● Daghang linalang sa dagat makapagawas ug kahayag, usa niini ang clusterwink snail. Kini nga abilidad gigamit sa clusterwink snail sa talagsaong paagi. Kon dunay kasag nga manukob, ang clusterwink snail mouk-ok diha sa kabhang niini ug magpagawas ug kahayag nga makapakaratil sa kasag. Sa unsang paagi ang kahayag molapos sa kabhang niini?

Hunahunaa: Ang kabhang dili magsalipod sa kahayag kondili magpasabwag hinuon niini. Nadiskobrehan ni Dimitri Deheyn ug Nerida Wilson, mga siyentista sa Scripps Institution of Oceanography sa San Diego, California, U.S.A., nga ang kahayag nga mapagawas sa kinhason molapos sa tibuok kabhang, ug ang masabwag nga kahayag maoy napulo ka pilo nga mas dan-ag kay sa masabwag sa mga diffuser nga samag gibag-on sa kabhang (.02 pulgadas). Dugang pa, ang abilidad sa kabhang sa pagpadan-ag niini nga kahayag maoy walo ka pilo nga mas maayo kay sa diffuser nga gama sa tawo. Sa katingalahan, ang kabhang sa kamatang niini nga kinhason dili makapagawas ug kahayag. Katingalahan pod nga kini nga kahayag mao ang kolor nga layog abot diha sa dagat.

Si Dr. Deheyn miingon nga ang panukiduki bahin niini nga kinhason “makatabang sa paghimog mga materyales nga makapadan-ag ug mas hayag nga kahayag.” Ang biophotonics, nga naggamit ug kahayag alang sa pagdayagnos ug pagtambal, makabenepisyo usab niini nga panukiduki. Ug niining panahon nga light-emitting diode (LED) ang sagad nga gigamit, ang paghimog diffuser nga makapasabwag ug mas dan-ag nga kahayag makatabang unya sa pagdaginot ug koryente.

Unsay imong hunahuna? Ang kabhang ba sa clusterwink snail mitungha pinaagig ebolusyon? O kini ba gidisenyo?

[Hulagway sa panid 18]

Gipadakong letrato sa kabhang

[Hulagway sa panid 18]

Gipadakong letrato sa kabhang nga nagsiga

[Picture Credit Lines sa panid 18]

Left: www.robastra.com; center and right: Courtesy of Dr. D. Deheyn, Scripps Institution of Oceanography, UC San Diego