Makakat-on Ka sa Pagkahimong Makigdaiton

BISAN tuod matawo kita nga dunay pipila ka dili maayong kinaiya, ang pagkabayolente sagad makat-onan. Tinuod usab kini kon bahin sa pagkamakigdaiton. Apan, kinsay makatudlo kanato ug tinuod nga pakigdait? Siyempre, walay lain kondili ang atong Maglalalang, kansang kaalam dili hitupngan. Tagda ang mosunod nga lima ka punto ug ang mga mutya sa kaalam nga mabasa diha sa Bibliya.

1 “Ayaw kasinahi ang mapintas nga tawo.” (Proverbio 3:31) Ang tinuod nga kalig-on nasandig sa mga hiyas sama sa pagpugong sa kaugalingon ug kalumo. “Siya nga mahinay sa kasuko mas maayo pa kay sa tawong gamhanan,” nag-ingon ang Proverbio 16:32. Sama sa lig-ong dam nga dili daling matumpag, siya usab dili daling madala sa makapasuko nga situwasyon. Gani bisag hagiton, siya malumo gihapon, ug busa ang kasuko mahupay. (Proverbio 15:1) Apan ang tawo nga daling masuko, mosilaob dayon bisan sa gamayng hinungdan.—Proverbio 25:28.

2 Magmaalamon sa pagpilig mga kauban. “Ang tawong mapintas magadaldal sa iyang isigkaingon,” nag-ingon ang Proverbio 16:29. Sa laing bahin, “siya nga nagalakaw uban sa mga tawong maalamon mahimong maalamon.” (Proverbio 13:20) Oo, kon kita makig-uban sa mga tawong makigdaiton nga makapugong sa kaugalingon ug malumo, hayan kita mosundog kanila.

3 Ugmara ang tinuod nga gugma alang sa uban. Ang labing maayong paghubit sa gugma mao kanang mabasa diha sa 1 Corinto 13:4-7. Sa lakbit kini nag-ingon: “Ang gugma hataas-ug-pailob ug maluloton. . . . [Kini] dili mapasuko. Kini dili maghupot ug talaan sa kadaot. . . . Kini moantos sa tanang butang, . . . molahutay sa tanang butang.” Kon ang usa dunay gugma nga sama sa Diyos, matod pa ni Jesus, higugmaon niya bisan ang iyang kaaway.—Mateo 5:44, 45.

4 Itugyan sa Diyos ang paghukom sa daotan. “Ayaw balosi si bisan kinsa ug daotan tungod sa daotan. . . . Kutob sa inyong maarangan, makigdinaitay sa tanang tawo. Ayaw kamo pagpanimalos, mga hinigugma, . . . kay nahisulat: ‘Akoa ang panimalos; ako magabalos, nag-ingon si Jehova.’” (Roma 12:17-19) Dihang motuo kita sa Diyos ug sa iyang mga saad, ang atong hunahuna magmalinawon, nga dili masabtan sa mga tawong walay pagtuo.—Salmo 7:14-16; Filipos 4:6, 7.

5 Salig sa Gingharian sa Diyos nga maoy magpatunghag matuod nga pakigdait sa yuta. Ang Gingharian sa Diyos maoy usa ka langitnong kagamhanan nga maglaglag sa tanang daotan ug magmando sa tibuok yuta sa dili madugay. (Salmo 37:8-11; Daniel 2:44) Ilalom niana nga Gingharian, “molambo ang matarong,” ug dagaya unya ang “pakigdait hangtod nga ang bulan mahanaw na.”—Salmo 72:7.

Kini nga mga pagtulon-an sa Bibliya nakatabang sa minilyon—lakip niadtong bayolente ug disposisyon—sa pagkahimong makigdaiton. Tagda ang kasinatian ni Salvador Garza.