Mga Batan-on Nangutana
Kinsay Akong mga Sulondan?
Niini nga artikulo, imong makat-onan kon
NGANONG nagkinahanglan kag sulondan
ASA nimo sila makita
UNSAON sila pagsundog
NGANONG nagkinahanglan ka kanila
NGANONG NAGKINAHANGLAN KA KANILA
TINUOD NGA SITUWASYON: Posibleng maimpluwensiyahan ka sa tawo nga imong gitamod. Kana mahimong maayo o dili maayong impluwensiya, depende kon kinsang tawhana ang imong gitamod.
Ang imong gikinahanglan: Maayong mga sulondan.—Filipos 3:17.
Ang problema: Tamdon sa daghan ang mga tawong popular—singer, atleta, o artista—bisag lain silag reputasyon.
Angayng palandongon: Gitandi sa Bibliya ang atong personalidad sa usa ka sinina. (Colosas 3:9, 10) Kon mamalit kag sinina, mosugot ka ba nga ang bati mamesti nga saleslady maoy mopili sa sinina nga imong paliton? Nan, nganong magpaimpluwensiya ka man sa mga tawong popular nga kuwestiyonableg kinabuhi? Imbes magsunod-sunod lang sa uban, ang pagbaton ug maayong mga sulondan makatabang nimo sa (1) pagpilig mga hiyas nga gusto nimong sundogon ug (2) pagsundog sa mga tawo nga nagpasundayag niining mga hiyasa.
ASA NIMO SILA MAKITA
Markahi ang mosunod kon tinuod o dili tinuod.
1. Ang sulondan kinahanglang usa ka tawo nga imong kaila.
□Tinuod □Dili Tinuod
2. Ang sulondan kinahanglang hingpit.
□Tinuod □Dili Tinuod
3. Puwedeng daghan ang imong himoong sulondan.
□Tinuod □Dili Tinuod
Tubag
1. Dili tinuod. Puwede kang makapilig mga sulondan gikan sa karaang panahon. Ang labing maayong sulondan makita diha sa Bibliya. Pananglitan, diha sa Hebreohanon kapitulo 11, si apostol Pablo naghisgot ug 16 ka lalaki ug babaye nga maayong panig-ingnan sa pagtuo. Sa sunod nga kapitulo, si Pablo nag-awhag sa mga Kristohanon sa ‘pagtutok’ kang Jesus ug sa pagsundog kaniya. (Hebreohanon 12:2) Si Jesus mao ang atong labing maayong sulondan.—Juan 13:15. *
2. Dili tinuod. Gawas kang Jesus, si Adan walay hingpit nga mga anak. (Roma 3:23) Bisan ang masibotong manalagna nga si Elias maoy “tawo nga sama kanato.” (Santiago 5:17, Contemporary English Version) Ingon usab niana si Miriam, David, Jonas, Marta, ug Pedro. Walay lipodlipod nga gihisgotan sa Bibliya ang ilang kasaypanan. Apan sila maayong panig-ingnan sa halos tanang bahin sa kinabuhi, ug busa sila maayong sulondan.
3. Tinuod. Puwedeng daghan ang imong himoong sulondan. Tingali ang usa kugihan, samtang ang usa mapailobon. Tingali ang ikatulo positibog panglantaw bisag duna siyay problema. (1 Corinto 12:28; Efeso 4:11, 12) Pangitaa ang maayong mga hiyas sa uban ug sundoga kini.—Filipos 2:3.
UNSAON SILA PAGSUNDOG
1. Paniid sa imong mga sulondan. Gisultihan ni apostol Pablo ang mga Kristohanon sa unang siglo: “Pagkat-on pinaagi sa pagpaniid niadtong nagkinabuhi sa paagi nga among gipakita kaninyo.”—Filipos 3:17, Holy Bible—Easy-to-Read Version.
2. Pakigsuod. Kon mahimo, pakig-uban niadtong imong gipili nga sulondan. Ang Bibliya nag-ingon: “Siya nga nagalakaw uban sa mga tawong maalamon mahimong maalamon.”—Proverbio 13:20.
3. Sundoga ang dalayegong mga hiyas sa imong sulondan. Ang Hebreohanon 13:7 nag-ingon: “Samtang mamalandong kamo kon unsay gisangpotan sa ilang panggawi sundoga ang ilang pagtuo.”
Andam ka na ba? Pil-api ang “Akong Planong Himoon” diha sa ubos.
Akong Planong Himoon
Pagpilig hiyas nga gusto nimong sundogon. (Gusto ka bang mahimong mahigalaon? mahinatagon? kugihan? mapailin-ilinon? responsable? kasaligan?)
․․․․․
Pagpilig tawo nga nagpakitag hiyas nga gusto nimong sundogon. *
․․․․․
Kon magpili kag maayong sulondan, ayaw pagtinguha nga mahisama ka gayod kaniya. Ikaw dunay kaugalingong mga hiyas nga maayo. Pero kon ikaw dunay maayong mga sulondan, matabangan ka sa pagpauswag sa imong maayong mga hiyas samtang magkahamtong ka. Gawas pa niana, kon mosunod ka sa ilang maayong panig-ingnan mahimo kang sulondan sa uban.
Aron makakuhag dugang artikulo sa seryeng “Mga Batan-on Nangutana,” i-download ang ubang gula sa Pagmata! gikan sa www.pr418.com
[Mga footnote]
^ par. 22 Siyempre, daghang tawo karon puwede usab nga mahimong mga sulondan. Lakip niini ang ginikanan, igsoon, hamtong nga kauban sa Kristohanong kongregasyon, o ubang sulondang mga igsoon sa pagtuo.
^ par. 33 Mahimo usab nga kini ang imong himoon: Una, pagpilig tawo nga imong gitamod. Sunod, pangutan-a ang imong kaugalingon, ‘Unsa may iyang dalayegong hiyas?’ Dayon, sundoga kana.
[Blurb sa panid 21]
Nganong magpaimpluwensiya ka man sa mga tawong popular nga kuwestiyonableg kinabuhi?
[Kahon/Mga hulagway sa panid 22, 23]
ANG GIINGON SA UBANG BATAN-ON
Layla—Ang akong amigang si Sandra positibog panghunahuna. Daghan usab siyag nahibaloan sa Bibliya. Busa, mahibalo gyod siya kon unsay iyang himoon kon dunay problema. Makaduol ko niya bisag unsay akong problema.
Terrence—Ang akong mga amigong si Kyle ug David mahunahunaon kaayo sa pagbati sa uban. Bisag sila mismo dunay problema, unahon nila pagtagad ang problema sa uban. Maayong panig-ingnan sila para nako.
Emmaline—Si Mama ang akong sulondan. Daghan kaayo siyag nahibaloan sa Bibliya, ug mangita gyod siyag higayon sa pagpakigsulti sa mga tawo bahin sa iyang pagtuo. Siya nagtuo nga usa ka pribilehiyo ang pagsangyaw, dili usa ka bug-at nga buluhaton. Nakadayeg kaayo ko sa iyang kadasig!
[Kahon sa panid 23]
PAGBASAG DUGANG PA BAHIN NIINI!
Nagkinahanglan ka bag tabang sa pagpangitag maayong mga sulondan? Basaha ang Hebreohanon kapitulo 11 ug pagpilig usa ka karakter nga gihisgotan niini. Pagsugod ug proyekto sa pagtuon nga ang katuyoan maoy pagsundog sa dalayegong mga hiyas sa maong tawo.
Makakita kag ubang sulondang mga karakter sa Bibliya diha sa Tomo 1 ug 2 sa Mga Pangutanang Gisukna sa mga Batan-on—Mga Tubag nga Mosaler, nga giimprenta sa mga Saksi ni Jehova. Tan-awa ang “Indise sa Maayong Panig-ingnan” sa panid 321 sa matag libro.
[Kahon sa panid 23]
NGANONG DILI NIMO PANGUTAN-ON ANG IMONG GINIKANAN?
Pangutan-a ang imong ginikanan kon kinsay ilang sulondan niadtong batan-on pa sila ug kon kinsay ilang mga sulondan karon. Unsang mga kaayohan ang napahimuslan sa imong ginikanan tungod sa pagbaton ug maayong mga sulondan?
