Unsa Gayoy Usbon?

“Nasod dili mobakyaw sa espada batok sa usa ka nasod.”

“Walay pumoluyo nga moingon: ‘Ako masakiton.’”

“Ang kamatayon mawala na.”

ANG giingon sa ibabaw morag dili katuohan. Apan kita makaseguro nga dili lamang kini mga pangandoy. Ngano man? Tungod kay dili kini kawang nga mga panaad sa mga politiko kinsa walay gahom sa pag-usab sa atong kalibotan. Hinunoa, ang mga saad nga gikutlo sa ibabaw makita diha sa Bibliya. *

Daghang tawo nagtuo nga ang Bibliya karaan na nga libro ug dili na mapuslanon sa atong panahon. Mao ba usab kanay imong pagtuo? Kon mao, susiha kon unsay giingon sa Bibliya. Ang tinuod, ang Bibliya mao lang ang bugtong sagradong basahon nga nag-asoy sa kasaysayan sa tawo sukad sa sinugdanan. Kini nagsaysay sa mosunod:

● Kon sa unsang paagi ang tawo nahitumpawak sa kadaot.—Roma 5:12.

● Kon unsaon pagsulbad sa Diyos kini nga kahimtang.—Juan 3:16.

● Kon nganong ang mga kagamhanan dili makausab sa atong kalibotan.—Jeremias 10:23.

● Kon nganong makasalig kita sa saad sa Diyos.—Josue 23:14.

Wagtangon ba gayod sa Diyos ang kagutom, gubat, sakit, ug kamatayon? Kini nga palaaboton dili lisod tuohan kon motuo ka sa mosunod:

1. Kita gilalang sa Diyos.

2. Siya may kahingawa kanato.

3. Siya may gahom sa pag-usab sa kalibotan.

4. Kana maoy iyang katuyoan.

Duna bay maayong rason nga atong tuohan kining upat ka punto? Ang mga Saksi ni Jehova, nga maoy nagpatik niini nga magasin, nagdapit kanimo sa pagsusi niini pinaagi sa pagtuon sa Bibliya.

Tingali duna kay Bibliya apan panagsa lang mobasa niini o kaha dili mobasa niini. Bisan ang mga tawo nga nagbasa sa Bibliya moingon nga naglisod sila pagsabot niini. Kon ingon ka niini, amo kang gidapit sa paghangyo sa mga Saksi ni Jehova ug libreng pagtuon sa Bibliya. Minilyon sa tibuok kalibotan ang nakabenepisyo niini. Sa unsang paagi kini himoon?

Matag semana, usa o duha ka Saksi ni Jehova mahimong moduaw kanimo sa imong balay o kaha sa laing kombenyenteng dapit sa paghisgot sa Bibliya nga walay bayad. Sa matag panagtuon sa Bibliya, matubag ang mga pangutana nga sama sa, Nganong kita nag-antos? Nganong ang gobyerno sa tawo walay gahom sa pag-usab sa kalibotan? Unsa ang Gingharian sa Diyos, ug unsay mahimo niini nga dili mahimo sa mga gobyerno sa tawo? *

Alang sa dugang impormasyon kon sa unsang paagi ang pagtuon ug Bibliya makatabang nimo, kontaka ang mga Saksi ni Jehova sa inyong dapit o tan-awa ang Web site nga www.pr418.com. Makapadala ka usab ug sulat sa adres nga makita sa panid 5 niining magasina.

[Mga footnote]