3. Ayoha Pagpreparar ug Paghipos ang Pagkaon
3. Ayoha Pagpreparar ug Paghipos ang Pagkaon
USA ka kosinero sa karaang Israel nanguhag ihalas nga mga tabayag bisag dili siya pamilyar niini. Kini iyang gisagol sa linat-an. Ang nangaon, kay nahadlok nga basig makalanag ang sabaw, naninggit: ‘Adunay kamatayon diha sa kulon.’—2 Hari 4:38-41.
Kini nga asoy nagpakita nga kinahanglang ayohon pagpreparar ang pagkaon aron kini dili makadaot o makamatay. Aron dili kini mahugawan, preparaha ug hiposa kinig maayo. Aniay upat ka sugyot:
● Pahumoka ang karne diha sa repridyeretor.
Ang Department of Agriculture sa U.S.A. nag-ingon nga bisan tuod nagyelo pa ang tungatunga sa karne, ang ibabawng bahin niini sanayan ug mga bakterya kon ang temperatura niini mosaka gikan sa 4 grado Celsius ngadto sa 60 grado Celsius. Busa ang karne pahumoka diha ra sa repridyeretor, sa microwave, o isulod sa plastik nga walay buslot ug ihumol sa bugnawng tubig.
● Lutoag maayo.
Ang World Health Organization nag-ingon nga ang “paglutog maayo makapatay sa halos tanang bakterya.” Kon magluto, ilabinag sabaw ug linat-an, tinoa nga ang kainiton dili moubos sa 70 grado Celsius. * Sanglit lisod man mahibaloan ang kainiton sa tungatunga sa karne, daghang tigluto mogamit ug termometro.
● Idalit dayon.
Ayaw pasagding mabugnaw ang linutong pagkaon, idalit dayon kini aron dili madaot. Ang pagkaong kinahanglang ipabugnaw idalit nga bugnaw ug ang bag-ong luto nga pagkaon idalit nga init. Aron magpabiling init ang sud-ang karne, ibutang kini sa oven sa kainiton nga 93 grado Celsius.
● Ayohag tipig ang salin nga pagkaon.
Idalit dayon ni Anita, nga inahang taga-Poland, ang pagkaon inigkaluto. Apan kon dunay sobra sa lutoonon, siya miingon, “i-freezer dayon nako kini pero ako kining isulod sa gagmayng mga sudlanan aron mas daling pahumokon.” Kon irepridyeretor nimo ang salin nga pagkaon, ayaw kini paabtig kapin sa tulo o upat ka adlaw.
Diha sa restawran, siyempre lain na ang magluto. Busa, unsay imong himoon aron ang imong pamilya dili makakaon ug hugawng pagkaon?
[Footnote]
^ par. 7 Ang ubang karne, sama sa karne sa manok, kinahanglang lutoon sa mas init nga temperatura.
[Kahon sa panid 6]
TUDLOI ANG IMONG ANAK: “Kon magluto ang akong mga anak, pahinumdoman nako sila sa pagbasa o pagsunod sa mga instruksiyon sa pakete.”—Yuk Ling, Hong Kong
