“Ang gidaghanon sa gina-search diha sa Google nga naglakip sa pulong nga ‘porn’ [pornograpiya] mitriple sukad sa 2004.”—THE ECONOMIST, BRITAIN.

“Sa dihang magminyo ang batan-ong babaye [sa Russia], . . . ang posibilidad nga kulatahon siya sa iyang bana, o nga ang ilang mga away moresultag pagpanapat, maoy mga 60 porsiyento.”—MOSKOVSKIYE NOVOSTI, RUSSIA.

“Usa sa matag pito ka siyentista o doktor sa UK nakakitag mga kauban nga tinuyo nga nagbag-o o nag-imbentog mga impormasyon panahon sa pagpanukiduki o sa katuyoan nga kini nga mga impormasyon mapatik.”—BRITISH MEDICAL JOURNAL, BRITAIN.

“Ang gidaghanon sa nangaayo sa kanser sa U.S. misaka ug upat ka pilo sukad sa 1971, nga mikabat ug mga 12 milyones . . . Ang pagdaghan sa nangaayo maoy tungod sa sayo nga pagdayagnos pinaagig mga eksamin, mas epektibong paagi sa pagpanambal, ug padayong pag-eksamin sa pasyente.”—UC BERKELEY WELLNESS LETTER, U.S.A.

Sa hapit nang mag-Pasko niadtong 2011, mga 100 ka pari ug monghe sa lainlaing relihiyon nag-away diha sa Church of the Nativity, sa Betlehem. “Gamay ra kini nga problema nga ... tuig-tuig mahitabo,” miingon ang tenyente-koronel sa kapolisan. “Walay giaresto kay mga alagad man sa Diyos ang nalangkit.”—REUTERS NEWS SERVICE, U.S.A.

Ang katuyoan sa Pan-African nga proyekto nga gisugdan sa African Union niadtong 2007 mao ang pagsanta sa pagdako sa desyerto pinaagig berdeng paril. Napulog usa ka nasod nananom ug milyon-milyong luyong sa nagkalainlaing kahoy diha sa luna nga may gilapdong 15 kilometros, ug ang distansiya niini maoy 7,600 kilometros gikan sa Senegal sa Kasadpan ngadto sa Djibouti sa Sidlakan. “Nananom mi ug mga kahoy nga dili mapuslan sa mga tiglaging,” miingon si Aliou Guissé, propesor sa plant ecology sa Cheikh Anta Diop University sa Dakar, Senegal. Gipanghinaot nga kining gipanamnan nga dapit magsilbi usab nga protektadong lugar alang sa mga tanom ug hayop ug makataganag dili matiti nga kahinguhaan para sa mga komunidad.

Ang mga siyentista dili makapatin-aw kon nganong ang tawo manghuy-ab, sagad daghang beses sa usa ka adlaw. Bisan ang mga bata nga gisabak manghuy-ab sab, maingon man ang mga hedgehog, ostrich, bitin, ug isda. Daghan ang teoriya nga kasagaran nagkasumpaki, apan walay usa niini ang nakapakombinsir sa mga siyentista. Daghan kanila nagtuo nga ang pagpanghuy-ab, nga sagad moabot ug unom ka segundo, makadugang ug suplay sa oksiheno diha sa utok. Apan “hangtod karon wala kini mapamatud-i sa mga siyentista,” nag-ingon ang Science News. Ang mga panukiduki dili pa dugay nagpakita nga “tingali ang pagpanghuy-ab nagsilbing thermo­stat, nga makapabugnaw sa utok nga nasobrahan ka init.” Pero walay nasayod kon unsa gyoy tinuod.