Ang Imong Pagkaon Luwas Ba?

“Eskuylahan sa Germany Way Klase Tungod sa E. Coli.”—REUTERS NEWS SERVICE, GERMANY.

“Epidemya sa Salmonella sa Lima ka Estado Tawgi ang Hinungdan.”—USA TODAY.

“Karne sa 6 ka Baka nga Nakakaog Kompay nga Kontaminadog Radyasyon Nakaabot sa 9 ka Probinsiya.”—THE MAINICHI DAILY NEWS, JAPAN.

KINI ang mga ulohan sa balita sulod sa duha ka semana sa miaging tuig. Ang mga tigdukiduki nag-ingon nga tuigtuig mga 30 porsiyento sa mga tawo sa datong mga nasod mataptag sakit nga makuha gikan sa pagkaon.

Unsay imong reaksiyon niining mga balitaa? “Nabalaka ko ug nasuko,” miingon si Hoi nga taga-Hong Kong. “Duha ang akong anak, ug nabalaka ko kon diin gikan ang pagkaon ug giunsa kini pagpreparar.”

Sa pobreng mga nasod, ang sakit nga makuha gikan sa pagkaon ug tubig makapatayg minilyon matag tuig—kadaghanan mga bata. “Ang pagkaon sa mga tiyanggihan dinhi walay tabon mao nga kini langawon, maulanan, mahanginan, ug maabogan,” matod ni Bola nga taga-Nigeria. “Dihang makabalita ko bahin sa mga sakit nga nakuha gikan sa pagkaon, mahadlok ko. Dili ko gustong magsakit ang akong pamilya.”

May mahimo ka ba aron maproteksiyonan ang imong pamilya? Ang Canadian Food Inspection Agency miingon: “Kon ang mga grocery makabaligyag kontaminadong pagkaon, kini mabalita dayon. Ug angay lang. Apan mahimo usab nga kita ang hinungdan nga ang atong pagkaon makahatag ug sakit—tungod sa atong gihimo o wala himoa diha sa kosina.”

Unsay imong mahimo aron maproteksiyonan ang imong pamilya? Atong hisgotan ang upat ka paagi aron mahimong luwas ang imong pagkaon.

[Kahon sa panid 3]

KINSAY MAMELIGRO?

Mga tawong mameligrong masakit tungod sa kontaminadong pagkaon:

● Mga batang wala pay singko anyos

● Mga mabdos

● Mga tawong kapin sa 70 anyos

● Mga tawong huyang ug resistensiya

Kon ikaw o ang imong kauban sa pagpangaon lakip niini nga kategoriya, pagbantay gyod sa pagkaong imong preparahon, idalit, ug kaonon.

[Credit Line]

Source: New South Wales Food Authority, Australia.