Batik—Nindot nga Panapton sa Indonesia

ANG batik gigamit na sa mga tawo sukad pa sa karaang panahon. Kini isul-ob sa mga harianon sa espesyal nga mga okasyon, ug isul-ob usab kini sa ordinaryong mga naninda sa tiyanggihan. Kini nindot, lainlaig kolor, ug daghag disenyo. Apan unsa ang batik? Giunsa kini paghimo? Diin nagsugod ang paghimog batik? Ug unsay gamit niini karon?

Ang batik maoy usa ka panapton nga taas nag kasaysayan. Ang pagdisenyo niini maoy pinaagig linaing teknik sa pagtina ug kini nahimong bahin sa kinabuhi ug kultura sa Indonesia. Dunay susama niini nga mga panapton nga popular usab sa tibuok kalibotan.

Paggamit sa Tina ug Espirma

Ang tighimog batik mogamit ug tumbagang pangdrowing nga sudlag espirma sa pagdrowing ug mga disenyo diha sa panapton. Inigkauga sa espirma, ang panapton tinaon. Ang nabutangag espirma dili malubaran sa tina. Kon lainlain ang kolor ug disenyo, ang pagtina sublisublion.

Sa tungatunga sa ika-19ng siglo, ang tighimog batik mogamit ug tumbagang pangtimbre sa pagbutang sa espirma. Kining paagiha mas paspas kay sa paggamit ug tumbagang pangdrowing. Kini magamit sa paggamag mga batik nga usa rag disenyo. Sa ika-20ng siglo, ang mga pabrika nagsugod sa paghimog disenyo pinaagig silk screen. Ang kinamot pagkahimo nga batik mapalit gihapon. Pero mas daghan na karon ang batik nga ginama sa pabrika.

Ang algodon o seda sagad maoy himoong batik. Ang mga tina maoy gikan sa mga dahon, kahoy, panit sa kahoy, ug mga panakot, apan ang artipisyal nga mga tina gigamit gihapon. Sa dili pa uso ang espirma, ang gamiton sa paghimog disenyo mao ang almirol, sebo, ug lapok. Sagad artipisyal nga espirma nay gigamit karon. Pero gigamit gihapon ang espirma nga sinagolan ug talo.

Karaan Na Pero Dili Mabiyaan sa Panahon

Dili matino kon kanus-a ug diin nagsugod ang paghimog batik. Sa China, may mga ritaso sa batik nga gikan pa niadtong ikaunom nga siglo C.E. Walay nahibalo kon kanus-a nakadangat didto sa Indonesia ang paghimog batik, apan sa ika-17ng siglo, may mga ebidensiya nga ang Indonesia nangangkat o namaligyag batik.

Sa milabayng mga dekada, ang batik napopular ug nahimong simbolo sa nasod sa Indonesia. Sa 2009, agig pasidungog sa dugay nang paglungtad sa batik sa Indonesia ug sa epekto niini sa kultura sa nasod, gilista sa UNESCO ang batik ingong bahin sa “Intangible Cultural Heritage of Humanity” niining nasora.

Gamit sa Batik

Dunay tradisyonal nga paagi sa pagsul-ob, pagpilo, ug paghimog batik nga nalangkit sa mga tinuohan ug mga patuotuo. Dunay partikular nga mga kolor ug disenyo sa batik nga magpaila kon diing probinsiya kini gihimo. Pananglitan, ang batik sa amihanang kabaybayonan  sa Java hayag ug kolor nga sagad may disenyong mga bulak, langgam, ug mananap. Apan ang batik sa sentro sa Java dili kaayo daghag kolor, ug ang mga disenyo sagad lingin-lingin, kuwadro-kuwadro, o trayanggulo. Dunay mga 3,000 ka disenyo sa batik.

Ang tradisyonal nga batik mao ang selendang, nga usa ka kupo o panaptong isablay sa abaga sa babaye. Gamiton nila kini sa pagkargag bata o butanganag mga pinalit. Kini gamiton usab nilang pandong.

Ang mga lalaki mogamit ug batik nga ibaligtos sa ulo, nga gitawag ug iket kepala. Isul-ob kini sa pormal nga mga okasyon.

Laing popular nga batik mao ang panaptong itapis, nga gitawag ug malong. Usahay ang masigkatumoy sa panapton isumpay pagtahi. Ang malong ibaligtos diha sa hawak nga mahimong sayal-sayal. Kini isul-ob sa lalaki ug babaye.

Ang batik magamit sa halos tanang estilo sa besti sama sa karsones, boda, ug uban pa. Kini idekorar ingong painting, gamitong dekorasyon sa bungbong, mantel, hapin sa kama, ug uban pa. Ang mga turista nga manuroy sa tiyanggihan sa Indonesia makakitag batik nga mga bag, sandal, lampshade, ug bisan tabon sa laptop. Busa kini daghan kaayog gamit. Tinuod gyod nga nindot kini nga panapton!

[Hulagway sa panid 23]

Tumbagang pangdrowing nga sudlag espirma sa pagdrowing ug mga disenyo

[Hulagway sa panid 23]

Ang panapton diin ang disenyo gibutangag espirma balikbalik nga ituslob sa tina

[Mga hulagway sa panid 23]

Gamit sa Batik

1. Selendang

2. Iket kepala

3. Malong