Pagtakda ug Hustong Prayoridad
Pagdungan mog pangaon bisag kas-a lang sa usa ka adlaw
“Kapoy ko sa pagsigeg hunahuna kon unsaon pagbalanse sa akong trabaho, pagmatuto sa anak, pag-alagad sa Diyos, buluhaton sa balay, ug pagpahulay.”—YOKO, JAPAN.
Ang problema.
Si Miranda, nga dunay duha ka anak nga lalaki, miingon: “Gawas nga nagtrabaho ko, ako pa gyoy motagana sa tanan—sa pisikal, mental, emosyonal, ug espirituwal—nga walay bana nga moabag.”
Mga sugyot.
Hunahunaa kon unsa gyoy importante kanimo ug sa imong mga anak, ug himoa kini nga imong prayoridad.
Sunda gayod kon unsay imong prayoridad, ug eskedyulag maayo ang imong panahon ug tarongag badyet ang imong kuwarta. Pananglitan: Importante ang panglawas sa imong mga anak, busa gamita ang imong hinagoan pag-ayo nga kuwarta sa pagpalit ug sustansiyadong pagkaon imbes sa paggasto niana sa pagpadoktor. Sa dili pa mamalit, paghimog listahan sa imong paliton. Makatabang kini aron dili ka makapalit ug mga butang nga wala sa plano. “Ganahan kong magluto,” miingon si Roberto nga taga-United States nga upat ug anak. Siya midugang: “Nakakat-on ko sa pagpalit sa kon unsa ray among gikinahanglan—dili kon unsay among gusto—ug dili kay basta lang gikinahanglan, kondili kanang gikinahanglan gyod namo matag adlaw.”
Gamita ang imong hinagoan pag-ayo nga kuwarta sa pagpalit ug sustansiyadong pagkaon imbes sa paggasto niana sa pagpadoktor
Idespatsar ang mga butang nga wala na gamita—libro, sinina, gadyet. Usa ka solo nga inahan miingon: “Mas daghang butang, mas daghang tensiyon. Kon mas daghan kag butang, mas daghan kag hinloan, ayohon, ug mentinahon. Aron mosimple ang imong kinabuhi, ayaw pagtener ug daghang butang.”
Bansaya ang imong mga anak sa pagpanghipos kada gabii. Ayaw tugoti nga magkayamukat ang balay. Kini magtudlo sa imong mga anak nga silay responsable sa pagpanghinlo sa ilang kuwarto ug sa balay. Siyempre mopatuo sila nimo kon maayo ka nga sulondan.
Bisag daghan kaayo kag trabaho, kinahanglang tagan-an nimog panahon ang imong mga anak—dili pipila lang ka oras nga giingong quality time kondili daghang panahon kutob sa mahimo. Ang imong mga anak nagkinahanglan sa imong panahon ug atensiyon.—Deuteronomio 6:7.
Pagdungan mog pangaon bisag kas-a lang sa usa ka adlaw, ug himoa kini nga malipayong mga okasyon. Si Collette nga tuloy anak miingon: “Nagkasabot mi nga sa panihapon mi magdungan ug pangaon kay anaa ang tanan, ug panahon kini sa panagsuoray ug panag-estoryahay ug espirituwal nga mga butang. Espesyal kana nga higayon sa among pamilya.”
