4. Pag-amping Kon Mangaon sa Restawran

Si Jeff, nga himsog nga 38 anyos, ug ang iyang pamilya nangaon sa restawran duol sa Pittsburgh, Pennsylvania, U.S.A. Paglabayg usa ka bulan, si Jeff namatay kay nadaot ang iyang atay. Ang nakaingon? Ang sibuyas nga iyang nakaon kontaminado ug hepatitis A.

HALOS katunga sa gastos sa pagkaon diha sa usa ka nasod sa Kasadpan, gigasto sa pagpangaon diha sa restawran. Apan nianang nasora, ang pagkaon sa restawran maoy hinungdan sa halos katunga sa mga kaso sa sakit nga nakuha gikan sa pagkaon.

Kon sa restawran ka mokaon, siyempre lain ang mamalit sa lutoonon, manghinlo sa kosina, ug magluto. Pero ikaw ang magbuot kon asa mokaon, unsay kaonon, ug kon dad-on ba ang salin nga pagkaon.

● Tan-awa ang palibot.

Si Daiane nga taga-Brazil miingon: “Inigsulod namo sa restawran tan-awon una nako ang palibot kon dili ba hugaw ang lamesa, mantel, kubyertos, ug pangsandok. Kon hugaw, mogawas mi ug mangitag laing restawran.” Sa ubang nasod, kanunayng inspeksiyonon ug gradohan sa health inspector ang restawran sa kahinlo, ug ilang ipaskin ang grado aron mabasa sa publiko.

● Pag-amping sa salin nga pagkaong dad-on sa balay.

Ang Food and Drug Administration sa U.S.A. miingon: “Ayaw nag dad-a sa balay ang salin nga pagkaon kon dili ka pa makauli sulod sa duha ka oras, [o iuli dihadiha kon ang temperatura molapas ug 32 grado Celsius].” Kon magdala kag salin nga pagkaon, pauli dayon ug irepridyeretor dayon kini.

Kon imong sundon kining upat ka paagi niining serye sa mga artikulo, makaseguro ka nga luwas ang imong pagkaon.

[Kahon/Hulagway sa panid 7]

TUDLOI ANG IMONG ANAK: “Among gitudloan ang among mga anak sa dili pagkaon ug pagkaon nga basig hugaw.”—Noemi, Philippines