Gikan sa Among mga Magbabasa

Hospice Care—Unsay Tumong Niini? (Hulyo 2011) Usa ko ka social worker assistant nga gibansay diha sa usa ka espesyal nga ospital, ug tinuod gyod ang inyong giingon diha sa Hulyo 2011 nga gula sa Pagmata! Ang mga pasilidad nga nasangkapan sa pag-atiman sa mga pasyenteng gitagalan na ang kinabuhi gikinahanglan kaayo karon. Naghinamhinam gyod ko sa pag-abot sa kagamhanan sa Diyos, diin walay usa unya ang moingon, “ako masakiton,” ug sa dihang pahiran sa Diyos ang mga luha gikan sa atong mga mata.—Isaias 33:24; Pinadayag 21:3, 4.

M. R., Italy

Wala ko malipay nga nakabasag pulong nga “dayaper” diha sa artikulo. Kining pulonga makapaubos sa dignidad sa tawong kinahanglang magsul-ob niini. Walay pulong nga “dayaper” ang mabasa diha sa mga pakete niini.

Ngalan wala ipaila, United States

Ang “Pagmata!” nagtubag: Salamat sa imong pagmatikod niini. May simpatiya kami sa tanan nga dunay grabeng sakit, ug dili namo gustong madugangan ang pag-antos sa mga masakiton pinaagi sa paggamit ug termino nga giisip sa uban nga makapaubos sa dignidad. Pasayloa kami sa kasakit nga among nahatag sa among mga magbabasa.

Mga Batan-on Nangutana . . . Unsay Angay Nakong Mahibaloan Bahin sa Social Networking? (Hulyo 2011) Salamat niini nga artikulo. Ako 26 anyos. Nagplano ko sa pag-ablig [social networking] account, dili kay gusto kong magpadaghag higala kondili daghan ang nangengganyo nako sa pag-ablig account. Kining artikuloha nakatabang kaayo nako. Makakita kag mga higala bisag wala kay account.

M. P., Philippines

Abi nakog negatibo ang artikulo bahin sa social networking. Apan timbang diay kini. Kini naghisgot sa bentaha ug disbentaha niini ug nagtambag kon sa unsang paagi mapanalipdan nato ang atong kaugalingon batok sa mga kapeligrohan sa mga social network. Akong nakita nga kinahanglang mag-amping ko dihang mag-post ug impormasyon sa Internet.

C. W., United States

Mga Sekreto sa Malamposong Pamilya (Oktubre 2009) Kini nga espesyal nga isyu nakatabang gayod sa among pamilya. Nainteres kaayo ko sa bahin nga “Sulayi kini” nga makita diha sa matag usa sa pito ka sekreto. Amo nang gipadapat ang mga sugyot niini.

H. H., Korea

Repaso Alang sa Pamilya Salamat kaayo niining regular nga artikulo. Malingaw kaayo ang among sayis anyos nga anak nga babaye sa “Mga Hulagway nga Ipapangita sa mga Bata” ug ilabina sa pagkolor sa mga drowing. Gipasiugda niining artikuloha ang papel sa ginikanan sa pagbansay sa ilang mga anak sa sayo pa nga edad. Ang inyong mga artikulo dako kaayog tabang sa mga kabataan.

M. P., Poland