Akong Nakaplagan ang Tinuod nga Gugma ug Pakigdait

Sumala sa giasoy ni Egidio Nahakbria

Nagdako ko nga mibating walay nagmahal nako. Apan karon tugob na ako sa pagmahal ug may kalinaw sa hunahuna. Sa unsang paagi nahitabo kini nga kausaban? Paasoya ako.

N ATAWO ako niadtong 1976 diha sa usa ka payag sa kabukiran sa East Timor, nga bahin kaniadto sa Indonesia. Ikawalo ako sa napulo ka anak ug pobre kaayo ang akong ginikanan. Sanglit naglisod man sila sa pagbuhi namong tanan, ilang gihangyo ang akong ig-agaw sa pagpadako nako ug ang akong kaluha maoy ilang gipili nga ibilin.

Niadtong Disyembre 1975, sa wala pa ko matawo, giatake sa Indonesia ang East Timor ug nagsugod ang gerilya nga gubat nga mikabat ug kapin sa 20 ka tuig. Busa ang akong mga panumdoman sa bata pa ako pulos lang kapintasan ug pag-antos. Dili nako malimtan ang pag-atake sa mga sundalo diha sa among baryo nga tungod niini ang mga tawo mikalagiw. Kami sa akong ig-agaw nagbaktas paingon sa mingawng kabukiran nga gibakwetan sa libolibo ka tawo.

Apan nahibaloan sa mga sundalo ang lugar nga among gitagoan, ug dayon ila kaming gipaulanan ug bomba. Lab-as pa sa akong panumdoman ang makalilisang nga kapintasan, kamatayon, ug kalaglagan. Sa dihang nakauli mi sa among baryo, kanunay kong mahadlok. Daghan sa among mga silingan nangawala o gipatay, ug nahadlok ko nga basig ako na poy isunod.

Sa 10 anyos pa ko, nasakit ang akong ig-agaw ug namatay, busa gidala ako sa akong ginikanan ngadto sa akong lola. Siya biyuda ug wala nay gana sa kinabuhi ug para niya pabug-at lang ko. Sulugoon ang iyang pagtratar nako. Usa ka adlaw niana, sa dihang wala ko motrabaho kay nagsakit, iya kong gibunalan ug gipasagdang mamatay. Maayo na lang kay gikuha ko sa akong uyoan ug gipapuyo uban sa iyang pamilya.

Dose anyos ko nga nakasugod ug eskuyla. Wala magdugay, nagsakit ang akong iyaan ug nag-antos sa depresyon ang akong uyoan. Sanglit dili ko gustong makapabug-at nila, milayas ko ug miuban sa usa ka grupo sa mga sundalo sa Indonesia nga nagkampo sa lasang. Akoy ilang tiglaba, tigluto, ug tighinlo. Kay maayo sila nako, mibati ko nga hinungdanon. Paglabay sa daghang bulan, natultolan ko sa akong mga paryente ug ilang giingnan ang mga sundalo sa pagpapauli nako ngadto sa akong baryo.

 Nahimong Aktibista

Paggraduwar nakog hayskul, mibalhin kog puyo sa Dili, ang kaulohan sa East Timor, ug mieskuyla sa unibersidad. Daghan kog nakailang mga estudyante nga sama nakog kaagi. Among nakita nga politika ang bugtong solusyon aron ang East Timor makabatog kausaban ug independensiya. Ang among grupo nag-organisar ug daghang demonstrasyon, nga sagad miresultag mga rayot. Daghan sa akong mga higala nasamdan ug ang uban nangamatay.

Dihang nahimong independente ang East Timor niadtong 2002, ang nasod gusbat ug libolibo ang nangamatay ug nawad-ag pinuy-anan. Naglaom ko nga moarang-arang na ang kahimtang. Apan daghan gihapon ang walay trabaho, pobre, ug gubot gihapon ang politika.

Bag-ong Direksiyon sa Kinabuhi

Niadtong panahona, nagpuyo ko uban sa akong mga paryente, usa kanila mao si Andre, nga gitun-an ug Bibliya sa mga Saksi ni Jehova. Kay debotado man ko nga Katoliko, wala ko makauyon nga si Andre nagsusi ug ubang relihiyon. Pero gusto kong mahibalo bahin sa Bibliya ug usahay basahon nako ang iyang Bibliya nga gibutang didto sa iyang kuwarto. Nainteres kog samot sa akong nabasa.

Dayon niadtong 2004, gihatagan ko ni Andre ug imbitasyon sa Memoryal sa kamatayon ni Jesus, ug gusto kong motambong. Nasipyat ko pagbasa sa imbitasyon mao nga miabot ko nga sayo ug mga duha ka oras. Pag-abot sa lokal ug langyawng mga Saksi, mainiton nila akong gilamano ug giabiabi. Natandog kaayo ko. Panahon sa pakigpulong sa Memoryal, ang tanang teksto nga gihisgotan akong gisulat sa notbok ug sa ulahi ako kining gitan-aw diha sa akong Katolikong Bibliya kon tinuod ba ang gisulti sa mamumulong. Ug tinuod gyod kini!

Pagkasunod semana, mitambong kog Misa sa among simbahan. Sanglit ako ug ang uban naulahi man ug abot, ang pari mikuhag kahoy ug iya kaming giabog. Samtang nagtindog kami sa gawas, gitapos sa pari ang iyang Misa pinaagi sa pag-ingon, “Hinaot ang kalinaw ni Jesus maanaa kaninyo.” Usa ka isog nga babaye misinggit, “Maayo kaha nang manghinaot kag kalinaw unya imong giabog ang mga tawong naulahig abot?” Wala siya tagda sa pari. Milakaw ko ug wala na gyod mobalik.

Wala magdugay, nagsugod ko sa pagtuon sa Bibliya ug sa pagtambong sa mga tigom sa mga Saksi uban kang Andre. Ang among mga paryente nasuko ug misupak. Gibaharan kami sa lola ni Andre: “Magkalot ko ug ilubong ta mo kon magpadayon mog tuon nianang bag-ong relihiyon.” Apan wala kami mahadlok sa iyang pamahad. Determinado kami sa pagpauswag sa among kahibalo sa Bibliya.

Naghimog mga Kausaban

Samtang nagtuon ko sa Bibliya, akong nakat-onan kon unsay gugma. Tig-a ko nga pagkatawo ug walay pagsalig sa uban. Apan ang mga Saksi nagpakitag kahingawa kanako. Dihang nagsakit ko ug gipasagdan sa akong mga paryente, giduaw ug gitabangan ko sa mga Saksi. Ang ilang gugma dili “sa pulong lang” kondili “matuod nga gugma, nga makita sa buhat.”—1 Juan 3:18, Today’s English Version.

Bisan pa sa akong isog nga panagway ug kinaiya, ang mga Saksi nagpakitag “inigsoong pagbati.” (1 Pedro 3:8) Sa unang higayon mibati ko nga ako gihigugma! Ako nahimong malumo ug nakakat-on sa paghigugma sa Diyos ug sa isigkatawo. Busa sa Disyembre 2004, gipahinungod nako ang akong kinabuhi kang Jehova ug nagpabawtismo. Wala magdugay, si Andre nagpabawtismo usab.

Mga Panalangin Bisan pa sa Kagubot

Human mabawtismohi, gusto kaayo kong motabang sa uban nga wala makasinatig tinuod nga gugma o hustisya. Busa misulod ko sa bug-os-panahong pag-alagad, o pagpayunir, nga maoy pagtawag sa mga Saksi ni Jehova niana. Ang pagpaambit sa mensahe sa Bibliya mas makapalipay kay sa pag-apil sa mga demonstrasyon ug mga rayot. Sa kataposan, nagtabang na gyod kog mga tawo!

Niadtong 2006, nagkagubot na usab ang East Timor. Ang politikal nga mga grupo nag-awayay tungod sa dugay nang mga kasungian. Ang siyudad sa Dili giatake ug daghang taga-sidlakan nangalagiw. Ako ug ang ubang Saksi mikalagiw  ngadto sa Baucau, usa ka dakong lungsod mga 120 kilometros sidlakan sa Dili. Bisag lisod ang among kahimtang, kami gipanalanginan kay nakatukod kamig bag-ong kongregasyon—ang unang kongregasyon sa gawas sa Dili.

Paglabayg tulo ka tuig, niadtong 2009, gidapit ako sa pagtungha sa usa ka espesyal nga klase para sa bug-os-panahon nga Kristohanong mga ministro didto sa Jakarta, Indonesia. Kinasingkasing ako nga giabiabi sa mga Saksi didto. Natandog kaayo ko sa ilang tiunayng gugma. Gibati gyod nako nga bahin ako sa tibuok-kalibotang “kapunongan sa mga igsoon,” usa ka internasyonal nga “pamilya,” nga nahingawa gyod kanako.—1 Pedro 2:17.

Nakaplagan Na Gyod Nako ang Pakigdait!

Human sa maong klase, mipauli ko sa Baucau. Nalipay ko sa pagtabang sa mga tawo dinhi sa pagkakat-on bahin sa Diyos, sama nga natabangan ako sa uban. Pananglitan, sa usa ka layo nga baryo sa gawas sa Baucau, ako ug ang uban nagtudlog Bibliya sa mga 20 ka tawo, ang pipila kanila mga edaran nga dili makamaong mobasa ug mosulat. Silang tanan tigtambongan sa senemanang mga tigom, ug tulo kanila sakop na sa among espirituwal nga “pamilya” ingong bawtismadong mga membro sa Kristohanong kongregasyon.

Sa miagi, duna koy nakailang buotang dalaga nga si Felizarda. Siya midawat sa kamatuoran sa Bibliya ug kusog nga miuswag ug nagpabawtismo. Nagminyo kami niadtong 2011. Ako nalipay usab nga ang akong paryenteng si Andre nag-alagad sa opisina sa mga Saksi ni Jehova sa East Timor. Karon, ang kadaghanan sa akong mga paryente, hasta ang lola ni Andre kinsa namahad nga iya kaming ilubong, dili na supak sa akong tinuohan.

Kaniadto ako may kasuko ug mibati nga wala higugmaa ug dili-hiligugmaon. Apan tungod kang Jehova, sa kataposan akong nakaplagan ang tinuod nga gugma ug pakigdait!

[Hulagway sa panid 19]

Si Egidio niadtong aktibista pa

[Hulagway sa panid 21]

Si Egidio ug Felizarda uban sa mga membro sa Baucau Congregation sa East Timor