ANG mga tawo dugay nang nagtuo nga ang patay makagiya sa mga buhi. Usa ka karaang pananglitan niini mabasa diha sa asoy bahin kang Odysseus (ginganlan usab ug Ulysses) nga gisulat sa Gregong magbabalak nga si Homer. Niini nga asoy, si Odysseus gustong mahibalo kon unsaon niya pagpauli sa iyang natawhang isla sa Ithaca, busa miadto siya sa kalibotan sa mga patay sa pagkonsulta sa namatay nang mananag-an.

Kay naglaom nga matubag sa mga patay ang lisod nga mga pangutana, daghan ang mikonsultag mga espiritista, natulog diha sa lubnganan sa ilang katigulangan, o naghimog mga rituwal. Tinuod ba gyod nga makagiya kanato ang mga patay?

Kaylap nga Batasan

Daghan sa pangunang mga relihiyon sa kalibotan nagtudlo nga ang tawo makapakigsulti sa mga patay. Ang Encyclopedia of Religion miingon nga ang “necromancy, ang batasan sa pagpakigsulti sa mga patay pinaagig mga orasyon, maoy usa ka matang sa pagdiwata.” Dayon kini midugang nga “daghan” ang nagahimo niini. Gipamatud-an kini sa New Catholic Encyclopedia pinaagi sa pag-ingon nga “ang necromancy, bisag unsa pa nga matang, kaylap sa tibuok kalibotan.” Nan, dili ikahibulong nga ang ubang membro sa mga relihiyon nakasulay sa pagkonsultag mga espiritu!

Bisag ang pagpakigsultig mga patay “giisip sa Simbahan nga salawayon nga buhat,” matod pa sa New Catholic Encyclopedia, “daghan ang naghimo niini panahon sa Middle Ages ug sa Renaissance.” Unsay giingon sa Bibliya bahin niini?

Angay Ka Bang Makigsulti sa Patay?

Sa karaang panahon, gisugo ni Jehova nga Diyos ang iyang katawhan: “Walay makaplagan diha kanimo . . . bisan kinsa nga nagapakisayod sa mga patay.” (Deuteronomio 18:9-13) Nganong gidili man kini ni Jehova? Kon posible nga makapakigsulti ang mga buhi sa mga patay, wala unta kini idili sa Diyos kay siya gugma man, dili ba? Apan imposible gyod kini. Ngano?

Ang Bibliya makadaghang naghisgot nga ang mga patay walay kalibotan. Tagda ang giingon sa Ecclesiastes 9:5: “Ang mga buhi nasayod nga sila mamatay; apan bahin sa mga patay, sila walay nahibaloan nga bisan unsa.” Ang Salmo 146:3, 4 nag-ingon: “Ayaw ibutang ang inyong pagsalig sa mga hamili, ni sa anak sa yutan-ong tawo, nga kaniya walay kaluwasan. Mogula ang iyang espiritu, mobalik siya sa iyang yuta; nianang adlawa mahanaw ang iyang mga hunahuna.” Ug si manalagnang Isaias nag-ingon usab nga ang patay “walay gahom.”—Isaias 26:14.

Apan daghan ang nagtuo nga pinaagi sa espiritistikong mga buhat, sila nakapakigsulti sa namatayng mga minahal. Daghan ang nag-ingon nga sila dunay naestorya gikan sa kalibotan sa mga espiritu. Apan sumala sa nahisgotang mga teksto, dili ang mga patay ang ilang naestorya. Nan kinsa man diay?

Kinsay Ilang Naestorya?

Ang Bibliya nag-ingon nga daghang espiritung mga anak sa Diyos mirebelde sa ilang Magbubuhat ug nahimong mga demonyo. (Genesis  6:1-5; Judas 6, 7) Sila ang promotor sa bakak nga ideya nga ang tawo magpabiling buhi inigkamatay. Aron patuohon ang mga tawo niini nga kabakakan, sila magpakaaron-ingnong mao ang mga tawong namatay nga nakig-estorya sa mga buhi.

Ang Bibliya nag-asoy nga si Haring Saul sa Israel, human isalikway ni Jehova kay masinupakon, misulay sa pagpakigsulti sa namatay nang manalagna nga si Samuel pinaagig espiritista. Si Saul nakadawat ug mensahe, apan dili gikan kang Samuel. Sa pagkatinuod, si Samuel sa buhi pa dili gani gustong makigkita sa hari ug supak pod siya sa mga espiritista. Busa ang mensahe nga nadawat ni Saul maoy gikan sa demonyo nga nagpakaaron-ingnong si Samuel.—1 Samuel 28:3-20.

Ang mga demonyo maoy mga kaaway sa Diyos, ug ang pagpakigkontak kanila peligroso kaayo. Busa ang Bibliya nagsugo: “Ayaw kamo pagdangop sa mga espiritista, ug ayaw pagkonsulta sa mga tigpanag-an sa mga hitabo, sa ingon mahimong mahugaw tungod kanila.” (Levitico 19:31) Ang Deuteronomio 18:11, 12 nagpasidaan: “Bisan kinsa nga nagakonsultag espiritista . . . dulumtanan kang Jehova.” Sa pagkatinuod, usa sa daotang buhat ni Haring Saul nga niana gisilotan siya ni Jehova ug kamatayon mao ang iyang “pagpangutana sa usa ka espiritista.”—1 Cronicas 10:13, 14.

Nan, kinsay imong konsultahon kon nagkinahanglan kag labing maayong giya dihang makaatubang ug lisod nga pangutana o desisyon? Ang Bibliya nag-ingon nga si Jehova mao ang “Dakong Instruktor.” Kon ikaw ug ang imong mga minahal mokonsulta sa iyang Pulong, ang Bibliya, ug mosunod sa gitudlo niana, daw nahisama kini nga “ang imong mga igdulungog makadungog ug pulong sa imong luyo nga mag-ingon: ‘Mao kini ang dalan. Lakaw kamo niini.’” (Isaias 30:20, 21) Bisan tuod ang mga Kristohanon karon dili makadahom nga literal nga makadungog sa tingog sa matuod nga Diyos, siya makagiya kanila pinaagi sa Bibliya. Oo, sama ra nga si Jehova nag-ingon: ‘Himoa ako nga imong giya.’

NAKAPAMALANDONG KA BA?

● Unsay hunahuna sa Diyos kon ang usa mosulay sa pagpakigsulti sa mga patay?—Deuteronomio 18:9-13.

● Ang mga patay ba makahatag ug mensahe sa mga buhi? Nganong kanay imong tubag?—Ecclesiastes 9:5.

● Kang kinsa kita angayng mangayog giya?—Isaias 30:20, 21.