Ang imong anak nga tin-edyer moingon nga estrikto kaayo ka. Pero sa imong bahin, gusto lang nimo siyang malayo sa kadaot. Basin maghunahuna ka, ‘Kon dili nako seryosohon pagpatuman ang balaod, madaot lang siya!’

Ayawg kabalaka, makahatag kag makataronganong mga balaod sa imong anak. Apan una sa tanan, kinahanglang mahibalo ka kon nganong masuko siya sa imong mga balaod.

Matod sa uban: Ang tanang batan-on mosuki gyod; ingon gyod sila niana.

Ang tinuod: Ang batan-on lagmit dili mosuki kon ang ginikanan mohatag ug makataronganong mga balaod ug estoryahan nila kini.

Bisan tuod daghan ang hinungdan kon nganong mosuki ang mga batan-on, tingali ang ginikanan dili makabantay nga silay hinungdan sa problema kay sobra ra sila ka estrikto sa ilang balaod o kaha ang balaod dili na haom sa edad sa ilang anak. Tagda kini:

• Sobra ra ka estrikto. Kon ang balaod sa ginikanan dili mabali, kini morag pisi nga makagapos imbes seat belt nga makapanalipod. Busa, ang anak tingalig magkawat-kawat na hinuon sa paghimo sa gidili sa iyang ginikanan.
• Dili na haom sa edad. Ang pag-ingong, “tumana lang ko,” tingali igo na para sa bata, pero para sa batan-on, kinahanglang mohatag kag rason. Sa pagkatinuod, ang imong anak sa umaabot magkinaugalingon na unya ug mohimog bug-at nga mga desisyon. Mas maayo nga makakat-on siya sa pagpanimbang-timbang ug sa paghimog desisyon samtang anaa pa siya sa imong poder.

Apan unsay imong himoon kon ang imong anak morag kanunay na lang maglagot sa imong mga balaod?

Una sa tanan, angay kang mahibalo nga ang mga batan-on nagkinahanglag balaod—ug bisag dili sila moadmitir, buot nila nga dunay balaod. Busa paghatag ug balaod, ug tinoa nga nakasabot niana ang imong anak. “Kon ang mga batan-on hatagag klarong balaod ug nahibalo nga pagasusihon sila sa ilang ginikanan, wala kaayoy posibilidad nga magbinuang sila,” nag-ingon ang librong Letting Go With Love and Confidence. Sa kasukwahi, ang ginikanan nga dili mohatag ug balaod naghatag ug impresyon nga sila walay pagtagad sa ilang anak. Ug busa mosuki ang mga anak.—Prinsipyo sa Bibliya: Proverbio 29:15.

Nan, sa unsang paagi mahimo kang makataronganon? Pasultiha ang imong anak sa iyang hunahuna bahin sa mga balaod sa balay. Pananglitan, kon mohangyo siya nga lugwayan ang oras sa iyang pagpauli, paminawa ang iyang rason. Ang anak nga nahibalo nga siya gipamatian lagmit motahod ug mosunod sa desisyon sa ginikanan bisag supak siya niana.—Prinsipyo sa Bibliya: Santiago 1:19.

Apan sa dili pa mohimog desisyon, hinumdomi kini: Sagad ang mga anak gustog dugang kagawasan kay sa nahiangay, ug ang mga ginikanan dili pod mohatag ug igong kagawasan. Busa hunahunaag maayo ang hangyo sa imong anak. Nagpakita ba siya nga siya responsable? Angay bang mohatag kag konsiderasyon tungod sa situwasyon? Ihatag ang iyang gihangyo kon nahiangay.—Prinsipyo sa Bibliya: Genesis 19:17-22.

Gawas sa pagpamati sa hunahuna sa imong anak, isulti kaniya kon unsay imong gikabalak-an. Sa ingon, nagtudlo ka kaniya sa paghunahuna dili lang sa iyang kagustohan kondili sa pagbati usab sa uban.—Prinsipyo sa Bibliya: 1 Corinto 10:24.

Dayon paghimog desisyon ug ipatin-aw ang imong rason. Bisag dili siya malipay sa desisyon, tingali malipay siya nga ang iyang ginikanan mamati kaniya. Hinumdomi, nagbansay ka sa imong anak sa paglihok ingong hamtong. Pinaagi sa paghatag ug makataronganong mga balaod ug sa pagpakig-estorya bahin niini, nagtabang ka kaniya nga mahimong responsableng hamtong.—Prinsipyo sa Bibliya: Proverbio 22:6.