Gusto Kaayog Kapintasan

ANG mga tawo karon gusto kaayog kapintasan. Gani, kini nahimo nang bahin sa kalingawan. Apan ang Media Awareness Network nag-ingon nga “sa dili pa dugayng katuigan, dunay nausab sa kapintasan diha sa media. Una sa tanan, kini komon na.” Ikaduha, kini “mas detalyado, mas hilas, ug mas bangis.” Tagda ang mosunod.

Musika: Ang mga awit nga mas bayolente ug mga liriko “komon na sa industriya sa musika,” matod pa sa reperensiya nga gihisgotan. Ang ubang awit bastos ug mga pulong, nga nagdayeg sa pagpatay ug paglugos bisan sa mga asawa ug mga inahan.

Video Game: “Makasubo nga halos pulos pinatyanay ang gipasundayag sa mga video game,” nag-ingon ang magasin sa Britain nga para sa mga hilig ug video game. Kini midugang: “Sagad, ang hilig ug video game hilig pod ug kapintasan.” Pananglitan, sa usa ka popular nga video  game, ang mga magdudula makahimo sa pagpuspos ug mga babaye pinaagig baseball bat hangtod mamatay. Ang ubang eksperto nagtuo nga ang mga bata mas maimpluwensiyahan sa video game kay sa TV.

Pelikula: Ang mga panukiduki nagpakita nga midaghan ang kapintasan, kahilayan, ug pagpamalikas diha sa mga pelikula, ug tingali ang rating niini dili kasaligan. Dugang pa, dili lang kontrabida ang bayolente. Halos katunga sa kapintasan sa TV, pelikula, ug music video gihimo usab sa mga bida, sumala sa usa ka panukiduki.

Balita: Daghang prodyuser sa balita sa TV nagtuo nga ang mga tawo gustong motan-aw ug kapintasan. Dako kaayong negosyo ang balita, ug ang mga tigbalita nahibalo nga ang kapintasan makadanig mga tumatan-aw ug kon mas daghan ang tumatan-aw, daghang tigpaanunsiyo sa daghang nasod moesponsor sa mga programa sa TV.

Web Site: Ang tinuod ug minugna-mugna nga mga aksiyon sa pagpasakit, pagputol-putol ug paghiwa sa lawas, ug pagpatay makita diha sa Internet. Daghang kabataan motan-aw niini nga mga Web site.

Makaimpluwensiya ba ang Kapintasan Diha sa Media?

Ang kapintasan ba sa telebisyon, pelikula, libro, musika, ug ubang matang sa kalingawan makaimpluwensiya? Tinuod, kadtong nanapi pinaagi niini mangatarongan nga dili makadaot ang ilang mga produkto. Apan hunahunaa kini: Aron maimpluwensiyahan ang hunahuna sa tawo, ang mga kompaniya mobayad ug bilyon-bilyong dolyar para sa mga komersiyal, nga sagad mokabat lag 30 segundos. Nan, makataronganon ba ang pag-ingon nga ang 90 minutos nga pelikula, diin ang mga bida tingali mga imoral ug bayolente, gamay o walay epekto, ilabina sa tandogonong hunahuna sa kabataan?

Ang atong Maglalalang, si Jehova nga Diyos, mas nahibalo sa kinaiyahan sa tawo. Unsay iyang giingon kanato bahin sa pagpakig-uban sa mga tawong bayolente—apil na niadtong naglingaw kanato pinaagi sa popular nga media? Tagda ang mosunod nga mga teksto sa Bibliya:

● “Si Jehova magausisa sa matarong ug sa daotan, ug si bisan kinsa nga nahigugma sa kapintasan ginadumtan gayod sa Iyang kalag.”—Salmo 11:5.

● “Ayaw pagpakig-uban kang bisan kinsa nga masuk-anon; ug sa tawo nga daling mosilaob sa kaaligutgot dili ka makigkuyog, aron dili ka masinati sa iyang mga dalan ug makabaton ug lit-ag alang sa imong kalag.”—Proverbio 22:24, 25.

Siyempre, dili kita makalikay sa tanang dili maayong impluwensiya. Apan makapili kita sa atong kalingawan ug sa mga tawo nga atong pakig-ubanan. Busa pangutan-a ang imong kaugalingon, ‘Unsang matanga sa pagkatawo ang gusto nako nga mahimo ako?’ Nan pakig-uban niining matanga sa mga tawo, mga tawo nga sama nimog mga prinsipyo ug mga tumong.—Proverbio 13:20.

Bisan tuod ang atong mga kauban ug kalingawan mahimong makaimpluwensiya sa atong tinamdan sa kapintasan, duna pay laing butang nga makaimpluwensiya kanato. Unsa kini?

[Hulagway sa panid 4]

Ang atong kalingawan mahimong makaimpluwensiya sa atong tinamdan sa kapintasan