Itudlo ang Maayong mga Prinsipyo
Ang maalamong mga ginikanan magtudlo sa ilang mga anak ug maayong mga prinsipyo sa Bibliya
“Sa una, wala ko magsubay sa mga sukdanan sa Bibliya ug nalisdan ko sa pagtudlo sa akong mga anak. Apan karon wala na kaayo ko maglisod kay anaa ang Bibliya nga motabang kanako.”—ELIZABETH, SOUTH AFRICA.
Ang problema.
Ang impluwensiya sa ubang batan-on sa eskuylahan ug ang nagkaubos nga moralidad sa kalibotan dakog epekto sa mga pamilya. Aron dili maimpluwensiyahan, ang mga anak nagkinahanglag maayong mga prinsipyo. Kay kon dili, lagmit dili sila modako nga responsable, may prinsipyo, ug maayog pamatasan.
Mga sugyot.
Daghang solo nga ginikanan, lakip niadtong gihisgotan niini nga serye sa mga artikulo, nagpagiya sa Bibliya kay ilang giila nga kini naundan sa dili-hitupngang kaalam sa Diyos. Tagda pananglitan ang gisulti sa Bibliya bahin sa labing hinungdanong prinsipyo—ang pagpakitag tinuod nga gugma.
“Ang gugma hataas-ug-pailob ug maluloton. Ang gugma dili abughoan, kini dili manghambog, dili magpaburot, dili bastos, dili mangita sa kaugalingong kaayohan niini, dili mapasuko. Kini dili maghupot ug talaan sa kadaot. Kini dili magmaya sa pagkadili-matarong, apan magmaya uban sa kamatuoran. Kini moantos sa tanang butang, ... molaom sa tanang butang, molahutay sa tanang butang. Ang gugma dili gayod mapakyas.”—1 Corinto 13:4-8.
Kon ang ginikanan magpasundayag niana nga gugma, ang mga anak magmalipayon. Si Collete, nga nahisgotan na, nga nagpuyo sa France, misulat: “Pirme nako sultihan ang akong mga anak nga sila akong gimahal. Sultihan sab nako sila nga gasa sila gikan sa Diyos ug busa sila kinahanglang atimanon pag-ayo. Sila usab kinahanglang magmatinahoron nako ug sa ilang amahan [nga wala na magpuyo sa balay]. Tungod niining maong mga prinsipyo, ang among panimalay may pagsalig ug pagtahod sa usag usa.”—Salmo 127:3.
Si Anna nga taga-Poland misulat: “Dihang mag-away ang akong mga anak, pahinumdoman nako sila sa gisulti ni Jesus nga kon unsay gusto nato nga buhaton sa uban kanato, kini usab ang atong buhaton ngadto kanila.” (Mateo 7:12) Si Roberto, nga gihisgotan na, may problema nga komon sa daghang solo nga ginikanan. Siya miingon: “Duha ka sukdanan ang maatubang sa mga anak—ang imong sukdanan ug kanang sa imong kapikas kanhi. Tungod sa akong pagpadapat sa mga prinsipyo sa Bibliya, nahibalo ko nga wala ganahi nako ang akong mga anak nianang adlawa o semanaha.” Siya miingon usab: “Ang kapikas kanhi tingali mohatag ug mga gasa ngadto sa mga anak aron sila mawili kaniya. Ug morag matental pod ka sa paghatag ug gasa, pero ang pagpasabot kanilag maayo makatabang.”
Dili sayon magkinabuhi subay sa mga sukdanan sa Bibliya, apan ang mga resulta sa imong paningkamot dili makawang! Si Sarah, solo nga ginikanan nga taga-South Africa, miingon: “Nalipay ko nga napadako nako ang akong mga anak sa paggiya ni Jehova. Tinuod, kami dunay mga problema, apan wala gayod kami pasagdi sa Diyos.”
