Hinlong Pagkaon Para sa Tanan—Haduol Na!

DUNA kay mahimo sa pagseguro nga luwas ang imong pagkaon. Apan dunay mga butang nga wala kay mahimo. Pananglitan, dili nimo masusi ang tanang pagkaon una pa kini paliton o preparahon. Tingali mopalit ka na lag pagkaong naproseso na ug layo pag gigikanan. Ug ang ubang pagkaon nga imong mapalit tingali kontaminado sa mga kemikal diha sa hangin, tubig, o yuta.

Diha sa report nga nag-ulohang “Foodborne Disease Control: A Transnational Challenge,” ang mga opisyales sa World Health Organization miingon nga ang ubang problema bahin sa pagkaon “dili masulbad sa usa lang ka nasod; kini nagkinahanglag kooperasyon sa tanang nasod.” Ang mga sakit nga makuha gikan sa pagkaon problema gayod sa tibuok kalibotan!

Busa daghan ang dili motuo kon kita moingon nga sa dili madugay ang tanan makabaton ug hinlong pagkaon. Apan, ‘si Jehova, ang Ginoo sa tibuok yuta,’ nagsaad ug solusyon sa problema bahin sa pagkaon. (Josue 3:13) Pero ang uban miingon nga ang Diyos maoy mabasol. Apan hunahunaa: Kon pasagdan sa silbidor nga mapan-os ang pagkaon, angay bang basolon ang nagluto? Siyempre dili.

Sa susama, ang tawo—dili ang Maglalalang—maoy responsable sa pagkadaot sa abot sa yuta. Tawo ra pod ang mabasol kon nganong daghan ang pagkaong kontaminado. Ang Diyos nagsaad  nga iyang ‘laglagon ang mga naglaglag sa yuta.’—Pinadayag 11:18.

Ang tinuod, gipakita na sa Diyos nga siya mahunahunaon sa kalidad sa atong pagkaon. Siya ang nag-umol sa yuta ug naglalang sa katanoman nga dili lang “tilinguhaon sa panan-aw” kondili “maayong kan-on” usab. (Genesis 2:9) Bisan human maulipon ang tawo sa sakit, gihatagan ni Jehova nga Diyos ang iyang katawhan ug espesipikong mga giya aron ang pagkaon magpabiling luwas ug ang panglawas mamahimsog.—Tan-awa ang “Mga Balaod sa Panglawas.”

Unsang pagkaona ang buot sa Diyos nga atong kaonon? Ang Bibliya nag-ingon: “Siya nagapatubo sa lunhawng balili alang sa mga mananap, ug sa mga tanom alang sa tawo, aron magpatungha ug pagkaon gikan sa yuta, ug bino nga makapalipay sa kasingkasing sa may-kamatayong tawo, sa pagpasinaw sa nawong pinaagi sa lana, ug tinapay nga makapalig-on sa kasingkasing sa may-kamatayong tawo.” (Salmo 104:14, 15) Ang Bibliya nag-ingon usab nga “ang matag nagalihok nga mananap nga buhi mahimong kalan-on alang kaninyo.”—Genesis 9:3.

Bahin sa umaabot, ang Bibliya nagsaad: “Siya tinong maghatag sa ulan alang sa imong binhi nga maoy imong gipugas sa yuta, ug tinapay ingong abot sa yuta, nga mahimo gayong tambok ug mantikaon. Ang imong kahayopan manibsib nianang adlawa sa usa ka luag nga sibsibanan.” (Isaias 30:23) Busa ang makasubong mga ulohan sa balita pulihan unya niini nga balita: “Hinlong pagkaon para sa tanan!”

[Blurb sa panid 9]

Ang Maglalalang nagsaad ug dagayang hinlo nga pagkaon sa umaabot

[Kahon sa panid 8]

“MGA BALAOD SA PANGLAWAS”

Mga 3,500 ka tuig kanhi, nadawat sa Israel ang Moisesnong Balaod. Kana nga Balaod nagpanalipod sa mga Israelitas batok sa daghang sakit nga makuha gikan sa pagkaon. Tagda kini:

● Ayaw paggamit ug hugawng plato ug kubyertos nga nadapat sa patayng mananap: “Ang bisan unsang gigamit nga sudlanan isugmaw sa tubig, ug kini mahimong mahugaw hangtod sa pagkagabii ug unya mamahinlo.”—Levitico 11:31-34.

● Ayaw pagkaon ug naluok nga mananap: “Dili kamo magakaon sa bisan unsang lawas nga daan nang patay.”—Deuteronomio 14:21.

● Ayaw padugaya ang salin nga pagkaon: “Sa pagkaugma ang mahibilin niini mahimo usab nga kan-on. Apan sa ikatulo nga adlaw ang mahibilin sa unod sa halad pagasunogon.”—Levitico 7:16-18.

Si A. Rendle Short, M.D., nahingangha nga ang Moisesnong Balaod—kon itandi sa mga balaod sa kasikbit nga mga nasod sa Israel—dunay “maalamon ug makataronganong mga balaod sa panglawas.”