busa ilisi kanunay ang mga espongha ug paggamit ug init tubig nga dunay sabon o pangontra sa kagaw sa paghinlo sa kosina. Tinuod, hasol kini. Ang balay sa usa ka babaye nga si Bola walay gripo. Siya miingon, “Problema kaayo kini, pero paneguroon gyod namo nga kami dunay sabon ug tubig nga among magamit sa paghinlo sa balay ug kosina.”

● Hugasi ang prutas o utanon.

Sa dili pa ibaligya ang ubang prutas o utanon, tingali kini kontaminado sa hugawng tubig, mananap, hugaw sa tawo, o ubang produkto. Busa hugasi kinig maayo bisag imo kining panitan aron mawagtang ang bakterya. Nagkinahanglan kinig panahon. Si Daiane, nga inahan nga taga-Brazil, miingon, “Kon magsalad ko, dili ko magdalidali aron ang mga utanon mahugasag maayo.”

● Ilain ang karne.

Aron dili magtapontapon ang bakterya, ayohag putos ang tanang karne o isda, ug ilain kini gikan sa ubang pagkaon. Paggamit ug laing tadtaran ug kutsilyo para niini, o hugasig maayo sa init tubig nga may sabon ang tadtaran ug kutsilyo una pa ug human gamita.

Dihang makapanghunaw na ug limpiyo na ang mga gamit ug mga lutoonon, unsay imong himoon aron hinlo ang imong pagpreparar sa pagkaon?

[Kahon sa panid 5]

TUDLOI ANG IMONG ANAK: “Gitudloan namo ang among mga anak sa pagpanghunaw sa dili pa mokaon, ug sa paghugas o paglabay sa pagkaong nahulog.”—Hoi, Hong Kong