EURO 2012—Makasaysayanhong Kompetisyon

GANAHAN ka bang motan-aw o modulag football? Kon mao, tingali nahibalo ka na nga ang UEFA (Union of European Football Associations) EURO 2012 dunay himoong mga dula nga magsugod sa Hunyo 8, sa Warsaw, Poland, ug ang championship himoon sa Hulyo 7, sa Kiev, Ukraine. Unsa ang EURO 2012, ug unsang mga preparasyon ang gihimo? Nganong makasaysayanhon kini nga kompetisyon?

“Nagkahiusa sa Paghimog Kasaysayan”

Sukad sa 1960, ang Europe nagpahigayon ug football championship matag upat ka tuig. Ang mga nasod nga nakapahigayon na niini nga kompetisyon mao ang Austria, Belgium, England, France, Germany, Italy, Netherlands, Portugal, Spain, Sweden, Switzerland, ug Yugoslavia.

Niining tuiga, ang final tournament dulaon didto sa Poland ug Ukraine. Sa Poland, kini dulaon diha sa mga siyudad sa Gdańsk, Poznan, Warsaw, ug Wroclaw. Sa Ukraine, kini dulaon diha sa Donetsk, Kharkiv, Kiev, ug L’viv.

Sumala sa UEFA, kini “ang ikatulong higayon diin ang final tournament dulaon diha sa duha ka nasod (ang una sa Belgium/Netherlands niadtong 2000 [ug ang ikaduha sa] Austria/Switzerland  niadtong 2008).” Apan makasaysayanhon ang EURO 2012. Ngano? Ang final tournament niining tuiga dili lang maoy resulta sa kooperasyon sa duha ka nasod ug sa mga nag-organisar niini kondili unang higayon usab nga kini ipahigayon diha sa mga nasod sa Central ug Eastern Europe. Busa, ang slogan nga “Nagkahiusa sa Paghimog Kasaysayan” mao ang napili alang niining tuiga.

Mga Preparasyon

Siyempre, ang usa sa labing importante sa bisan unsang kompetisyon mao ang pagbaton ug pasilidad nga kadulaan. Tungod niana, giayo sa mga siyudad sa Poznan ug Kharkiv ang ilang mga estadyum, samtang ang ubang unom ka siyudad nagtukod ug bag-o. Kini nga mga estadyum kalingkoran ug mga 358,000 ka tawo.

Sanglit daghan man kaayo ang gidahom nga motan-aw niini, giplano pag-ayo sa mga opisyales sa siyudad ang seguridad niini. Libolibong guwardiya ang gibansay. Ang Science & Scholarship in Poland nag-ingon nga apil sa ilang pagbansay ang “pagpraktis sa mga pamaagi sa seguridad panahon sa 140 ka dula hasta ang . . . pagkontrol sa tawo, pagtaganag luwas nga mga lugar, ug pagpakigkooperar sa langyawng mga guwardiya sa mga tem.”

Nganong gikinahanglan ang seguridad? Una sa tanan, nahibalo ang mga opisyales nga ang dagkong kompetisyon mahimong target sa mga terorista. Sila nahibalo usab nga peligroso ang samokang mga tumatan-aw, ingon sa gipakita sa mga insidente sa mapintas nga kagubot sa nangaging mga dula.

Timbang nga Panglantaw

Ikasubo, daghang tumatan-aw mga panatiko. “Maguol kaayo ko kon ang akong tem mapildi,” miingon ang usa ka tawo. “Mas mabalaka ko nga kon dunay mahitabong nukleyar nga gubat, dili mahinayon ang dula sunod semana.”

Apan tagda ang timbang nga panglantaw bahin sa kalingawan nga atong mabasa diha sa karaang basahon sa kaalam—ang Bibliya. Giila niini ang bili sa maayo nga kalingawan, nga nag-ingon nga dunay “panahon sa pagkatawa . . . ug panahon sa paglukso.” (Ecclesiastes 3:1-4) Gidasig usab sa Bibliya ang pagkamakasaranganon. (1 Timoteo 3:2, 11) Busa, kon mohimog desisyon kon unsay unahon sa atong kinabuhi, maalamon nga atong sundon ang tambag sa Bibliya sa “pagkahibalo sa kalainan tali sa kon unsay importante ug dili” ug dayon “pilion kon unsay importante.”—Filipos 1:10, Easy-to-Read Version.

[Kahon/Hulagway sa panid 25]

PAGPANIGARILYO GIDILI SA EURO 2012

Niadtong Oktubre 20, 2011, gianunsiyo sa UEFA nga ilang “ipatuman ang bug-os nga pagdili sa paggamit, pagbaligya, o pag-anunsiyog sigarilyo diha sa tanang estadyum nga dulaan sa UEFA EURO 2012.” Ang rason? “Gidili sa EURO 2012 ang pagpanigarilyo aron panalipdan ang panglawas sa mga tumatan-aw ug sa tanang nalangkit sa kompetisyon,” miingon si Michel Platini, presidente sa UEFA. Usa sa miuyon niini mao ang European Commissioner nga si Androulla Vassiliou, kinsa nag-awhag sa mga siyudad nga magpahigayon sa mga dula nga idili usab ang pagpanigarilyo sa ubang lugar, sama diha sa restawran ug sa publikong transportasyon. Matod ni Vassiliou, “ang football ug sport makaayo sa panglawas ug sa pagdula, apan kasukwahi ang ikahatag sa sigarilyo: kini dili maayong kombinasyon.”

[Mapa sa panid 24]

(Alang sa aktuwal nga pagkahan-ay, tan-awa ang publikasyon)

POLAND

WARSAW

Gdańsk

Poznan

Wroclaw

UKRAINE

KIEV

L’viv

Kharkiv

Donetsk

[Hulagway sa panid 24]

Championship game sa EURO 2008 tali sa Germany ug Spain, nga gidula didto sa Ernst Happel Stadium sa Vienna, Austria

[Hulagway sa panid 25]

Olympic Stadium sa Kiev, Ukraine

[Picture Credit Line sa panid 25]

Pages 24 and 25, both photos: Getty Images