Sa Germany, mga 33 porsiyento sa mga bata nga natawo sa 2010 maoy mga pinaangkan, samtang niadtong 1993, 15 porsiyento lang.—ÄRZTE ZEITUNG ug THE LOCAL, GERMANY.

Sumala sa datos sa senso sa 2010, 69.4 porsiyento sa mga bata sa United States nagpuyo uban sa duha ka ginikanan, 23.1 porsiyento nagpuyo uban sa inahan lang, 3.4 porsiyento nagpuyo uban sa amahan lang, ug 4.1 porsiyento wala magpuyo uban sa ginikanan.—U.S. CENSUS BUREAU, U.S.A.

Tungod sa mga kalamidad nga gipahinabo sa kinaiyahan, ang mga nasod sa tibuok kalibotan napildihag mga $380 bilyones (U.S.) sa 2011. Ang linog sa Japan mao ang “kinadak-ag kadaot sa tanang kalamidad, nga mikabat ug $210 bilyones—walay labot sa kadaot sa nukleyar nga planta sa Fukushima.”—NEW SCIENTIST, BRITAIN.

Sa tibuok kalibotan, ang kasagarang kawaton nga pagkaon mao ang keso. Labawg gamay sa 3 porsiyento sa mga gipamaligya sa tindahan ang makawat sa mga kustomer ug empleyado sa usa ka tuig.—CENTRE FOR RETAIL RESEARCH, BRITAIN.

Sa saker, ang pagpalo sa bola pinaagig ulo bahin na sa dula. Apan nakita sa research karon pinaagi sa modernong mga imaging technique ug cognitive test nga delikado ang pagsigeg gamit sa ulo sa pagpalo sa bola. Ang mga researcher sa Albert Einstein College of Medicine sa New York, U.S.A. nag-ingon nga kini “makabun-og sa utok ug makadaot sa obra niini.” Nakita nga dunay bun-og ang utok sa bag-ohang mga magdudula kinsa nakapalo ug bola kapin sa 1,000 ngadto sa 1,500 ka beses sa usa ka tuig—“diyutay ra kana nga gidaghanon kon itandi sa pagpalo sa ulo nga ginahimo sa mga tigdula sa usa ka adlaw.”

“Dunay mga grupo nga nabalaka bahin sa mga HEV [hybrid electric vehicle o mestisong mga sakyanan],” nagreport ang Department of Transportation sa U.S.A. “Sila nabalaka kay ang mga HEV dili kaayo saba mao nga ang mga tawong naglakaw o nagbisikleta dili makaalinggat nga dunay nagkaduol nga sakyanan diha sa karsada o interseksiyon.” Sa pagkatinuod, samtang magmaniobra, “ang mga sakyanang HEV duha ka beses nga may purohang makaaksidente ug mga tawong naglakaw” kay sa naandang mga sakyanan, matod pa sa report. Busa ang National Highway Traffic Safety Administration nagduso ug balaod nga kini nga mga sakyanan kinahanglang magpagawas ug saba kon hinay ang dagan niini.